”Орчлон-2” хүүхдийн цэцэрлэгийн усан санд дөрвөн настай хүүхэд живсэн харамсалтай хэрэг 2015 оны арванхоёрдугаар сарын 22-нд гарсан билээ. Хэрэг гарах үед хүүг яаралтай эмнэлэгт хүргэсэн боловч тархи нь үхэжсэний улмаас амиа алдсан юм. Уг хэргийг цагдаагийн байгууллагаас шалгаж, тус цэцэрлэгийн усан сангийн ажилтан Т, Ц, Т, Б нарыг Эрүүгийн хуулийн 119.2-д зааснаар яллах дүгнэлттэйгээр шүүхэд шилжүүлсэн юм.

Тэгвэл тус хэргийн шүүх хурал  Хан-Уул дүүргийн эрүүгийн хэргийн анхан шатны шүүхээр хэлэлцэж, шүүх бүрэлдэхүүн хэргийг нэмэлт мөрдөн байцаалтад буцаасан байна. Харин Эрүүгийн хуулийн 119 дүгээр зүйд, “Сургуулийн өмнөх насны хүүхдийг халамжлах үүрэгт ажилдаа хайнга хандах тухай” заасан байдаг.

 Хэрвээ мөрдөн байцаалтын дараа дээрх гурван сэжигтний гэм буруутайг шүүхээс эцэслэн тогтоовол албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасч хоёроос таван жил хүртэл хугацаагаар хорих ял шийтгэх юм байна.