Ирэх дөрвөн жилд Монголын ард түмэн бүсээ чангална. Цалин хөлс, санхүүгээс гадна хөдөлмөрийн чадвараараа ч бүсээ чангалж, улам л хичээх шаардлагатай болж буй тухай өдөр бүр хэвлэл мэдээллийн хэрэгслээр ярих болсон билээ. Учир нь Монгол Улсын Засгийн газар ОУВС-ийн өртгөсөн хөтөлбөрт хамрагдсанаар хүүхдийн мөнгийг бүлэгт үргэлжлүүлэн олгоно, цалинг ирэх дөрвөн жилд нэмэхгүй, шатахууны онцгой албан татварын өмнөх бууруулалтыг буцаах, хувь хүний орлогын албан татварыг шатлалтайгаар нэмэгдүүлэх, НДШ, ЭМДын шимтгэлийг  2018 оноос  тус бүр нэг хувиар нэмэгдүүлэх зэрэг долоон төрлийн татварыг нэмэгдүүлнэ.

 

Тэр бүү хэл  тэтгэврийн насыг нэмэх шийдвэр гаргасан. Тодруулбал, тэтгэврийн насыг 2027 он гэхэд 60, 65 болгох юм. Тэгвэл Засгийн газраас гаргасан энэхүү шийдвэрийг иргэд эсэргүүцэж, Сүхбаатарын талбайд жагслаа. Энэхүү жагсаалыг Олон улсын хөдөлмөрчдийн эв санааны өдрийг тохиолдуулан МҮЭ-ийн холбооноос зохион байгуулсан бөгөөд 21 аймгийн төв талбайд 12-16 цагийн хооронд тайван жагсаал болж буй талаар жагсаалд оролцогчид онцлов. Жагсаалд оролцогчид Засгийн газраас долоон төрлийн татвар, нийгмийн даатгалын шимтгэлийг нэмэгдүүлэх, тэтгэврийн насыг нэмэгдүүлэх шийдвэрийг эсэргүүцэж буйгаа илэрхийлэн  “Эрх ашгаа хамгаалъя” тайван жагсаал хийсэн юм.

 

Тэд энэ үеэр тэтгэврийн насыг нэмэгдүүлснээр уул уурхай, төмөр зам, авто зам зэрэг салбарын хүнд нөхцөлд ажилладаг иргэдийн эрүүл мэндэд сөрөг нөлөөтэй гэдгийг хэлж байлаа. Жагсаалыг нээж, МҮЭХ-ны ерөнхийлөгч Х.Амгаланбаатар “Засгийн  газар 2017 оны нэгдүгээр сард байгуулсан Хөдөлмөр, нийгмийн зөвшлийн улсын гурван талт хэлэлцээрийн заалтыг зөрчиж энэхүү цуглааныг зохион байгуулах нөхцлийг бий болгосон. 

 

Засгийн газар ОУВС-тай хамтарч эдийн засгийн хүндрэлээс гарахын тулд өргөтгөсөн санхүүжилтын хөтөлбөрийг хэрэгжүүлэхдээ нийгмийн даатгалын шимтгэлийг нэмэгдүүлэх, долоон төрлийн татварыг нэмэх, тэтгэврийн насыг үе шаттайгаар нэмэгдүүлэх зэрэг олон чухал заалтуудыг зөрчиж ОУВС-тай урьдчилсан тохиролцоо хийж, УИХ-д өргөн барьж 2017 оны төсвийн тодотголыг олны хүчээр хүч түрэн батлуулж чадсан. Иймд МҮЭХ Монгол Улсын Засгийн газраас гурван сарын өмнө байгуулсан хэлэлцээрээ биелүүлэхийг шаардаж байна.

 

Ард иргэдийнхээ амьдралыг доройтуулан байж ОУВС-тай хамтрах шаардлагагүй гэж үзэж байна. Иймд УИХ, Засгийн газарт ОУВС-тай хамтарч эдийн засгийн хүндрэлээс гарахын тулд өргөтгөсөн санхүүжилтын хөтөлбөрөө эргэн  харах шаардлагыг хүргүүлнэ” гэв. Түүнчлэн жагсаалд оролцогчид “250 хоног ар гэрээсээ хол хүнд хортой нөхцөлд илүү цагаар ажилладаг”, “Идэж уух нь дутаад ирэхээр эдийн засгаа үүрч яваа ажилчдынхаа халаасыг хоослох боловсон дээрмийг эсэргүүцэж байна”, “Эрчим хүчний салбарын ажилтан бид татвар нэмэхийг эсэргүүцэж байна” “УИХ-аас гаргасан шийдвэрээ буцаахгүй бол бид тэмцлийн хурц хэлбэрийг сонгоно” зэрэг уриа лоозон барьж, эрх ашгаа хамгаалж байлаа. Энэ үеэр Хөдөлмөр, нийгмийн хамгааллын сайд Н.Номтойбаяр жагсаалд оролцож, өөрийн байр суурийг илэрхийлсэн юм.

 

Тэрбээр “Хуримтлал хадгаламж гэдэг үг мөрөөдөл болсон нь үнэн. Хоёрдугаарт тэтгэврийн насыг шатлалтай нэмэх зайлшгүй шаардлага гарсан. Энэ бүхнийг хувь хүнд өгөөжтэй байх үүднээс эдийн засгийн арга замаар энэ намрын чуулганаар шийдье гэж байгаа юм. Хуульд заасан тэтгэврийн нас, түүнээс хойш тэтгэврээ тогтоолгоход өндөр хувиар тогтоогддог байх, хийж байсан ажил мэргэжлээс нь шалтгаалж тогтоодог байх, хөдөлгөөнт хөдөлмөр эрхэлж байсан оффисын ажил эрхэлж байсан хүмүүсийн тэтгэврийг заагтай тогтоодог байх ажлуудыг хийхээр ажиллаж байна.

 

Засгийн газар байгуулагдснаас хойш 56 орчим тэрбум төгрөгийн тэтгэвэр даатгалтай холбоотой өрийг илрүүлсэн. Та бүхэнд загнуулах зүйл хийсэн гэдгээ сайн ойлгож байна. Хамгийн гол нь соёлтой шаардахыг хүсье. Орилж хашгирахаас илүүтэй хамтдаа шийдэх гарц гаргалгааг олъё. Түүнээс биш энэ жагсаалыг үймүүлэх хэрэггүй юм шүү. Та нарын бухимдалтай байгааг ойлгож байна. Амьдралд нь болж бүтэхгүй байгаа бүхэн та бүхнийг өнөөдөр Сүхбаатарын талбайд хөтөлж авчирсныг маш сайн ойлгож байна.

 

Тиймээс гурван талт хамтын хэлэлцээрээр асуудлыг шийдвэрлэхээс өөр гарц гэж байхгүй ээ. Жагсаал цуглаанаас үүдэлтэй шаардлагыг би гардаж авна. Тиймээс нөгөөдөр өглөө яаманд дээр 09.00 цагаас МҮЭ-ийн ерөнхийлөгчийг та бүгдийн төлөөлөл болгож хамтдаа ширээний ард сууж асуудлаа хэрхэн шийдвэрлэх талаар ярилцъя. Ажил хэрэгч байдлаар тулгамдаж байгаа асуудлыг хамтдаа шийдвэрлэхийг хүсье” гэв. Мөн жагсаалд оролцогчид салбарын сайдаа уул уурхайн ажилчдын нэг өдөртэй танилцахыг урьсан юм.