Монгол Улсын Ерөнхийлөгчийн сонгуульд нэр дэвшигчийг албан ёсоор тодруулах хугацаа энэ сарын 7-нд дууссан. Улс төрийн намууд хуулийн хугацаандаа амжиж нэр дэвшигчдээ тодруулсан бөгөөд парламентад суудалтай улс төрийн гурван намаас УИХ-ын гишүүн асан Х.Баттулга /АН/, УИХ-ын дарга М.Энхболд /МАН/, Монгол Улсын Ерөнхийлөгч асан Н.Энхбаяр /МАХН/ тус тус нэр дэвших нь тодорхой болсон юм.

Өнгөрөгч даваа гарагт тэдэнд Улсын хоёрдугаар төв эмнэлгийн нарийн мэргэжлийн эмч нар 20 гаруй төрлийн үзлэг, шинжилгээ хийж ямар нэг суурь болон халдварт өвчингүй гэдгийг тогтоосон билээ. Тэгвэл Ерөнхийлөгчид нэр дэвшигчид маргааш СЕХ-нд нэрсээ бүртгүүлэх юм байна.

Тодруулбал, гурван нам ярилцаад нэр дэвшигчээ бүртгүүлэх цагаа тохирсон аж. МАН-ынхан нэр дэвшигч М.Энхболдыг 09.50 цагт бүртгүүлэх бол МАХН-ынхан нэр дэвшигч Н.Энхбаярыг 11.30 цагт, харин АН-ынхан 12.30 цагт буюу морин цагтаа амжиж нэр дэвшигч Х.Баттулгыг тус тус бүртгүүлэхээр тохирсон байна. Хуульд зааснаар энэ сарын 13 гэхэд намууд Ерөнхийлөгчид нэр дэвшигчээ СЕХ-нд бүртгүүлэх бөгөөд хэрвээ нэр дэвшигчийг бүртгэхгүй гэвэл 17-ноос өмнө дахин өөр хүний нэр оруулж ирэх боломжтой байдаг юм.