НОБГ-ын Гал унтраах асуудал хариуцсан чиглэлийн ахлах мэргэжилтэн Д.Мөнхсайханаас гал түймэртэй холбоотой асуудлаар зарим зүйлийг тодрууллаа.

-Сүүлийн үед гал түймрийн дуудлага их ирэх болсон гэсэн. Одоогийн байдлаар хэчнээн дуудлага ирээд байна вэ?

-Нийслэлийн Онцгой байдлын газарт он гарсаар гал түймрийн нийт 2030 гаруй дуудлага ирсэн байна. Ойн түймрийн зөрчлийн хэмжээний гурван дуудлага бүртгэгдсэн.  

-Иргэдэд гал түймрийн аюулаас урьдчилан сэргийлэх талаар мэдээ мэдээлэл хүргэдэг шүү дээ. Энэ жил ямар ажлыг зохион байгуулсан бэ?

-Бид оны эхэнд гал түймрийн аюулаас урьдчилан сэргийлэх мэдээ мэдээллийг хүргэх, хийж хэрэгжүүлэх ажлынхаа төлөвлөгөөг гаргадаг. Тэгэхээр төлөвлөгөөнийхөө дагуу олон ажлыг зохион байгууллаа.

Тухайлбал, бүх албадын сургалтыг зохион байгуулсан. Ерөнхий боловсролын сурагчид, оюутан залуус, ажилчин албан хаагчид, удирдах бүрэлдэхүүн, аж ахуйн нэгжийн гэх мэтчилэн төрөл бүрийн сургалтуудыг явуулсан. Уг сургалтыг сар, улирал тутамд зохион байгуулдаг юм. Түүнчлэн албан хаагчиддаа дотоод сургалт явуулдаг. Хамгийн сүүлд гэхэд өнгөрсөн дөрөв дэх өдөр ерөнхий боловсролын сургуулийн ахлах ангийн сурагчдын дунд “Өсвөрийн гал сөнөөгчдийн аварга шалгаруулах тэмцээн”-ийг бүсчилсэн хэлбэрээр зохион байгуулсан. 

Эхлээд  дүүргийнхээ сургуулиуд дунд энэ тэмцээнийг явуулж, шилдгээр шалгарсан нэг сургууль нь бусад дүүргээс шалгарсан сургуулиудтай өрсөлдсөн. Ингээд тэмцээний хоёрдугаар шатад дүүргүүдээс шалгарсан есөн сургуулийн сурагчид өрсөлдөж, шилдгээ шалгаруулсан. Энэхүү тэмцээнд Багануур дүүргийн ахлах ангийн сурагчид тэргүүн байр эзэллээ. Энэ мэтчилэн сургуулийн хүүхдүүдэд гал түймрийн аюулаас урьдчилан сэргийлэх талаархи ойлголт өгөх, тэднийг өөрсдийг нь оролцуулах маягаар мэдээ мэдээллийг хүргэж байна.

-Хавар намрын улиралд хуурайшилт ихтэй учраас түймэр гарах нь ихэсдэг. Энэ жил ойт хээрийн түймэр гарсан уу?

-Нийслэлийн хэмжээнд ойн түймрийн гурван удаагийн дуудлага ирсэн. Энэ зун хур бороо элбэгтэй байлаа. Мөн иргэдэд анхааруулга сэрэмжлүүлэг өгч, үргэлж хуулийн хэрэгжилтийг шалгаж, хавар, намрын хуурайшилттай үед ногоон бүсийн эргүүлийг гаргаж байгаа учраас ойн түймэр гарах тохиодол харьцангуй бага байна. Одоогийн байдлаар ойт хээрийн түймэр гарсан дуудлага байхгүй.

-Бага насны хүүхэд ахуйн гал түймэрт өртөх нь ихэссэн. Энэ юунаас болж байна вэ?

-Саяхан Багануур дүүрэгт есөн настай хүүхэд гэртэйгээ шатаж, нас барсан харамсалтай хэрэг гарлаа. Ер нь бид байнга хэлж, ярьж сануулдаг. Бага насны хүүхдийг хараа хяналтгүй орхихгүй байх, гэртээ цоожилж үлдээж болохгүй гэж хэлдэг. Энэ тухай хэлсээр байтал эцэг, эхчүүд хайхрамжгүй, санамсаргүй, болгоомжгүй үйлдэл гаргаж байна.

Энэ мэтчилэн ямар нэгэн шалтгааны улмаас бага насны хүүхэд ахуйн гал түймэрт өртдөг. Хүүхэд гэртээ ганцаараа байхдаа цахилгаанаар тоглох, эсвэл цоожилж үлдээснээс болж гарч чадахгүй галд өртөж амиа алдаж байна л даа.

-Албан байгууллагад гал гарах тохиолдол байдаг. Манай улсад үйл ажиллагаа явуулж байгаа томоохон кино театруудын аврах гарц, галын хор стандартын шаардлага хангасан байдаг уу?

-Ер нь барилга байгууламжид тавих стандарт үйл ажиллагааных нь чиглэлээс хамааран өөр өөр байдаг. Тухайлбал, сургууль, цэцэрлэг, оффисын барилгаас хамаарч стандарт шаардлага нь харилцан адилгүй.

Гэхдээ ямар ч барилга байгууламж аврах зам гарцтай байх ёстой. Ингэхдээ гал гарсан үед хүмүүсийг аюулгүй болгох нөөц гарц гэж байх шаардлагатай. Ер нь хоёроос дээш аврах гарцтай байна гэсэн стандарт бий. Мөн анхан шатны багаж хэрэгслээ өөрсдөө бүрдүүлсэн байх ёстой. Ялангуяа хүн болгоны ашиглаж чадах гал унтраагуурыг 25 мкв тутамд нэг байх шаардлагыг тавьдаг.

-Нийслэлд үйл ажиллагаа явуулдаг томоохон үзвэр үйчилгээний газрууд нэг хаалгатай харагддаг. Хаалга байсан ч нөөц хаалгаа үйлчлүүлэгчдээ зааж өгдөггүй. Үүнд шалгалт хийдэг байх?

-Хүн ам олноор цуглардаг үзвэр, үйлчилгээний газар хамгийн их аюулгүй байдлыг хангасан байх ёстой. Үүнтэй холбогдуулан  шадар  сайд  болон ОБЕГ-ын даргын удирдамж жил бүр гардаг. Энэхүү удирдамжийн хүрээнд гамшиг ослоос урьдчилан сэргийлэх, галын аюулгүй байдлыг хангасан эсэхэд шалгалт хийдэг.

Шалгалтын явцад аюулгүй байдлаа хангаагүй албан байгууллага байвал шаардах хуудас хүргүүлж, дахин биелэлтийн шалгалт хийдэг. Энэ мэтчилэн тухайн байгууллагын аюулгүй байдлыг хангуулдаг. Сүүлийн үед баригдсан байгууллагууд харьцангуй стандарт нормын дагуу баригдсан. Зам гарц, гэрэлтүүлэг нь стандартын шаардлага хангадаг болсон.

Гэхдээ томоохон кино театрууд нөөц гарцаа чөлөөтэй байлгадаггүй. Ямар нэгэн аюул осол гарсан үед хүмүүсийг гарахад бэлэн байх ёстой байтал хаалгаа цоожилдог эсвэл урьд нь юм хураачихдаг. Эдгээр зөрчлийг шалгалтаар илрүүлж тухайн үед нь арилгуулдаг.