Автотээврийн үндэсний тө­вийн удирдлага, мэргэжилт­нүү­дэд мэргэжил, арга зүйн зөв­лөгөө өгөх үндэсний зөвлөгөөн өчигдөр Автотээврийн үндэс­ний төвийн хурлын танхимд бол­лоо. Энэ жил “Автотээврийн менеж­мен­тийг сайжруулах жил” бол­гон зар­ла­сан­тай хол­­бог­­дуу­­лан Улаан­баатар хот бо­лон орон нут­гийн удир­дах ажилт­нууд, нягт­лан бо­догч, тех­ни­кийн хя­нал­тын үз­лэ­гийн ин­же­не­рүүдийн мэргэшил, ур чадварыг дээшлүүлэх, мэргэжил, арга зүйн зөвлөгөө өгөх, цаашид хийж гүйцэтгэх ажлаа танилцуулах зорилгоор энэхүү зөвлөгөөнийг зохион байгуулжээ.

Тус зөвлөгөөнд Зам, тээврийн хөгжлийн сайд Д.Ганбат, Автотээврийн үндэс­ний төв” ТӨҮГ-ын захирал П.Дэлгэр­наран болон нийслэл, хөдөө орон нутгийн Автотээврийн төвийн дарга, нятлан бодогч, техникийн хяналтын үзлэгийн инженер зэрэг 150 гаруй хүн оролцон, авто­тээврийн салбарт тул­гам­даж буй хүндрэл бүрхшээ­лүүд, түүнийг шийдвэрлэх арга замын талаар санал солилцсон юм. Зөвлөгөөний үеэр Чанарын удирдлагын албаны дарга Н.Зориг “Манай Автотээврийн үндэсний төв Монгол Улсын хэмжээнд автотээврийн бүх үйл ажиллагааг зохицуулдаг. Манайх Улаанбаатар хотод тав, 21 аймагт 22 салбартай. 2017 оныг тээврийн менежментийг сайжруулах жил болгон зарласан.

Үүнтэй холбогдуулан орон нутагт үйл ажиллагаа явуулж байгаа тээврийн төвүүдийнхээ удирдлага, инженер техникийн ажилтнуудтай уулзалт зохион байгуулж, мэргэжил арга зүйн зөвлөгөө өгч, цаашид хийх ажлаа төлөвлөж байна. Ер нь энэхүү үйл ажиллагааг жил бүр зохион байгуулдаг гэж хэлж болно. Манай төв тээвэр зохицуулалтын ажлыг орон нутагт хийж байна. Мөн улс хоорондын тээвэр зохицуулалтын ажлыг хийж байна.

Энэ жил бид улс хоорондын тээвэр зохицуулалт дээр хоногийн нэгдсэн график нэвтрүүлэх гээд ажиллаж байна. Таван толгойгоос гарч байгаа нүүрсийг тээвэрлэх тал дээр зохицуулалтын арга хэмжээ авч ажиллаж байгаа. Тээврийн менежментийг сайжруулна гэхээр зөвхөн тээвэрлэлт гэж ойлгож болохгүй. Тээвэртэй холбоотой бүх үйл ажиллагааг сайжруулах, шинэчлэх үйл ажиллагаа явагдах юм. Тиймээс бид автотээврийн зарим үйл ажиллагааг олон улсын стандартын шаардлагын дагуу итгэмжлэх, чанарын удирдлагын тогтолцоог нэвтрүүлэх ажлыг хийж явж байгаа” гэв.

Тус зөвлөгөөнөөр орон нутагт автотээврийн ажил үйлчилгээг хариуцан гүйцэтгэхдээ тухайн аймгийн Засаг даргатай гэрээ байгуулж, ажиллах, улс, хот хоорондын болон аймаг, орон нутгийн ачаа, зорчигч тээврийн ажил үйлчилгээнд тавих төрийн хяналтыг Зам, тээврийн хөгжлийн яамтай байгуулсан гэрээний дагуу  хэрэгжүүлэх, автотээврийн хэрэгслийн бүртгэл хөтлөх, улсын дугаар олгох үйлчилгээг цахимжуулах, аж ахуйн нэгж, байгууллага, иргэдэд түргэн шуурхай үйлчлэх зэрэг чиглэлийн хүрээнд ярилцсан юм.

Энэ үеэр Тээвэр зохицуулалтын хэлтсийн дарга Д.Батбаяртай цөөн хором ярилцлаа.

-Зорчигч, ачаа тээвэр­лэлтийн үйл ажиллагааг боловс­ронгуй болгох, тул­гарч буй асуудлуудыг шийдвэрлэх тал дээр ямар арга хэмжээ авч байна вэ?

-Манай Автотээврийн үндэс­ний төв 2017 оныг тээврийн менежментийг сайжруулах жил болгосон. Үүнтэй холбогдуулан манай төв дээр хэд хэдэн ажил хийгдэж эхэлсэн. Тухайлбал, 2016 оны долдугаар сард гурван улсын дамжин өнгөрөх тээврийг туршилтаар явуулсан. Энэхүү дамжин өнгөрөх тээврийн үйл ажиллагаа маань 2017-2018 оноос эхлэн хэрэгжинэ. Мөн холимог тээврийн үйл ажиллагааг туршилтаар явуулсан. Тээврийнхээ бусад төрлүүдтэй хамтраад зорчигч тээврийн үйлчилгээг иргэдэд хүртээмжтэй үзүүлэхийн тулд холимог тээврийн туршилтыг явууллаа. Өөрөөр хэлбэл, Улаанбаатараас Сэлэнгэ хүртэл галт тэргээр яваад Сэлэнгийн төвөөс Улан-Үд хүртэл улс хоорондын автобусаар явах юм. Энэ маань иргэдэд чирэгдэл учруулахгүй, хаалганаас хаалганд хүргэсэн үйлчилгээ болж чадсан. Холимог тээврийн үйлчилгээг 2017 оны хоёрдугаар сараас тогтмол явуулахаар төлөвлөж байгаа. Орос, Монголын автотээврийн хэлэлцээрээр чиглэлийг тохирсон. Дараагийн нэг чиглэл гэвэл Улаанбаатараас Манжуур хүртэлх тээврийн үйл ажиллагааг холимог тээврийн үйлчилгээгээр явуулахаар төлөвлөж байна. Ингэхдээ Улаанбаатараас Дорнод хүртэл онгоцоор ниснэ. Чойлбалсангаас улс хоорондын автобусаар Манжуур хүрэх тээвэрлэлтийг энэ оны эхний улиралд явуулахаар төлөвлөж байна.

-Онлайнаар тасалбар бичих үйл ажиллагааг туршсан. Энэ үйлчилгээ хэр үр дүнтэй хэрэгжиж байна вэ?

-Бид 2015 оноос эхлэн онлайнаар тасалбар бичих ажлыг хийж байна. 2017 онд тасалбар бичилтийн үйл ажиллагааны нэлээдгүй хувийг онлайнаар бичих төлөвлөгөөтэй байгаа. Өнгөрсөн онд 160-аад сая төгрөгийн борлуулалтыг хийлээ. Мөн бид тасалбар бичилтийг гараар биш автомат машинаас бичихээр төлөвлөөд туршилтын ажил хийгдэж байна. Төрийн үйлчилгээний машинаас автотээврийн үйлчилгээний бүх лавлагаа, тасалбараа захиалах боломжтой.