Гадаад харилцааны яамнаас "Мэдээллийн цаг" уулзалтыг зохион байгуулж, гадаадад гарсан монгол иргэнтэй холбоотой гэмт хэргийн талаар мэдээлэл хийсэн юм. Мэдээллийн үеэр тус яамны Консулын газрын захирал Я.Ариунболд “Өнгөрсөн баасан гарагт Солонгос улсад ажиллаж байсан монгол иргэн тус улсын иргэнийг хөнөөсөн гэх мэдээлэл худал. Харин хоёрдугаар сарын 10-нд гэрээгээр ажиллаж байсан Монгол Улсын хоёр иргэн архи ууж, муудалцсанаас болж нэгийгээ хөнөөсөн. Энэхүү хэргийг Солонгос улсын хуулийн байгууллага эрүү үүсгэн шалгаж байгаа” гэв.

Мөн тэрбээр, Канад улсад буудуулж, амиа алдсан монгол иргэний талаархи мэдээлэл өгсөн юм. Тодруулбал,  “Хүн амины хэрэгтэй холбоотой мэдээллийг олон нийтэд дэлгэрэнгүй хэлж, ярьж болохгүй. Гадаад улсад Монгол Улсын нэр хүнд яригдана. Мөн Монгол иргэдэд тухайн улсад зорчих визний шаардлага улам хатуу болох хандлагатай байдаг. Канад улсад буудуулж нас барсан иргэн Б.И-гийн хэргийг тухайн улсын хууль хяналтын байгууллага шалгаж байгаа. Нэг сэжигтнийг барьсан мэдээлэл бидэнд ирсэн. Уг хэрэг хар тамхитай холбоотой байж магадгүй гэсэн. Үүнээс илүү мэдээлэо өгөх боломжгүй байна” гэв. Мөн он гарснаас хойш Монголын Улсын 13 иргэн гадаадад амиа алдсан байна.