Манжин байхад махаар яах вэ, Манж байхад Монголоор яах вэ гэдэг үг байдаг даа.  Түүнтэй төстэй нэг үгийг УИХ-ын гишүүн Б.Батзориг хэлчихсэн.  Юу гэхээр, хөшөө байхад хүүхдийн эмч, цагдаагаар яах вэ гэсэн маягтай. Яг тэгж түс тас хэлээгүй ч цаагуураа утга учрыг нь гүн гүнзгий ухвал иймэрхүү хэлцтэй ойролцоо байж болохоор байгаа юм. Мань хүн Баянзүрх дүүргийн Засаг даргаар ажиллаж байхдаа Чулуун овоо орчимд арслан, нохойны хөшөө бариулаагүй юу.

Тухайн үедээ тэрбум төгрөгөөр туйлсан гээд л хэвлэлийнхэн шуугиад байлаа. Харин мань хүн нэгэн нэвтрүүлэгт оролцох үеэрээ энэ хөшөөнийхөө цаад нарийн учрыг тайлж, үнэ өртгийг нь ч хэлж. Үнэ нь тийм ч их биш, 280-хан сая юм билээ, хөөрхий. Тэгээд Баянзүрх дүүргийн шүтээн нь цагаан арслан. Баянзүрх хайрхны савдаг нь нохой юм гэсэн. Ингээд л арслан, банхарын хөшөө барихаар шийдэхгүй юу. Тэгэхдээ бас лам хуваргаас асууж, зөвлөлдсөн юм билээ. Гол нь тэр хөшөөг хөшөө гэдэг талаас нь биш шүтээн гэж харах ёстойг бас захисан. Өнөөдрийг хүртэл бидний хийгээд байгаа гол алдаа бол шүтээнийг хөшөө гэж хараад байгаад л байна.

За тэгээд, энэхүү шүтээнийг 280-хан сая төгрөгт багтаан барьсны дараа Баянзүрх дүүрэгт гэмт хэргийн гаралт багассан гэж байгаа. Хамгийн чухал нь хүүхдийн эндэгдэл буурчээ. Үүнийг бүр судалгаагаар тогтоосон гэж байгаа юм. Зарим нэг сайдын хажууд эрхэм гишүүн бүр судалгаатай юм ярьж байгаа шүү. Энэ яриаг цаагуур нь ухаад үзвэл хөшөө байхад цагдаа, хүүхдийн эмчээр дутахгүй гэсэн далд утгыг илэрхийлж байна гэж мунхаглаад байна. 

Дээрээс нь Б.Батзориг гишүүний хэрэгжүүлсэн энэ ариун ажлыг дүүргийн Засаг дарга болгон үлгэр дуурайлал болгомоор байна. Хотын дарга ч гэсэн ялгаагүй. Сонгинохайрхан дүүрэг өнөөдөр гэмт хэргийн гаралтаараа нийслэлдээ дээгүүрт давхидаг. Хүүхдийн эндэгдэл ч ялгаагүй. Учир нь олон хүн амтай. Тэгвэл энэ мэт сөрөг үр дагаварыг бууруулахын тулд Сонгинохайрхан уулынхаа савдгийн хөшөөг Нэгдүгээр хороолол орчимд барьчихгүй юу. Сонгинохайрхан уулын савдаг нь архинд дуртай хөх өвгөн байдаг юм гэнэ билээ.

Тэгэхээр архи шимэн суугаа урт сахалтай, хөх өвгөний хөшөө барьчихвал гэмт хэргийн гаралт аяндаа буураад, хүүхдийн өвчлөл ч гэсэн багасаад л явчихна. Энэ чинь судалгаагаар батлагдчихсан юм шүү. Хан-Уул дүүргийнхэн гэхэд танктай хөшөөний оронд буга унасан цагаан өвгөний хөшөө барих хэрэгтэй. Хөшөө биш ээ, шүтээн шүү. Гол нь шүтээн гэж харах ёстой. Чингэлтэй дүүргийнхэн ч гэсэн Чингэлтэй уулынхаа савдгийн хөшөөг шүтээн болгон залах цаг болж.  

Харин Сүхбаатарын талбай дээр нийслэлийн бэлгэдэл Хангарьд шувууны хөшөөг нэлээд томоор барих хэрэгтэй байна. Сүхбаатар дүүргийнхэн давхар шүтээд явчихна биз. Ингээд л дүүрэг болгонд, цаашлаад Улаанбаатар хотын хэмжээнд гэмт хэргийн гаралт буурч, хүүхдийн эндэгдэл буураад ирвэл Монгол Улс чинь аяндаа л мандан бадардаг юм байгаа биз дээ.

Ядаж л гэмт хэрэг буурч байвал хөшөө барихад мөнгө харамлаад яана. Өө нээрээ, хөшөө биш шүтээн барихад гэж хэлэх гэж байсан шүү. Тэрбумыг зарсан ч болно. Хангарьд шувууны сүрлэг сайхан шүтээн барихад бол тэрбумхан төгрөг үнэхээр багадана. Тэгэхээр 2-3 тэрбумыг цацаад, хүн бүр шүтчихээр шүтээн барьчихаач дээ, хотын дарга аа. Аль хэдийнэ Баянзүрх дүүрэгт шүтээнээ босгоод, дараа нь гэмт хэрэг буураад, хүүхдийн эндэгдэл багассан нь судалгаагаар нотлогдчихоод байхад ийм сайн жишгийг улсад хэрэгжүүлэхгүй яваад байгааг л гайхаад байна.

Манай хотын дарга С.Батболд баар, цэнгээний газрын хаах цагийг 00:00 цаг болгож чадаж байгаа юм чинь Б.Батзориг гишүүний туршлагыг бол өлхөн өлгөж авах байлгүй дээ. Эрхэм дарга нар минь, хүүхдийн эндэгдэл бууруулах гэж эмч нараа цаг наргүй ажиллуулж, эмнэлгийн тоног төхөөрөмжид мөнгө зараад юу хийнэ. Гэмт хэрэгтэй тэмцэнэ гээд л хэдэн цагдаагийнхаа үйлийг үзэж яана. Зүгээр л ахиухан мөнгө зараад, томхон шүтээн барьчих. Баянзүрхийн шүтээнээс илүү томыг барьчихвал гэмт хэрэг буурах биш бүр алга болох ч юм бил үү, хэн мэдлээ.