Сонгуулийн үеэр элдэв амлалт өгөхийг алийг тэр гэхэв. Тэр дундаа УИХ-ын сонгуулиар. Таныг нэг өдөр хаан болгоё гэж өнөө шоу шүүгээд байдаг хип хоп үглэдэг хүүд очиж амлалт өгсөн л гээгүй байгаа даа, арай. Манай ард түмэн ч амлалтад итгэмтгий, гэнэн цагаан, уужуухан сэтгэлтэй хүмүүс юм. Түүнийг улстөрчид нь яасан сайхан ашигладаг юм.

 

Эмэгтэй хүн төрж, эрэгтэй хүн шартаж хаширдаггүй юм гэнэ билээ. Харин манай иргэд бол амлалтад хууртаж ханахгүй шинжтэй. Хэзээ ч энэ энэрэнгүй нинжин сэтгэлээ гээж, элдэв амлалтыг нь эргэцүүлдэг болох юм бүү мэд. Сүүлийн үед орон нутгийн сонгуульд өрсөлдөж байгаа нөхдүүд өнөөх гоё амлалт өгдөг аргыг хэрэглэж эхэллээ. Дорнод аймгийн Хэрлэн суманд нэр дэвшиж байгаа нэг залуу “Дорнод нутгаа Сингапур шиг хөгжүүлнэ. Ард иргэдээ Саудын Араб шиг баяжуулна” гэсэн амлалт өгч. Нэг аймгийг тасдаж аваад, улсаас илүү гаргаж хөгжүүлээд, иргэдийг Арабын Шахууд шиг баяжуулна гэж бодохоор энэ нөхөр ой тойнд багтамгүй их хөрөнгө мөнгөтэй бололтой юм. 

 

Ямар ч байсан Дорнодыг бол Сингапур шиг хөгжүүлээд, цоо шинэ хот болгоод, улс дотор улс байгуулчих хэмжээний хөрөнгө түүнд байна гэсэн үг. Тийм болохоор манай улстөрчид гадаадаас мөнгө хайж явахаар өөрийнхөө зарим нэг авдрыг уудлаад, хэдэн төгрөг авчихмаар юм. Бас нэг нөхөр сумын инфляцийг бууруулахаа амласан байна билээ.

Хэрэндээ л хөөрхөн эдийн засгийн мэдлэг үнэртүүлсэн нэр дэвшигч бололтой юм. Бодвол ялж гараад, сумын Засаг дарга болоод, дараа нь инфляцитай тэмцэх юм уу даа. Уг нь одоогоор манай улсад бууруулаад байх инфляци байхгүй. Буурдгаа буураад, бүр дифляци болчихоод, эдийн засаг өсөлт нь зогсох өвчинд нэрвэгдчихээд байгаа. Ийм үед инфляци бууруулахын төлөө ажиллахаар ярьж байгааг бодоход тэр сум нь Монгол Улсаас эдийн засгийн хувьд ангид бололтой юм. 

 

Тэгээд сумынх нь инфляци өсөөд, иргэдийнх нь амьдрал хэцүүдээд байгаа юмдаг уу даа. Хэрвээ тийм бол бууруулахын төлөө зүтгэлгүй л яахав. Буруутгаад байх арга байхгүй. Энэ мэт том том зорилготой хүмүүс орон нутгийг хөгжүүлэхийн төлөө хоёргүй сэтгэлээр зүтгэхээр гарааны шугам дээр зогсч байна. Гол нь иргэдийн итгэл л хэрэгтэй гэж байгаа. Ер нь бол том юм амласан хүн талыг нь хийчих магадлалтай. МАН л гэхэд хүүхдийн мөнгийг бүгдэд нь өгнө л гэсэн. Одоо 60 хувьд нь ямар ч байсан өгч л байна. Жилийн 1.5 тэрбумаас бага орлоготой аж ахуйн нэгжүүдийн татварыг нэг хувь болгоно гэж амласан. Ямар ч байсан дөрвөн салбарын 4700 аж ахуйн нэгжийн татварыг бууруулах гэж л байна. 

 

Ядаж амлалтынхаа талыг биелүүлээд л байгаа биз дээ. Тэгвэл нутгаа Сингапур шиг хөгжүүлнэ гэж байгаа нөхөр тэр хэмжээнд хүргэдэггүй юм гэхэд ядаж Эрээн шиг болгох байлгүй дээ. Ер нь дараагийн сонгуулиар бүгдээрээ илүү том амлалт өгснийг нь л сонгоё. Тухайлбал, сар бүр бүх хүүхдэд 40 мянган төгрөг олгоно гэж амласныг нь ч юм уу. Тэгвэл дараа нь 50 хувийг нь биелүүлээд, алагчлалгүй 20 мянган төгрөг өгөх ч юм бил үү. Түүнээс илүү амлалт өгвөл тэр л биз.