Өмнөговь аймагт тээврийн зургаан жолооч үл мэдэгдэх шингэнд хордож, гурав нь газар дээрээ нас барж, гурав нь аймгийн Бүсийн оношилгоо, эмчилгээний төвийн Эрчимт эмчилгээ, яаралтай туслам­жийн тасагт хүргэгдэн эмч­лүүлж байна. Хохирогчид  Эрдэнэс Таван толгой ХК-ийн тээвэрлэлт  хийдэг Монпорт компанийн жолооч нар  байсан бөгөөд Таван Толгой­гоос 90 км-т байрлах цай­ны газарт  согтууруулах ун­даа хэрэглэснийхээ дараа  цааш хөдөлсөн гэх албан бус мэдээ­лэл байгаа юм. Одоогоор өвч­тө­нүүдийн биеийн байдал харьцан­гуй тогтворжсон байна.

Сүүлийн үед үл мэдэгдэх шингэнийг архитай андуурч хэрэглэн эрүүл мэнд, амь насаараа хохирох явдал удаа дараа гарч буйтай холбоо­той­гоор нэр хаяг тодорхойгүй спир­тийн үнэртэй зүйлийг авч хэ­рэг­лэхгүй, уухгүй байх, ол­ноо­роо болон ганцаараа хаяг шошгогүй зүйл ууж буй хүмүүстэй тааралдвал цаг­даа­гийн байгууллагад мэдээлэх, гэртээ метилийн спирт, этилен­гликоль агуулсан тормозны шингэнд хортой гэсэн шошго нааж, хүүхдээс хол хадгалахыг нийт ард иргэддээ салбар яамнаас анхаарууллаа.

Дашрамд дурьдахад, хүн хордсон байж болзошгүй гэх мэдээллийг авсан даруйдаа ЭМЯ, Хор судлалын салбар зөвлөл, Нийгмийн эрүүл мэндийн үндэсний төвийн мэргэжилтнүүд Өмнөговь аймгийн Эрүүл мэндийн газар, Бүсийн оношилгоо, эмчилгээний төвийн эмч нартай цахим хурал хийж, өвч­төнүүдийн эмчилгээ, оно­шилгоо, хариу арга хэмжээний талаар зөвлөмж өгч, мэргэжил арга­зүйн удирдлага, эмнэлгийн тус­ламж үйлчилгээний бэлэн байд­лыг шуурхай ханган ажил­лаж эхэлжээ. Түүнчлэн, голом­тын цар хүрээг тогтоох, тархвар судалгаа хийх, хүн амд зориулсан мэдээлэл сур­тал­чил­гааны ажлыг зохион байгуу­лахаар хоёр баг ажиллаж байгаа аж.