Цагдаагийн ерөнхий газраас сүүлийн үед гарсан онц ноцтой хэргийн талаар мэдээлэл хийлээ. Цагдаагийн Ерөнхий Газрын Хэвлэл мэдээллийн төвийн дарга, цагдаагийн дэд хурандаа Б.Баатархүү “Хөвсгөл аймгийн Тосонцэнгэл сумын Гандандамчойлон хийдийн хосгүй үнэт олдворуудыг энэ сарын 12-13-нд шилжих шөнө хулгайлсан хэрэг гарсан.

Энэ хэргийг үйлдсэн этгээдүүдийг цагдаагийн алба хаагчид шуурхай эрэн сурвалжилж, ажилласны үр дүнд гурав хоногийн дараа баривчиллаа.

Уг хэргийг А, Б нарын залуус үйлдсэн бөгөөд Гандандамчойлон хийдийн вакум цонхыг хагалан орж, хар морь хөлөглөсөн сахиус, Жигжид бурхны мандал хот гэж нэрлэгддэг эртний зурмал бурхан, Авид бурхны зурмал хөрөг, нэр нь үл мэдэх шавар тогтоц бүхий бурхан, шаазан ваар, 20 ширхэг бурхан гэх мэтчилэн түүхийн үнэт зүйлийг хулгайлсан байсныг хурааж авсан” гэв.

Гэмт этгээдүүд 1982, 1984 oных бөгөөд Улаанбаатар хотын харъяат юм байна. Мөн тэрбээр хулгай орсон сүм ямар ч харуул, хамгаалалтын дохиоллын систем суурилуулаагүй байсан гэдгийг онцолсон. Тиймээс түүхийн ховор үнэт зүйлс хадгалдаг байгууллагуудад харуул, хамгаалалтын систем суурилуулахыг анхааруулсан юм.

Түүнчлэн сүүлийн үед эх орноо хамгаалах үндэсний хөдөлгөөн нэрийн дор залуус бүлэглэн хүн дээрэмдэх гэмт хэрэг гарах нь ихэссэн байна. Уг хэрэгт цагдаагийн байгууллага анхаарал хандуулан ажиллаж байгаа бөгөөд иргэдээс хамтарч ажиллахыг хүссэн юм.