Хөдөө орон нутагт цас орж, өвөлжилт хүндэрсэнтэй холбогдуулан улсын онцгой комисс 21 аймагт ажиллаж байгаа билээ.

Тэгвэл УОК-ын нарийн бичгийн дарга, хурандаа М.Энх-Амараар ахлуулсан “Шуурхай бүлэг  1” энэ сарын 23-24-ний өдрүүдэд  Увс аймагт ажиллажээ. Тодруулбал, тус  аймгийн Бөхмөрөн, Сагил, Түргэн, Наранбулаг, Цагаанхайрхан сум болон Улаангом хотод  ажилласан байна.

УОК-ын мэдээллээр энэ сарын 23-ны өдрийн байдлаар Увс аймгийн 19 сумын Баруунтуруун, Малчин, Хяргас сумдын ихэнх нутаг “цагаан зуд”-тай,  Давст,  Түргэн, Тэс, Цагаанхайрхан, Өндөрхангай, Ховд, Зүүнхангай, Зүүнговь, Наранбулаг, Сагил, Тариалан, Улаангом сумд “цагаанаар зудархуу”, бусад суманд өвөлжилт хэвийн байгаа ажээ.

Увс аймаг энэ 92 багийн 10047 өрхөд хонин толгойд шилжүүлснээр нийт 3,9 сая мал  өвөлжиж  байна.  Харин улсын тусгай хамгаалалтай бүс нутагт  546 өрхийн 204.2 мянган толгой мал,  хилийн зурвас газарт 1136 өрхийн 356,0 мянган толгой мал өвөлжихөөр  зохион байгуулалт хийсэн аж.