БНСУ-ын Ерөнхийлөгчийн сонгууль болж, Ардчилсан намын тэргүүн Мүн Жэ Ин ялалт байгууллаа. Тэрбээр сонгогчдын 41.1 хувийн санал авч тэргүүлсэн юм. Сонгуулийн дүн нэгэнт гарсны дараа “Ард түмний Ерөнхийлөгч байх болно” хэмээн амласан БНСУ-ын шинэхэн Ерөнхийлөгчийн тухай найман баримтыг хүргэж байна. 

 

1. Мүн Жэ Ины эцэг Хойд Солонгосын дүрвэгч байжээ

 

Мүн Жэ Ин 1953 оны арванхоёрдугаар сарын 22-нд Өмнөд Солонгос улсын Коджедо аралд  таван хүүхэдтэй айлын ууган хүү болон мэндэлжээ. Түүний эцгийг Мүн Ён Хюн, харин ээжийг нь Кан Хан Ок гэдэг бөгөөд тэд 1950 онд Солонгосын хойг дайны хөлд нэрвэгдэх үед БНАСАУ-ын Өмнөд Хамгён аймгаас АНУ-ын “MEREDITH VICTORY” гэх ачааны хөлөг онгоцонд сууж, Коджедо арал руу дүрвэн ирсэн цагаачдын нэг байсан гэдэг.

 

2. Тэрбээр ядуу тарчиг гэр бүлд өсч өндийсөн

 

Удалгүй тэднийх Бусан хот руу нүүдэллэж, тэнд Жэ Ин “Кюннам” ахлам сургуульд суралцжээ. Мүн Ён Хюных туйлын ядуу зүдүү амьдралтай байсан гэдэг.  “Хангёл” сонинд бичсэнээр, эрдэнэ шишийн үрийг үдийн хоолондоо зооглодог байсан бөгөөд түүгээрээ бүтэн өдрөө даадаг байсан гэнэ. Үүгээр зогсохгүй сарын төлбөрөө төлөөгүй гэх шалтгаанаар хичээлийн танхимаасаа хөөгдөж байсан удаатай аж. Жэ Ин ахлах сургуулиа төгссөний дараа “Кюнхэ” их сургуульд хуулийн чиглэлээр дэвшин суралцсан байна.

 

3. Пак Гын Хегийн эцэг БНСУ-ын Ерөнхийлөгч байхад баривчлагджээ

 

1975 онд Их сургуульд хуулийн чиглэлээр суралцаж байсан Мүн Жэ Ин  Ерөнхийлөгчийн засаглалын эсрэг Ардчилсан хөдөлгөөнд оролцсон гэх шалтгаанаар баривчлагдан хоригдож байжээ. Тухайн үед БНСУ-ын Ерөнхийлөгчөөр эдүгээ хэд хэдэн хэрэгт буруутгагдан хоригдож буй экс Ерөнхийлөгч Пак Гын Хегийн эцэг Пак Чун Хе ажилладаг байв. Пак Чун Хег дарангуйлагч байсан гэж тодорхойлох нэгэн байдаг ч, БНСУ-ын өнөөгийн хөгжлийн эхлэлийг тавьсан гэж үнэлэх хүмүүс олон байдаг юм. 

 

4. Мүн Ерөнхийлөгч асан Ну Мү Хёны найз юм

 

Үүний дараа 1982 онд тухайн үед өмгөөлөгч байсан Ну Мү Хёньтой хамтран хуулийн компаниа байгуулж байсан гэдэг. 2002 оны арванхоёрдугаар сард түүний хамтран зүтгэгч Ну Мү Хён Ерөнхийлөгчийн сонгуульд нэр дэвшиж, Жэ Ин Бусан дахь сонгуулийнх нь штабын даргаар ажиллаж байсан гэнэ. Харин Ну Мү Хён 2003 онд БНСУ-ын 16 дахь Ерөнхийлөгчөөр сонгогдсны дараа Мүн Ерөнхийлөгчийн тамгын газарт орж ажилласан байна. Харин 2009 онд Ну гэрийнхээ хойд талын ууланд очиж, амиа егүүтгэн нас барсаны дараа  Мүн Жэ Ин хамтран зүтгэгчээ эцсийн замд нь үдэн, оршуулгын ёслолыг удирдаж байжээ.

 

5. 2012 онд Ардчилсан намаа байгууллаа

 

2011 оны есдүгээр сард “Инноваци ба хамтын ажиллагаа” компанийг үүсгэн байгуулж, төлөөлөгчөөр нь ажиллах болсон. Дараа жил нь буюу 2012 оны дөрөвдүгээр сард 19 дахь удаагийн бүх нийтийн сонгуулиар “Ардчилал эв нэгдлийн нам”-ыг үүсгэн байгуулж, нэр дэвшсэн байна. 

 

6. Пак Гын Хетэй өрсөлдөөд өвдөг шороодож байв

 

Ингээд 2012 оны арванхоёрдугаар сарын 19-нд Ерөнхийлөгчийн сонгууль болоход Сэнүри намаас нэр дэвшигч Пак Гын Хетэй өрсөлдөн ялагдаж байжээ.

 

7. Тэр хоёр хүүхэдтэй

 

Мүүн Жэ Ин гэрлэсэн, хоёр хүүхэдтэй.  Ромын католик шашинтай гэнэ.

 

8. “Хойд Солонгост айлчилна”

 

Энэ бол түүний сонгуулийн кампанитынхаа үеэр өгсөн амлалт. Тэрбээр БНСУ-ын Ерөнхийлөгчөөр сонгогдсон тохиолдолд хамгийн түрүүнд Умард Солонгост айлчилна хэмээн амлаж байлаа.