Эрүүл мэндийн сайд А.Цогцэцэг Бүгд Найрамдах Социалист Вьетнам Улсад суух Элчин сайд Д.Билэгдорж, Бельгийн Вант Улсад суух Элчин сайд О.Оч нарыг хүлээн авч уулзлаа. Уулзалтын үеэр дээрх улсуудтай эрүүл мэндийн салбар дахь хамтын ажиллагааны талаар санал солилцсон юм.

Эрүүл мэндийн сайд А.Цогцэцэг Монгол Улсын Их хурал, Засгийн газар, ЭМЯ-ны санаачилга, Бельгийн Вант Улсын Засгийн газрын 100%-ийн хөнгөлөлттэй зээлийн хөрөнгөөр Дорнод аймаг дахь Зүүн бүсийн оношилгоо, эмчилгээний төвийн оношилгоо, эмчилгээний хүчин чадлыг бэхжүүлж, Монгол Улсын хоёр дахь шатлалын загвар эмнэлэг болгон бүс нутгийн хүн амд үзүүлэх эрүүл мэндийн тусламж үйлчилгээний чанар хүртээмжийг сайжруулах зорилгоор 4.6 сая еврогийн хөрөнгө оруулалт бүхий төслийг 2008-2011 онд хэрэгжүүлснийг танилцуулав.

Түүнчлэн Эрүүл мэндийн сайд уг төслийг өргөжүүлэн Ховд аймаг дахь Баруун бүсийн оношилгоо, эмчилгээний төвийн чадавхийг сайжруулах зорилгоор 6 сая гаруй еврогийн санхүүжилт шаардлагатай байгаа бөгөөд үүний 60 хувийг Бельгийн Вант Улсын Засгийн газраас хүүгүй зээл хэлбэрээр, 40 хувийг Монгол Улсын засгийн газраас тус тус санхүүжүүлэхээр болсон гэдгийг хэлсэн юм.

Энэ үеэр БНСВУ-д суух Элчин сайд Д.Билэгдорж Монгол Улсад Вьетнам Улстай хамтарсан хүнсний биоидэвхт бүтээгдэхүүн үйлдвэрлэх бага оврын үйлдвэр ирэх хоёрдугаар сард ашиглалтад орох гэж байгааг дуулгасан юм.

Мөн тухайн үйлдвэрийн бүтээгдэхүүнүүдийг Герман Улс руу явуулж лабораторид шинжлүүлсэн нь үр дүнтэй байсныг хэллээ. Тэрээр мөн Улсын нэгдүгээр төв эмнэлэг, Ханой хотын төв эмнэлэгтэй хамтын ажиллагаатай байдгийг дурдсан юм.