Теннисний спортын домог болсон тамирчдын нэг Агнешка Радваньскаягийн ярилцлагыг орчуулан хүргэж байна. Тэрбээр өөрийн тухай болон, зодог тайлах эсэх, Мария Шараповагийн эргэн ирж буй талаар сонирхолтой ярилцлага өрнүүлжээ.

Дэлхийн чансааны хоёрдугаарт эрэмбэлэгддэг “Профессор” хочит Агнешка эдүгээг хүртэл 20 удаа ялалт байгуулж байсан  төдийгүй дэлхийн хамгийн ашиг орлоготой тамирчдын нэгд зүй ёсоор багтдаг билээ. Ерөнхийдөө 2006 оноос амжилтынхаа гарааг эхлүүлсэн тамирчин бүсгүй дөрвөн наснаасаа л талбайн теннистэй хувь заяагаа холбосон гэдэг. Тэрбээр 1989 оны гуравдугаар сарын 6-нд Польшийн Краковт Роберт Радваньскийн гэр бүлд  төрсөн, эдүгээ 28 настай. Түүнийг теннисний спортод хөтөлж оруулсан хүн бол аав нь. Аавынхаа заавар зөвлөгөөг дагаж, спортын ертөнцтэй танилцаж,  талбайн теннис тоглож эхэлсэн гэдэг. Түүний дүү Урсула ч гэсэн теннисчин.

2009 онд WTA-ийн хүмүүнлэгийн элч төлөөлөгч болж байсан тэрбээр Краковт аялал жуулчлалын чиглэлээр мөн суралцаж байжээ. 2012 оны Форбес сэтгүүлийн мэдээллээр Агнешка дэлхийн хамгийн үнэтэй тоглогчдын наймдугаарт эрэмбэлэгдэж байв. Харин өнгөрсөн онд дэлхийн хамгийн их ашиг орлого олсон 10 тамирчны тавдугаарт бичигдсэн байсан юм. Талбайн теннисний зүлэг ногоон талбайд тод гялалзаж буй тамирчин бүсгүй сүй тавьсан. Өнгөрсөн онд Бразилын Рио де Жанейро хотноо болсон Зуны олимпийн наадмын дараа түүний сүй тавьсан тухай мэдээлэл тархаж байсан удаатай. Түүний сүйт залуу мөн л нэгэн цагт теннисний талбайд тоглож явсан Дэвид Селт билээ. Хосууд 2016 оны есдүгээр сарын 7-нд сүй тавьжээ. Ингээд ярилцлагыг хүргэе. 

-Агнешка, та бүхэл бүтэн 11 жил дэлхийг тойрон, тэмцээн уралдаанд оролцлоо. Энэ хугацаанд теннисний спортоос уйдсан, залхсан удаа бий юу?

-Мэдээж, хүн бүрт л заримдаа тийм бодол төрдөг. Надад ч бас.  Гэхдээ маш цөөхөн удаа. Олон газраар  явж, ялангуяа маш их тоглосны  дараа бид ядардаг.  Нэлээд олон  жилийн турш аялан тоглосны дараа нэг л амжилтаа  үзүүлсээр байх үед  тийм бодол төрнө. Гэхдээ тэр үед бүх зүйл сайхан болтол зүгээр л хүлээх хэрэгтэй гэж би боддог. Аль болох өөрийгөө амрааж, ямар нэг өөр зүйл хийх гэж оролдох хэрэгтэй. Магадгүй хэд хоногоор амралтад явж,  хэсэгхэн  хугацаанд ч гэсэн цэвэр агаарт гарсны дараа бүх зүйл эргэн хэвэндээ ордог доо.

-Өөр ямар нэг зүйл хийх хэрэгтэй гэж хэллээ. Таны хувьд тийм үед юу хийдэг вэ. Бидэнд сонирхуулаач?

-Юу ч хийдэггүй. Зүгээр л амарч, ямар нэг зүйлийн тухай эргэцүүлж, сайтар унтдаг. Зүгээр л энгийн амьдралын хэв маягтаа дахин  шилжинэ.

-Хэзээ нэгэн цагт теннисний спортоос зодог тайлбал өөрийн тань залгамжлагч хэн байх, хүмүүс өөрийн тань тухай юу гэж ярих бол. Энэ талаар бодож байсан уу?

-Олон жилийн турш шилдэг тамирчдын нэг байж,  олон олон “Их дуулга” тэмцээнүүдэд оролцон, олон сонирхолтой тоглолт үзүүлсэн тамирчин байхыг хүсч байна.

-Зодог тайлсныхаа дараа хийнэ гэсэн ямар нэг төлөвлөгөө бий юу?

-Шуудхан хэлэхэд хэцүү байна.  Гэхдээ бодол бий бий. Би зодог тайлсан ч, теннистэйгээ холбоотой ямар нэг ажил үргэлжлүүлэн  хийнэ гэж боддог. Би домог болсон тамирчидтай тоглох дуртай. “Их дуулга”-ын тэмцээнүүдэд оролцож, тэднийг дахин харахыг хүсдэг.  Магадгүй хэдэн жилийн дараа гэхэд теннисний талбайд илүү олон польш теннисчид гарч ирэх байх. Ер нь  “Гранд Слам”-ыг үзэх нь өөрөө надад  хамгийн сайхан мэдрэмж төрүүлдэг юм. Яагаад гэвэл тэндээс л бүх  хуучны танилууд, хуучны танил төрхүүдийг олж харж чадах учраас тэр. Тэр л надад хангалттай.

-Аялан тоглолт, Их дуулга тэмцээнүүдээс хэний тоглолтыг үздэг вэ?

-Сайхан хувцас өмсч, цохиураа барин гүйж буй бүхий л тамирчдыг үзэх сайхан байдаг. Тодорхой хэн нэгнийг үздэг гэж ойлговол өрөөсгөл болно. Бусад хүмүүс ч гэсэн зөвхөн ганц тамирчинг харах гэж теннис үздэггүй шүү дээ.

-Таны хамгийн том айдас, бас аюул юу вэ?

-Ний нуугүй хэлэхэд, би мэдэхгүй байна. Бүх зүйл миний хяналтад байдаг. Магадгүй эрүүл мэнд байж болох юм. Жилийн турш  яг юу болохыг хэн ч хэлж мэдэхгүй шүү дээ. Тэр утгаар ямар ч сонголтгүйгээр теннисний спортыг орхих вий гэдгээс хамгийн их айдаг. Бүх зүйл буруугаар эргэж, гэмтэж бэртчихвэл хэчнээн сайн тамирчин байсан ч, их спортод эргэн ирж чадахгүй болно. Бэртэл гэмтэл гэдэг бүх тамирчдын хувьд аюул, айдас нь байдаг. Урьдчилан хянаж, зайлсхийх боломжгүй учраас тэр л дээ.

-Мария Шарапова сэргээш хэрэглэсэн гэх үндэслэлээр тэмцээнд оролцох эрхээ хасуулсан. Одоо хоёр сар хүрэхтэй үгүйтэй хугацааны дараа  теннистээ эргэн ирнэ. Та түүний талаар ямар бодолтой байна вэ. Тэр тэмцээнд эргэн ирж чадах болов уу?

-Шуудхан хэлэхэд, би яаж мэдэх билээ. Шарапова их спортдоо эргэн ирэх эсэх нь надад хамаагүй. Миний бодлоор энэ асуултыг өөр хүмүүсээс асуух хэрэгтэй байх. Тэд яаж хүлээж авч байгаа талаар ч юм уу. Миний хувьд  мэдэхгүй байна.

-Тэгэхээр таны хувьд Мария Шарапова эргэж ирсэн ч, ямар нэг зүйл өөрчлөгдөхгүй гэж бодож байгаа байх нь ээ?

-Нэг жил завсарласныхаа дараа теннисний талбайд эргэн ирж байгаа учраас шууд л сайн тоглолт үзүүлж чадна гэж бодохгүй байна. Бас тэр өнгөрсөн удаад мөрөө гэмтээчихсэн. Гэхдээ тоглолтын ритм нь хэвээр байх болов уу. Мэдээж эхний раундад хүчтэй өрсөлдөгчдийн нэг байх болно. Маш сонирхолтой сугалаа болох байх.

-Залуу тамирчдын талаар ямар бодолтой байдаг вэ. Дубайн Теннисний аварга шалгаруулах тэмцээнд хэд хэдэн өсвөр насны тамирчид багтсан байсан?

-Японы Наоми Осака насанд хүрэгчдийн ангилалд өрсөлдөх боломжтой тамирчин. Цохилт нь хүчтэй. Теннис тоглох арга барилаа эзэмшчихсэн. Нэлээд хүчтэй өрсөлдөгчдийн нэг. Беллис байна. Гэхдээ түүний талаар сайн хэлж мэдэхгүй байна. Миний бодлоор тэр ахиад сайн суралцах хэрэгтэй. Ер нь би тэдний тоглолтуудыг аль болох бүтэн үзэхийг хичээдэг.

-Дөнгөж теннист хөл тавьж, тэмцээн уралдаанд оролцож эхэлсэн тэр үеийнхээ талаар яриач?

-Дөнгөж тэмцээн уралдаанд оролцож эхэлсэн эхний нэг, хоёр жилийнхээ талаар би одоо төдийлөн сайн санадаггүй. Ямартай ч, Елена Янковичь дэлхийн номер нэг тамирчин байсныг мэднэ. Тэр үргэлж л мундаг байсан. Бас их яриа. Бараг бүтэн цаг ч ярьж чадна. Түүнийг дэлхийд чансааг тэргүүлж байхад би дөнгөж гарч ирж буй залуу тамирчдын нэг байлаа.