“Тогос шиг гоёж гараад, тогонд цохиулсан юм шиг орж ирэхийг шинэ жил тэмдэглэх гэнэ ээ” гэх инээдэмтэй атлаа үнэн үг цахим ертөнцөөр аялж, түүнд нь маш олон хүн сэтгэгдэл бичжээ. Зарим  нь эл өдрийг ганц олдох аз жаргал мэт санан хөөрч сагсуурч яваад хөл, гараа хөлдөөн эд эрхтнээсээ салж сүйд болох нь бий. Шартаж, бөөлжих тухайд арван хүн тутмын тавд нь тохиолдох биз. Ингэж яншсанаараа шинэ жил гээчийг тэмдэглэж болохгүй, энэ баяраас татгалз гэж байгаа юм биш. Бүтэн жилийнхээ амжилт бүтээлийг дүгнэж цэгнэн, амжилттай ажилласан нэгнээ урмын үгээр мялаан, хамт олноороо нэг оройг бужигнаж өнгөрүүлэх нь байх зүйл. 

 

Бас өргөө гэрт нь шинэ хүн мэндэлж, дурлалт хосууд аз жаргалдаа умбан, хэн нэг нь ахуй амьдралаа өөд татан шинэ орон сууцанд  нүүн орох гэх мэтчилэн хүний амьдралд од гүйсэн жил болж өнгөрсөн бол эл баярт үйл явдлыг  төрөл саднаараа тэмдэглэн, ирэх онд улам илүү амжилт гаргахын ерөөл өргөх нь чухам амьдралыг хөглөж буйн илэрхийлэл буй за.

 

Тиймээс  та бүхэндээ  сайхан баярлаарай, бага шиг ёолоосой билээ  хэмээх гэсэн хэрэг.  Оросууд л   сэтгэлийн хөөрөлд автдагаараа  ёолк тэмдэглэж, зад архиддаг, хот тосгоноороо, ах дүү төрөл саднаараа. Түүнийг нь манайхан 1945 оноос дуурайж, эдүгээ үндэсний баярын хэмжээнд шахам  тэмдэглэх болж. Социализмын үед байгууллагууд хамт олноороо банкадласхийгээд л  өнгөрүүлдэг байсан бол орчин цагт энэ баяр  цар хүрээгээ тэлсээр байгаа.

 

Чухамдаа энэ жил л байгууллага бус ажилтан, албан хаагчид нь өөрсдөө мөнгөө гарган тэмдэглэж байх шиг байна.  Эдийн засаг хямарч, эх орон элгээрээ хэвтлээ хэмээн дуу алдах мөртөө аймаг, сумаараа, төгссөн төгсөлтөөрөө, төрийн бус байгууллагуудаараа, фракциараа нийлж дарвисаар, нэгнийгээ магтан хөөргөж, өргөмжлөл жуухаа гардуулсаар байгаа. Охид бүсгүйчүүд гоёлын даашинзны эрэлд мордоцгоон, размер таарахгүй тэвдсэн зарим нь өдрөөр хөлслөн арга үйлээ барж байгаа нь ч бий.

 

Бид ингэж л хөөрдөг ард түмэн. Дэлхийн ихэнх оронд арванхоёрдугаар сарын 25  гэх ганцхан өдөрт ач холбогдол өгч,  ах дүү төрөл садан найз нөхөддөө зул сарын мэнд дэвшүүлэн, гэр бүлийн хүрээнд тэмдэглэх аж. Зул сарын “төрсөн нутаг” АНУ-д шинэ жилийг өнгөрүүлж үзсэн тохиолдол миний амьдралд бий. Он солигдох мөчид монголчууд гудамжнаа эсвэл тагтан дээрээ салют, оргилуун дарсыг зэрэг зэрэг буудуулан сүйд болж сүржигнэдэг бол  өндөр хамартны нутагт  ажин түжин.

 

Гудамж талбай нь эл хуль. Яах вэ, зул сар болдгоороо  болоод өнгөрнө.  Гагцхүү элэг бүтэн, эрүүл саруул байх явдал билээ. Жилийн жилд л ажлын эхний өдөр  баярын өдрүүдэд эрүүлжүүлэгдсэн, амь насаа алдсан гэх зэрэг сэтгэл харанхуйлсан хар мэдээнүүд хөврөх нь бий.  Өнгөрсөн жил гэхэд  нэгэн сайхан залуу өргөмжлөлөө бариад хөлдөж, амь насаа алдсан дэндүү  харамсалтай зүйл Улаанбаатарт гарсан. 

 

Энэ жилийн тухайд сүүлийн 20 жил тохиолдоогүй хүйтэн өвөл болж буйг бид мэдэж байгаа. Ес эхэлж, жавар тачигнаж, хүйтний эрч өд­рөөс өдөрт нэмэгдэж буйг хэн бү­хэнд сануулахад илүү­дэх­гүй байх. Албан бай­гуул­лагууд ч шинэ жилээ тэм­дэг­лээд бараг л дуусч бай­гаа байх.

 

Сүүлийнх нь 30-ны өдрөөр төгсгөл болох биз. Гэхдээ амралт залган   хэ­дэн өдрөөр үргэлжилнэ.  Газар ойр нь эцэг, эх рүүгээ тэмүүлж, хорт хийнээс зугтаасан нь бяцхан үрсээ аваад ойн зах бараадан алга болдог. Ингэж л ашиглахгүй бол тэр олон өдрийг яаж  ч барах вэ дээ, үнэндээ.  Гагцхүү ирэх буцах замдаа аюулгүй байдлыг чухалчилж, шинэ онтойгоо эрүүл саруул золговол ирэх жилийн наадам ч ойрхон л байна даа.