Жил бүрийн хавар их, дээд сургуулийн төгсөгчид хонхны баяр тэмдэглэдэг уламжлалтай. Тэгвэл сүүлийн жилүүдэд хонхны баяраар оюутан, залуус согтууруулах ундааны зүйлийг хэтрүүлэн хэрэглэж, улмаар амиа алдах, гэмт хэрэгт холбогдох зэрэг тохиолдол ихэссэн.

Өнгөрсөн бямба гарагт гэхэд хонхны баяраа тэмдэглэж явсан ИЗИС-ийн оюутан учир битүүлгээр амь насаа алдсан харамсалтай хэрэг гарсан. Талийгаач өмнөх өдөр нь хонхны баяраа тэмдэглэчихээд ангийнхантайгаа амралтад очоод амиа алдсан байна. Одоогийн байдлаар задлан шинжилгээний хариу гараагүй бөгөөд ямар хүчин зүйлээс болж, амиа алдсан нь тодорхойгүй байгаа юм.

Тэгвэл төгсөлтийн баярын арга хэмжээг нүсэр тэмдэглэхийг хориглосон тушаал гаржээ. Тухайлбал, 5, 9, 12 дугаар анги төгсөгчдийн дунд эрдмийн баяр хийхдээ нийслэлийн ногоон бүсэд аялал зугаалга хийхгүй байх, эцэг эх сурагчдаас нэгдсэн байдлаар мөнгө хураахгүй байх чиглэлийг нийслэлийн Боловсролын газраас нийслэлийн дүүргүүдийн Боловсролын хэлтэс, ЕБС-ийн захирлуудад хүргүүлсэн байна.

Хүүхдийг осол гэмтэл, гэмт хэрэг зөрчлөөс урьдчилан сэргийлэх зорилгоор баярын арга хэмжээг хөдөө хээр, амралт зуслан, жуулчны бааз, зочид буудал, цэнгээний газруудад зохион байгуулахгүй байх, архи, согтууруулах ундаа хэрэглүүлэхгүй байх, сурагчдаас зохион байгуулалттайгаар мөнгө хурааж авахгүй байх, эцэг эх, асран хамгаалагч, сурагчдад хүндрэл учруулахгүйгээр зохион байгуулж, нэгдсэн удирдлагаар хангаж, үйл ажиллагаанд хяналт тавьж ажиллахыг нийслэлийн Боловсролыг газраас сургуулиудад үүрэг болгожээ.