Монголчуудыг амралтын өдрүүдэд цэнхэр дэлгэцийн өмнө уяж чаддаг "Яг түүн шиг шоу" хоёр дахь жилдээ зохион байгуулагдаж байна. Эхний удаагийн дугаарт нүүр хувиргалт, тайз засалт зэрэг нь бага зэрэг учир дутагдалтай байсан ч энэ удаагийн дугаарт илүү чанартай, чансаатай болж чадсан билээ. ОХУ-аас мэргэжлийн нүүр хувиргагчид ирж, улмаар шоунд оролцогчдыг зарим тохиолдолд танигдахын аргагүй болгон өөрчилж буй.

Энэ жилийн дугаарт дандаа шижигнэсэн залуус оролцож байгаа юм. Нөгөө талаар өмнөх дугаарт шүүгч хийж байсан дуучин, аялагч Г.Ганхүү оролцогч болж, 60-аад оныхны төлөөлөл болон шоунд оролцохоо мэдэгдсэн нь шоуг илүү сонирхолтой болгож чадсан. Тэгвэл өнөө жилийн дугаарт оролцогчид тун ширүүн өрсөлдөж, тэр хэрээр үзэгчдийг татаж чадаж байгаа юм. Тэр дундаа энэ шоуг жинхэнэ шоу шүү гэдгийг мэдрүүлж буй хоёр хүчтэй өрсөлдөгч байгаа нь “Х түц” продакшны жүжигчин Т.Бархүү, дуучин С.Гантогоо нар.

Т.Бархүү нэвтрүүлэг эхэлсэн цагаас л дүрийн хувиргалт, жүжиглэлт, дуулах чадвараар бусдыгаа хол хаяж байна. Эхний дугаарт дуучин, СТА Т.Дэлгэрмөрөнг дуурайж, нэгдүгээр дугаарын ялагч болж байсан бол өчигдөр Bee Gees хамтлагийн дуучин Барри Гибб-ийг дуурайж мөн л ялагч болж, гурван сая төгрөг, ивээн тэтгэчдийн шагналын эзэн боллоо. Түүний хувьд хүчтэй өрсөлдөгч болж байсан Г.Ганхүү хүртэл 2017 оны Грэммийн шагнал гардуулах ёслолд дэлхийн алдарт уран бүтээлчид Bee Gees хамтлагийн дурсгалыг хүндэтгэн, дууг нь дуулсан ч Т.Бархүүг хэн нь ч гүйцэж чадаагүй гэдгийг ам бардам хэлж, өөрийн гурван оноогоо түүнд өгснөөр эн тэнцүүхэн өрсөлдөөнөөс Т.Бархүү илүүрхэж ялагч боллоо.  “Х түц” продакшны жүжигчин Н.Онон, шүүгч Т.Наранзун нар “Т.Бархүү дүүгээ шүтэж амьдарна аа” хэмээн гайхширч суулаа.

Тэр ч байтугай цахим ертөнцөд “Т.Бархүүг барах уу” гэх шог яриа хүртэл гараад амжжээ.  Т.Бархүүг өнөөдрийг хүртэл Одноо гавьяатын нөмөр нөөлгөөр гайгүй кино, жүжгийн гол дүрийг авдаг хэмээн үл ойшоож ирсэн хүмүүс олон бий. Гэвч гавьяатын нөмөрт яваагүй юм шүү гэдгээ энэхүү шоунд оролцсоноор баталж өглөө. МУГЖ И.Одончимэг өнөөдөр өглөө Барри гибб-ийн хувцас өмссөн Т.Бархүүгийн зургийг цахим хуудсандаа оруулж “Ханиараа бахархаж байна” хэмээн сэтгэгдэл үлдээжээ.

Анх харахдаа л энэ залуу үнэхээр чин сэтгэлээсээ асуудалд ханддаг, мундаг сэтгэлтэй жүжигчин болно доо хэмээн бодож сууснаа ч хэвлэлд өгсөн ярилцлагадаа онцолсон байдаг. Тэгвэл хоёр дугаарын ялагч болоод буй Т.Бархүү өөрийн фэйсбүүк хуудсандаа “Баярлалаа их хичээлээ. Та бүхнийхээ итгэлийг алдахгүйн тулд улам илүү хичээх болно оо.  Намайг дэмжиж байгаа та бүхэндээ бүгдэд нь маш их баярлалаа. Мөн надтай хамт ах дүү Gibb болсон Баясаа, Отгонтөгс хоёртоо бас хөгжимчиддөө баярлалаа. Нүүр хувиргалт, тайзныхандаа, дууныханд, операторууд, найруулагчын баг хамт олонд бүгдэнд нь аз жаргалыг хүсье” хэмээжээ.