“Монголын мэдээ” сонин “Хэн нь хэн бэ” булангаараа яамдын харьяа агентлагийн дарга нарыг онцолж байгаа билээ. Энэ удаад БСШУСЯ-ны харьяа Биеийн тамирын газрын дарга Ц.Шаравжамц, Соёл урлагийн газрын дарга Г.Эрдэнэбат нарыг онцолж байна.

ТӨРИЙН АЛБАНД АЖИЛЛАСАН ТУРШЛАГАТАЙ ГАВЬЯАТ

Монгол Улсын гавьяат жүжигчин, дуучин Г.Эрдэнэбат БСШУСЯ-ны харьяа, Засгийн газрын хэрэгжүүлэгч агентлаг Соёл урлагийн газрын даргын түр орлон гүйцэтгэгчээр ажиллаж байгаа. Ер нь цаашид жинхлэх болов уу. Жинхэлсэн нь ч дээр. Сүүлийн жилүүдэд төрийн алба гэдэг харьсан бөх, тарсан хамтлагийн орогнох газар боллоо хэмээн шүүмжлэх болсон. Зөв ч шүүмжлэл. Гэхдээ Г.Эрдэнэбат гавьяатыг дуучин байсан гээд яг тэр тарсан хамтлаг гэдэг рүү чихчихэж болохгүй л дээ. Учир нь соёл урлагийн олон байгууллагыг удирдаж явсан туршлагатай удирдагч юм.

Тэгээд ч урлагийн хүн л урлаг соёлын салбарыг илүүтэй ойлгож, өөд нь татаж чадна. Тэгээд хамгийн гол нь удирдаж чадах чадвартай, туршлагатай бол шүү дээ. Тиймдээ ч Г.Эрдэнэбат гавьяатыг жинхэлчихэд нэг их буруудах юмгүй. Цагтаа УДБЭТ-ын дарга байсан.

Соёлын газрын дарга ч байсан. Сүүлдээ ХБК-ийн захирлаар ч ажиллаж байлаа. Ер нь бол мань хүнийг Дуурийн театрт ажиллаж байхад нь л тухайн үеийн сайд А.Цанжид даргаар томилчихсон юм билээ. Түүнээс хойш удирдлагын төвшинд ажиллаж байгаа. Дуурийн дарга байхдаа “Монголын дуурийг дэмжих герман анд нөхдийн холбоо”-той хамтын ажиллагааны хүрээнд  “Богема”, “Увидаст лимбэ”, “Виндзорийн овжин авхай нар” гэсэн гурван дуурь тавьсан байдаг юм билээ. Мөн “Чингис хаан”  дуурийг тавих гэж эр хүний 13 мэхээ хэрэглэж, тэр үед Ерөнхий сайд байсан Н.Энхбаярын ар өврөөр гүйж байж хөрөнгө мөнгө шийдүүлж байсныг нь ч хүмүүс ярьдаг.

Гэх мэтээр УДБЭТ-ын урын санг баяжуулахад багагүй хувь нэмэр оруулсан нэгэн.  Хөгжим бүжгийн коллежийн захирал байхдаа ч уран бүтээлч болохоор тэмүүлж буй хүүхэд залуучууд руу чиглэсэн олон ажил хийсэн. Зарим хамтлаг, дуучдад өөрийнхөө уран бүтээлийг найр тавин өгч, олонд танигдахад нь ч тусалж явсан хүн. Урлагийн хүн уран бүтээлчдийн зовлон, жаргалыг сайн ойлгодогийн жишээ энэ.  Хамгийн гол нь Хөгжим, бүжгийн коллежийг Хөгжмийн их сургууль болгох ажлыг хийсэн хүн. Гэх мэтээр соёл урлагийн салбарт багагүй гавьяатай нэгэн юм.

МАН-ЫН ҮЕД ТОМОРДОГ ТОМИЛОГДОГЧ

Монголд бүх зүйл сонгуулийн дөрвөн жилээр хэмжигдэж байгаа. Нэг нам нь ялахаар л өөрийнхөө хүмүүсийг бүх салбарт аваачиж томилдог жишиг одоо ч байсаар байна. Г.Эрдэнэбат гавьяат муугүй ажилласан ч бас өөгүй хүн биш. МАН-ыг эрх барьж байх үед л гэнэт дуучны микрофоноо даргын суудлаар сольчихсон. Тийм ч олон хүнд тохиогоод байх аз биш. Нам дагаж явсных нь л ач шүү дээ. Гэхдээ мань эр бас зайтай нэгэн.

АН-ын үед ч дарга, захирал байж чадсан. Харин МАН ялаад гараад ирэхээр Соёл урлагийн газрын дарга болоод томроод, томилогдчихлоо. Яах вэ, одоогоор түр орлон гүйцэтгэгч гэгдэж байгаа ч цаашид жинхлэх биз. Тэрбээр эхнэр хүүхний асуудалтай гэгдэж явснаас биш өөрөөр нэг их муугаар дуудуулаад байдаггүй. Зарим хүмүүс ажлаа хийдэггүй мөнгө хөөдөг, ХБК-ийн захирлын ажлыг бараг хийгээгүй. Хувийнхаа ажлыг л амжуулсан энэ тэр гээд л муучлах юм билээ. Гэхдээ яг мөнгө төгрөгний асуудалтай орооцолдоод, АТГ-т дуудагдсаныг нь лав дуулаагүй юм байна.

Ерөнхийдөө гайгүй нэр цэвэр л дээ. Тиймээс цаашид урлаг соёлын салбарыг өөд нь татах олон ажил хийгээсэй билээ. Ядаж үндэсний урлагаа сурталчилж байгаа цорын ганц том байгууллага болох Үндэсний урлагийн их театр гэх сүржин нэртэй, өөрийн гэсэн байргүй театраа орох оронтой болгох тал дээр анхаарч ажиллаасай л гэж хүсэх байна. Одоохондоо бол мань хүн дорвитой ажил хийгээд, сүйдтэй юм болчихоогүй. Зарим нэг цэнгүүн энэ тэр зохион байгуулсан л байж магадгүй юм. Гэхдээ хамгийн гол нь тэр туршлагатай хүн. Тийм болохоор туршлагаа ашиглаад сайн ажиллах болов уу гэж найдаж байна.

САГСАН БӨМБӨГЧӨӨС ДАРГЫН СУУДАЛ РУУ...

Рио-2016 Олимпийн наадам үргэлжилж байхад дотоодод нэгэн сонирхолтой үйл явдал болсон нь Гавьяат тамирчин Ц.Шаравжамц Биеийн тамир, спортын газрын даргын суудалд суусан нь байв. Ёстой л хүмүүсийг гайхшируулсан томилгоо болсон. Яах вэ, зарим нь спорт сайн мэдэх, тамирчдын жаргал, зовлонг ойлгох нэгэн энэ агентлагийг удирдах болсныг сайн хэрэг гэж үзэж байв. Тийм ээ, сагсан бөмбөгийн тамирчид дундаас анх удаа гавьяат цол хүртсэн энэ хүн спортыг ойлгох байх. Тамирчдын жаргал, зовлонг ч мэднэ. Харин түүнд төрд ажилласан туршлага байхгүй.

Хүн удирдаж байсан ч туршлага алга. Дээрээс нь менежмент, зөв бодлого хэрэгтэй. Өнөөдөр манайд спорт ямар хэмжээнд хөгжиж байгаа билээ. Топ дөрөв гэдгээс илүү гараагүй байна. Өвлийн спорт хаягдчихсан. Багийн спорт ч гэсэн тэр. Сүүлийн үед сагсан бөмбөгийн холбоо гайгүй ажилласнаар тамирчдын ур чадвар дээшилж, амжилт ахиж байгааг эс тооцвол шүү дээ. Өвлийн спортын битүү ордонтой болохыг мөрөөдөж хэчнээн ч жил болов. Үр дүнд хүрсэн юм алга. Гэтэл Ц.Шаравжамц дарга ажлаа авснаас хойш олон саяар яригдах ам.долларын зээл авч, спортын төв ордонг шинэчлэх л асуудал ярьж байгаа. Өөр ярьж байгаа юм алга.

Ингэж байх зуур хөрөнгө мөнгөгүйн улмаас Монголд зохион байгуулдаг байсан жүдо бөхийн Улаанбаатарын Гран при тэмцээнээ алдлаа. Уг нь болж байсан бол залуу жүдочид дэлхийн бусад орны шилдэг бөхчүүдтэй барилдаж, ур чадвар нь дээшлэх боломжтой болох байсан юм. Энэ мэтээр хийж хэрэгжүүлэх ажил, шийдэх шаардлагатай зүйл спортын салбарт маш их байна. Биеийн тамир, спортын газрын дарга хүн энэ бүхэнд анхаарч байх ёстой биз дээ.

Гэтэл зээл авч, спорт, урлагийн энтертайнмент төв барина гээд л яриад сууж байна. Уг нь яг хийж чаддаг бол Монголын спортын салбарт хэрэггүй биш, хэрэгтэй. Гэхдээ юуг хамгийн түрүүнд шийдэх ёстой вэ гэдэг сонголт, менежмент чухал. Манайд спортын ордон байхгүй биш байгаа. Буянт-Ухаа спортын ордон гээд сайхан том байшин байж л байна. Ердөө л хол гэж голж байхгүй юу. Ерөнхийдөө нэг иймэрхүү л маягтай байгаа. Яахав, Олимпийн үеэр дарга болсон болохоор хэдэн хүнд шагнал гардуулах боломж олдсон байх. Одоо бол энд тэнд амжилт гаргаад ирсэн тамирчдыг хүлээж авч уулздаг л ажилтай болсон. Өөр юм хийхгүй байна. Дотроо нэгийг бодож, хоёрыг тунгааж яваа нь л хаашаа юм гэхээс. Шинэ спортын ордон, олон сая ам.долларын зээлээс өөр хэрэгтэй юм бодож яваа л бол аятай юу.

ХҮН ЗОДСОН ХЭРЭГТ ХУТГАЛДСАН

МАН-ын гишүүн байсныхаа ачаар даргын суудалд сууж, томилогдогч болж чадсан Ц.Шаравжамц ажлаа авснаас хойш нэг их олигтой юм хийж гавьсангүй. Харин муугаар нэрээ дуудуулж, “од” болж эхэлсэн. Учир нь тэрбээр 67 настай гавьяат тамирчныг хэл амаар доромжилж, зодсон гэж байгаа. Тэрбээр дарга болоод удаагүй байж муухай авир гаргаж, “Би гаргасан шийдвэрээ цуцалдаг нь биш. Яасан их юм ярьдаг юм бэ” хэмээн загнаж, зодсон.

Энэ талаар хохирогч өөрөө “Би энэ хүний гаргасан шийдвэрүүд буруу байна гэж 8-9 удаа албан бичиг явуулсан, нэг ч удаа хариу өгөөгүй. Тэгэхээр нь би яаманд хандсан. Гэтэл яамнаас намайг дуудаж, таны энэ хүсэлтийг нягтлаж үзэхэд зөв байна. Та яамнаас явууллаа гээд даргатай нь очоод уулз гэсэн. Тэгээд би баярлаад дорвитой хариу өгөх юм байна гээд очиж уулзсан. Гэтэл урдаас “Чи муу ямар олон үгтэй, олон юм ярьж явдаг юм бэ.

Би гаргасан шийдвэрээ цуцлахгүй. Тийм хүн биш” гэсэн. Тэгээд би өөрийн чинь гаргасан шийдвэр буруу байна. Өмнөх даргын шийдвэрийг хамаагүй өөрчилж болохгүй. Өөрөө энэ шийдвэр гаргаснаараа олон тамирчны эрх ашгийг зөрчсөн үйлдэл болж байна гэж хэлсэн. Гэтэл урдаас уурлаад, элдвээр хэлж эхэлсэн. Би чи юу ч мэдэхгүй ямар шийдвэр гаргаснаа ч мэддэггүй гэсэн. Гэтэл намайг шууд зодсон. Тэр том биетэй хүн хөгшин хүнийг газар унагааж зодно гэдэг танхайрсан хэрэг биз дээ” хэмээн ярьсан нь бий. Харин БТСГ-аас хэвлэлийнхнийг хэтэрхий нэг талыг барьж, ганц хүний үгээр үг хийлээ хэмээн мэдэгдсэн. Мөн камерын бичлэг байгаа, манай дарга хүн зодоогүй хэмээн мэдэгдэл гаргаад л өнгөрсөн. Ер нь бол спортын салбарынхан, тамирчид түүнд нэлээд дургүйцэж хандаж байгаа. Ажлаа мэдэхгүй, ямар ч хариуцлагагүй хэмээн мэдэгдэж буй. Ийм л хүн Биеийн тамир, спортын газрын дарга болчихоод, том том мөрөөдөл яриад л сууж байна даа.