“Зуныг номтой өнгөрүүлцгээе” аян өнгөрсөн баасан гарагт эхэллээ. Тус аяныг “Монсудар” хэвлэлийн газар, “Интерном” номын дэлгүүртэй хамтран дөрөв дэх жилдээ зохион байгуулж байна. Аяны талаар “Монсудар” хэвлэлийн газрын ажилтан Л.Энхсайханаас зарим зүйлийг тодрууллаа.

 

-“Зуныг номтой өнгөрүүлцгээе” аян эхэлсэн. Аяныхаа талаар дэлгэрэнгүй мэдээлэл өгөхгүй юу?

 

-“Зуныг номтой өнгөрүүлцгээе” аяныг дөрөв дэх жилдээ зохион байгуулж байна. Уламжлал болсон үйл ажиллагаа. Энэ зун манай улсад сонгууль, АСЕМ-ын 11 дэх удаагийн уулзалт болж байгаа нь нэг талаар сонирхолтой. Гэхдээ нөгөө талаар сонгуулийн сурталчилгаа, элдэв ухуулах хуудас хүмүүсийг стресст оруулж, залхааж байгаа шүү дээ.  

 

Тэгэхээр энэхүү залхмаар, уйтгартай байдлаас түр ч болтугай холдохын тулд зуны амралтаараа хүссэн номоо уншиж, оюундаа хөрөнгө оруулалт хийхийг “Зуныг номтой өнгөрүүлцгээе”  аян уриалдаг юм. Өөрийн хүссэн газраа амрах зуураа сонирхолтой ном барьж суух үнэхээр сайхан. Тиймээс залуучууддаа энэ боломжийг олгохын тулд аянаа дөрөв дэх жилдээ зохион байгуулж байна.

 

-Дөрөв дэх удаа зохион байгуулж байгуулж байгаа гэлээ. Энэ жилийн онцлог юу байх вэ?

 

-Өмнө нь бид Соёлын төв өргөөнд нэгдсэн байдлаар номын танилцуулга, өдөрлөг хийж байлаа. Мөн үндэсний соёл, амралтын хүрээлэнд номын өдөрлөг зохион байгуулж тэмдэглэсэн. Хүмүүсийг зуны дэлгэр цагаа номтой өнгөрүүлэхэд уриалсан энэхүү үйл ажиллагаа маань энэ жил гурван үе шаттайгаар зохион байгуулагдана. Тодруулбал, шинэ номын танилцуулгууд хийгдэнэ.

 

Эцэг, эхчүүдэд зориулсан сургалт болон ном тойрсон төрөл бүрийн сонирхолтой сэдвүүдээр хэлэлцүүлэг болно. Номын хямдралтай худалдаа зохион байгуулахаар төлөвлөсөн. Ер нь бид энэ жил хүмүүсийг ном уншуулах, зуныг номтой өнгөрүүлэх гэсэн зорилгодоо илүү ойртож, хүрч ажиллахыг зорьсон. Тэр ч утгаараа багц номыг гаргалаа. Тухайлбал, бороотой өдөр гэртээ ямар ном уншвал тохиромжтой болохыг зөвлөж, номын багц гаргасан. Мөн аяллаар явахдаа үүргэвчиндээ ямар ном байлгах ёстой, хөтөч орчуулагч нарт, залуу уншигчдад гэх мэтчилэн есөн төрлийн багц бий. Товчхон хэлэхэд энэ жилийн аяны маань онцлог гэвэл уншигчдад санал болгож буй багц юм.

 

-Багцынхаа талаар тодруулахгүй юу. Ямар ном орсон бэ?

 

-Нийт есөн багц бий. Тодруулбал, залуу уншигчдад, дэлхийн бэстселлер, үлгэрийн хотхонд, хөтөч орчуулагч нарт, сонсдог ном, модны сүүдэрт хайрттайгаа, бороотой өдөр гэртээ, аяллын үүргэвчинд, хээрийн гал тогоонд гэсэн багцыг аяныхаа хүрээнд гаргасан.

 

Жишээлбэл, хээрийн гал тогоонд багцад “Мах ном”, “Гал тогооны ном”, “Бялуу хийх бяцхан хөтөч” зэрэг ном орсон. Харин залуу уншигчдад багцад “Бодит байдлын ид шид”, “Би хэн бэ?”, “Хайрлах урлаг”, “Зуун жилийн ганцаардал”, “Миний мэдэх сайн үйлс”, “Тиффаныгийн дэргэдэх өглөөний цай”, “Амьтны ферм”, “Вироника үхэхээр шийдсэн нь” гэсэн ном бий. Энэ мэтчилэн зуныг ном уншиж, хөгжилтэй өнгөрүүлэхэд туслах олон төрлийн багцууд байгаа.

 

-Хүүхдийн багцад ямар ном багтсан бэ. Энэ талаар дэлгэрэнгүй мэдээлэл өгөхгүй юу?

 

-Хүүхдийн номын багцуудад ихэвчлэн үлгэрийн ном орсон. Монгол ардын үлгэр, Гриммийн үлгэр, Маршакийн үлгэр, Андерсений үлгэр, мөн хөл нүцгэн зуны өдрүүд, 365 үдэш номуудыг хүүхэд багачууддаа зориулж багцдаа оруулсан.  Ер нь хүний оюунлаг амьдралын эх үндэс хүүхэд ахуй насанд л тавигдах ёстой гэдэгтэй хүн бүр санал нийлэх байх. Хүүхдийн багцад орсон 365 үдэш ном нь эцэг эхчүүдэд 365 үдшийг хүүхэдтэйгээ хамтдаа уншиж, хамтдаа мөрөөдөхөд тусална. Мөн хүүхдийнхээ оюун ухааны өсөлт хөгжилтөд анхаарахад дэм болно.

 

-Номууд хямдарсан гэсэн. Хэдэн хувь хямдарсан бэ?

 

-10-30 хувь хямдарсан. Зуны турш 10-30 хувийн хямдралтай үнээр номоо худалдаж авах боломжтой. 

 

-Бүх номууд хямдарсан уу?

 

-Үгүй зөвхөн багцад орсон номууд хямдарсан. Гэхдээ багц номыг заавал багцаар нь авах шаардлагагүй. Өөрийн уншихыг хүссэн, сонирхож буй номоо салгаж авах боломжтой. Нэг ном авсан ч гэсэн тухайн номоосоо шалтгаалж 10-30 хувийн хямдралтай үнээр худалдаж авч болно. 

 

-Номын багц, хямдралаас гадна аяны хүрээнд ямар ажил зохион байгуулах вэ. Өөр зохион байгуулах үйл ажиллагаа бий юу?

 

-Бид аяныхаа хүрээнд зургаа, долоо, наймдугаар сард үйл ажиллагаа зохион байгуулахаар төлөвлөсөн. Энэ сард аяны нээлттэй холбогдуулан Японы төдийгүй дэлхийн пост модерн уран зохиолын гол төлөөлөгч Мүраками Харүкигийн бичсэн дэлхийн бэстселлер “Өнгөгүй Тазаки Цүкүри ба түүний эргэлтийн он жилүүд”, Милланиум цувралын шинэ боть болох “Аалзны торонд орооцолдсон охин” зэрэг номын нээлт боллоо.

 

Харин долдугаар сард бие даан англи хэл суралцагсдад зориулсан цогц хичээлийн номын багц гаргана. Мөн олон улсын бэстселлер номын зохиогчийн гарын үсэгтэй худалдаа, уншигчдад зориулсан уралдаан тэмцээнүүд, хэлэлцүүлэг зэрэг олон сонирхолтой хөтөлбөрүүдийг ирэх сард зохион байгуулахаар төлөвлөсөн.

 

-Англи хэлний хичээлийн цувралыг багц номд оруулна гэлээ. Ямар номууд багтах вэ?

 

-Тэр талаар одоо хэлэх боломжгүй. Тухайн үед нь хүмүүст хэвлэл мэдээллийн хэрэгслээр дамжуулан мэдэгдэнэ. 

 

-Зарим номын хямдралтай худалдаанд уншигчдийн хүлээсэн номууд хямдраагүй байдаг?

 

-Бидний зорилго хүмүүсийг ном уншихад уриалан дуудах юм. Түүнээс биш их ном зарахдаа гол нь биш. Зуны сайхан цаг ирсэнтэй холбогдуулан уншигчдад ийм ном уншвал зүгээр гэдгийг санал болгож байгаа юм. Ямар нэгэн ашиг олох зорилго байхгүй. Бид ном унших хүмүүсийн тоог нэмэх, тэдэнд ном уншихыг уриалахыг л зорьдог. Энэ бол ямар нэгэн номын хямдралтай худалдаа биш. Харин ном уншихад уриалсан аян юм.