Монгол Улсын Их хурлаас “Органик хүнсний тухай” хуулийг 2016 оны дөрөвдүгээр сард баталсан бөгөөд  2017 оны  нэгдүгээр сарын 1-ний өдрөөс мөрдөж эхэлсэн.  Органик хүнсний тухай хуулийг хэрэгжүүлэх, Монгол Улсын Засгийн газрын болон нийслэлийн Засаг даргын 2016-2020 оны үйл ажиллагааны хөтөлбөрт тусгагдсан “ЭРҮҮЛ ХҮНС - ЭРҮҮЛ МОНГОЛ ХҮН” арга хэмжээг хэрэгжүүлэх зорилтын хүрээнд  Хүнс  хөдөө, аж ахуй, хөнгөн үйлдвэрийн яам, нийслэлийн Хүнс, хөдөө аж ахуйн газар хамтран “Органик хүнсний тухай хуулийг дагалдан гарах журам, аргачлалын төслийн танхимын цуврал  хэлэлцүүлэг”-ийг зохион байгуулж байна.

Энэхүү хэлэлцүүлэг нь органик газар тариалан, мал аж ахуй, зөгийн аж ахуй, органик хүнс боловсруулах үйлдвэрийн төлөөлөл, шинжлэх ухаан, сургалт, судалгааны байгууллагын эрдэмтэн судлаачид, хэрэглэгчид, төрийн болон төрийн бус байгууллага, олон улсын байгууллагын нийт 450 орчим төлөөлөгчдийн оролцоог хангах замаар органик салбарын эрхзүйн бичиг баримтыг олон улсын чиг хандлага болон Монгол улсын хүнс, хөдөө аж ахуйн салбарын онцлог, Захиргааны ерөнхий хуулийн шаардлагад нийцүүлэн боловсруулахад чиглэгдэж байгаа юм.

Дэлхийн улс орнуудын хүнс, хөдөө аж ахуйн салбарын хөгжлийн 2030 он хүртэлх төлөвлөлтөд органик хүнсний асуудал чухал байр суурь эзэлж байна. Тухайлбал, АНУ-д  органик хүнсний үйлдвэр жилд дунджаар 10.8% өсч, хэрэглэгчид жилд 43 тэрбум америк долларыг органик хүнс худалдан авахад зарцуулж байгаа билээ. Мөн органик үйлдвэрлэлд шилжсэн өрхүүдийн ядуурлын индекс 1.35%-иар буурч, органик газар тариаланд шилжсэн газрын бичил биетийн агууламж, хөрсний үржил шим 30-70% -иар сайжирсан үзүүлэлт гарчээ.

 Иймд органик хүнс, хөдөө аж ахуйн салбарын хөгжлийг дэмжиж эрхзүйн таатай орчин бүрдүүлснээр нэг талаас, үндэсний үйлдвэрлэгчид өөрийн үйл ажиллагаагаа органик зарчимд нийцүүлэн сайжруулж, орон нутгийн болон экспортын зах зээлд бүтээгдэхүүнээрээ өрсөлдөх, орлогоо нэмэгдүүлэх, байгаль орчинд ээлтэй үйлдвэрлэл явуулж, нийгмийн хариуцлагатай бизнес эрхлэх боломж бүрдэх юм. Нөгөө талаас, хэрэглэгчид баталгаажсан жинхэнэ органик хүнсний бүтээгдэхүүнийг сонгож хэрэглэх, эрүүл мэнддээ хөрөнгө оруулалт хийх боломж бүрдэнэ. Хэлэлцүүлэг  ирэх сарын 20-ыг хүртэл үргэлжлэх ажээ.