Эцэг, эхийн хайхрамжгүй, болгоомжгүй байдлаас болж бага насны хүүхэд амиа алдах тохиолдол гарч байгааг Улаанбаатар хотын Цагдаагийн газраас анхаарууллаа. Тодруулбал, өнгөрсөн долоо хоногт Өвөрхангай аймгийн Баруунбаян-Улаан суманд эцэг, эхийн хайхрамжгүй байдлаас болж хүүхдийн амь хохирсон хэрэг гарчээ.

Хашаандаа тоглож байсан хоёр настай хүүхэд эцэг, эхээ машинд суухыг харан гүйж очсон байна. Машины хаалга татах үед аав, ээж нь анзааралгүй машинаа хөдөлгөн явснаас үүдэн хүүхэд унаж амиа алдсан аж. Тиймээс Улаанбаатар хотын цагдаагийн газраас бага насны хүүхдийг хараа хяналтгүй орхихгүй байх, авто тээврийн хэрэгслээр зөөвөрлөхдөө зориулалтын суудалд суулгахыг санууллаа.