Азийн хөгжлийн банкнаас манай улсад 24 жилийн хугацаанд нийт 1.92 тэрбум ам.долларын туслалцаа олгожээ. Тус банкны тайланд “Монгол Улсын эдийн засгийн хөгжил хурдасч дундаас дээш орлоготой орон болсон, ядуурал хүн амын тавны нэг хувьд буурсан зэрэг ахиц дэвшил гарсан ч тогтвортой, хүртээмжтэй өсөлтийг хангахад сорилт тулгарсан хэвээр байна.

Эдийн засаг нь уул уурхайд хэт түшиглэсэн ба гаднын нөлөөнд өртөмтгий хэвээр бөгөөд төсвийн алдагдлыг бууруулах, нийгмийн эмзэг бүлгийг хамгаалах, гадаад өрөө төлөх шаардлага тулгарч байгаа юм” хэмээн дүгнэжээ. Түүнчлэн Азийн хөгжлийн банк Монгол Улстай 2017-2020 онд түншлэх шинэ стратегийг боловсруулж байгаа ажээ. Шинэ стратегийн хүрээнд манай улсад үзүүлэх туслалцааны цар хүрээг өргөтгөх боломжтой юм байна.