Улаанбаатарчуудын эрүүл, аюулгүй орчинд сөргөөр нөлөөлж байгаа зүйл бол хог хаягдал. Одоогийн байдлаар нийслэлийн хэмжээнд гурван төвлөрсөн хогийн цэг буй. Тодруулбал, Нарангийн энгэр, Морингийн, Цагаан давааны гэсэн төвлөрсөн гурван хогийн цэгт хогоо төвлөрүүлэн хаяж байгаа билээ.

Тэгвэл Сонгинохайрхан дүүргийн удирдлагууд Ази номхон далайн Эдийн засаг, байгаль орчны судалгааны хүрээлэнгийн тэргүүн Кавасаки Шинжи,  Японы ерөнхий хог хаягдал цуглуулах тээвэрлэлтийн хоршооллын гүйцэтгэх захирал Согү Хироюүки, “MK2” компанийн ТУЗ-ын гишүүн Кавасаки Миюуки нарын Япон улсын төлөөлөгчдийг хүлээн авч уулзаж, Нарангийн энгэрийн хогийн цэгийн нөхцөл байдалтай нь танилцсан байна.

Энэхүү уулзалтын хүрээнд хог боловсруулах үйлдвэр барих тухай санал солилцсон гэнэ. Учир нь Нарангийн энгэрийн хогийн цэг нийслэлийн Сонгинохайрхан дүүргийн 26 дугаар хороонд байрладаг юм. Тус хогийн цэгт нийслэлийн хог хаягдлын 60 хувь нь төвлөрдөг аж. Мөн энэ үеэр нийслэлийн хэмжээнд 2009 онд 308 мянга 439 тонн хог хаягдал гардаг байсан бол энэ тоо гурав дахин ихэссэн гэдгийг албаныхан онцолсон юм. Өөрөөр хэлбэл, 2016 онд 988 мянга 390 тонн болж өссөн байна. Үүнтэй холбогдуулан хог боловсруулах үйлдвэр барих зайлшгүй шаардлага байгаа юм байна.