Италийн эрх баригч Ардчилсан нам өнгөрсөн сарын 30-нд  дотооддоо намын даргын сонгууль явуулж, нийт намын гишүүдийн саналаар Маттео Ренциг дахин сонгожээ. 

 

Тус улсад 2018 оны тавдугаар сарын 20-нд бүх нийтийн сонгууль болно. Улмаар энэ сонгуульд Ерөнхий сайд асан Маттео Ренци Ардчилсан намыг удирдан оролцохоор болж байна. Харин Ардчилсан нам олонх болсон тохиолдолд тэрбээр дахин Ерөнхий сайдын үүрэг гүйцэтгэхээр болж байгаа юм. 

 

Италийн эрх баригч Ардчилсан намын даргын сонгуульд эдүгээ 48 настай Хууль зүйн сайд Андреа Орландо, 57 настай мужийн захирагч Мишель Эмилиано нар өрсөлджээ. Ингээд санал хураалтын дүн гарахад, намын гишүүдийн 70 орчим хувь нь М.Ренцид итгэл хүлээлгэсэн байна. Үүний дараа  тэрбээр ялалтаа зарлаж,  “Шинэ түүх эхэллээ”  гэжээ. 

 

Намын даргын сонгуульд тодорхой шалгуурыг хангасан намын гишүүн бус хүн санал өгөхийг зөвшөөрдөг бөгөөд энэ удаад ойролцоогоор хоёр сая орчим хүн саналаа өгчээ. 

 

Энэ үйл явдлаас таван сарын өмнө Маттео Ренци Ерөнхий сайдын суудлаасаа бууж байсан юм. Тэрбээр 1948 онд батлагдсан Үндсэн хуулийг шинэчлэх санаачилга гаргаж, бүх нийтийн санал асуулга явуулсан байдаг. Санал асуулгын мөн нэг чухал хүчин зүйл нь цаашид М.Ренци Ерөнхий сайдын үүрэг гүйцэтгэх эсэхийг шийдвэрлэх байв.  

 

Өөрөөр хэлбэл, санал асуулгаар иргэдийн ихэнх нь Үндсэн хуулийг шинэчлэх шаардлагатай гэж үзвэл Италийн парламентын дээд танхим болох Сенатыг өөрчилж, одоогийн 315 суудлыг 100 болгон бууруулж, хууль батлах эрх мэдлийг зөвлөх, санал гаргах хэмжээнд хүртэл хязгаарлаж нэг танхимаар хууль баталдаг системтэй болох байсан.  Харин “Үгүй” гэсэн санал давамгайлбал Ерөнхий сайд Маттео Ренци албан тушаалаасаа огцрох байв. Гэвч, иргэдийн 60 орчим хувь нь “Үгүй”, үлдсэн 40 хувь нь “тийм” гэсэн хариултыг сонгосон юм. Иймээс сонгуулийн үр дүн нэгэнт ойлгомжтой болмогц Италийн Ерөнхий сайд Ром хотод хэвлэлийн хурал зарлаж, ялагдлаа хүлээн зөвшөөрсний зэрэгцээ хариуцлагаа хүлээн албан тушаалаасаа огцорч буйгаа зарласан байдаг.

 

Тэрбээр энэ үеэр “Засгийн газар дахь миний үүрэг хариуцлага үүгээр дууслаа” гэж хэлж байсныг тухайн үед орон нутгийн хэвлэлд мэдээлж байсан билээ. 

 

Тэгвэл тэрхүү үйл явдлаас таван сарын дараа Ерөнхий сайд асан Маттео Ренци “Шинэ түүх эхэллээ” хэмээн ялалтаа зарлаж, Ардчилсан намыг ирэх сонгуульд удирдан оролцохоо мэдэгдэв. Цаашлаад ирэх оны сонгуульд түүний нам ялалт байгуулсан тохиолдолд дахин Ерөнхий сайд болж магадгүй нь.