Галын аюул ослоос дөрвөн хүний эрдэнэт амийг аварсан Сонгинохайрхан дүүргийн цагдаагийн II хэлтсийн эрүүгийн төлөөлөгч, цагдаагийн дэслэгч Г.Ганбаярыг ХЗДХ-ийн сайд С.Бямбацогт өнөөдөр хүлээн авч уулзан, баяр хүргэлээ. Энэ үеэр түүний баатарлаг үйлсийг үнэлж “Цагдаагийн алдар” тэмдгээр шагнасан юм.

ХЗДХ-ийн сайд С.Бямбацогт “Аюул ослоос хүний амийг аварсан энэ сайхан мэдээг сонсоод цагдаагийн алба хаагчдаараа бахархах сэтгэл төрлөө. Ард олныхоо аюулгүй амьдралын манаанд цагдаагийн мянга, мянган алба хаагчид 24 цагийн турш нүд цавчилгүй зүтгэж яваа. Эх орондоо, өргөсөн тангарагтаа үнэнч байж эрдэнэт хүний амь насыг аврах ариун үйл хэргийг нэр төртэй биелүүлсэн Г.Ганбаяртаа баярлалаа” гэв.

Цагдаагийн дэслэгч Г.Ганбаяр 2017 оны нэгдүгээр сарын 24-ний өглөө 08.00 цагийн үед ажилдаа явах замдаа нэгэн бүлийн дөрвөн хүнийг гал түймрийн аюулаас аварч хамгаалсан билээ.