Өчигдөр хуралдсан Нийгмийн бодлого, боловсрол соёл шинжлэх ухааны байнгын хорооны хуралдаанаар таван асуудлыг хэлэлцэв. Хуралдааны эхэнд Эдийн засаг, нийгмийг 2016 онд хөгжүүлэх үндсэн чиглэлийн биелэлтийг хэлэлцэж, тус байнгын хорооны харьяалагдах Боловсрол, Эрүүл мэнд, Хөдөлмөр нийгмийн хамгааллын яамны Үндсэн чиглэлд тусгасан арга хэмжээний хэрэгжилтийн дүн мэдээ, аудитын тайланг тус тус хэлэлцлээ. Эдгээр гурван яамны үндсэн чиглэлийн биелэлт 67.9 хувьтай гарчээ. Гэсэн ч улс орны хэмжээнд хүүхдийн өвчлөл, эндэгдэл их, сургууль цэцэрлэгийн хүрэлцээ хангамж муу байхад Үндсэн чиглэлийн биелэлт өндөр байгааг Л.Энх-Амгалан гишүүн шүүмжилж байлаа. Тэрбээр, “Улсын хэмжээнд улаанбурхан өвчний дэгдэлт гарч, шуурхай арга хэмжээ авч чадаагүйгээс 80 гаруй хүүхэд амиа алдсан. Эхийн эндэгдлийн төвшингээр манай улс дээгүүрт бичигдэж байна. Өнгөрсөн онд 38 эх эндсэн байна. Нас барсан 10 гаруй мянган хүний нэрээр тэтгэвэр авч байсан, боловсролын салбарт олон зуун аж ахуйн нэгжийг хохироосон тендерийн асуудал гарсан гээд ярьвал олон зүйл байна. Ийм байтал Үндсэн чиглэлийн биелэлт нь өндөр, Үндэсний аудитын газрын дүгнэлт ч бөөрөнхий. Цаашдаа ингэж явж болохгүй гэж бодож байна” гэв. Мөн Их дээд сургуулиудыг нүүлгэх тухайд ямар нэг шийдэл гарсан эсэхийг Д.Гантулга гишүүн тодруулсан юм. Салбарын сайд энэ талаар олон жил ярьсан ч дэргэдээ лаборатори, шинжлэх ухааны төвтэй ШУТИС, ЭМШУИС зэрэг сургуулиудыг нүүлгэн шилжүүлэх боломжгүй, нөгөө талаар 100 гаруй мянган оюутан, олон мянган багш, ажилтнуудын сурч, ажиллаж, амьдрах нөхцөлийг бүрдүүлэхэд маш их хөрөнгө, мөн цаг хугацаа шаардлагатай гэсэн хариулт өглөө. Хуралдаанаар уг асуудлыг хэлэлцэж дэмжсэний дараа хүүхдийг эхийн сүүгээр хооллохыг дэмжиж, шаардлагатай үед нэмэлт тэжээл сүү өглөө гэхэд шаардлага хангасан байх асуудлыг хуульчилсан Нялх балчир хүүхдийн хоол хүнсний тухай хуулийн төслийн эцсийн хэлэлцүүлгийг хийн, чуулганы хуралдаанд шилжүүлэв. Мөн хуралдаанаар Эрүүл мэндийн салбарын бодлого, эрүүл мэндийн тухай хууль, тогтоомжийг боловсронгуй болгох, цаашид авч хэрэгжүүлэх арга хэмжээний тухай Байнгын хорооны тогтоолын төслийг гишүүдийн олонхи дэмжлээ.

М.Оюунчимэг: Сайд та худлаа яриад байна

Энэ өдрийн хуралдааны үндсэн сэдэв боловсролын салбарыг чиглэж байсан гэхэд болно. Тодруулбал, Боловсролын тухай хууль, Боловсролын үнэлгээний төв, Боловсролын хүрээлэнгийн үйл ажиллагаатай танилцаж, цаашид авч хэрэгжүүлэх арга хэмжээний талаар санал, шийдвэрийн төсөл боловсруулж, Байнгын хороонд танилцуулах үүрэг бүхий ажлын хэсгийн тайлан нэлээд анхаарал татаж байлаа. Тайлангийн талаар тус ажлын хэсгийн ахлагч, УИХ-ын гишүүн М.Оюунчимэг танилцуулсан юм.  Ажлын хэсэг Боловсролын хүрээлэн, Боловсролын үнэлгээний төв, олон улсын хөтөлбөрийн сургалттай “Монгол тэмүүлэл” сургууль, Физик-математикийн гүнзгийрүүлсэн сургалттай 11 дүгээр сургууль, “Орчлон” олон улсын дунд сургууль, харааны бэрхшээлтэй хүүхдийн 29, 116 дугаар сургууль, Сүхбаатар дүүргийн 71 дүгээр дунд сургуулиудын үйл ажиллагаатай газар дээр нь танилцан, боловсролын салбарын хууль тогтоомжийн болон “Үдийн цай” хөтөлбөрийн хэрэгжилт, тулгамдаж буй асуудал, цаашид авах арга хэмжээний талаар санал бодлыг нь сонсчээ. Энэ үеэр УИХ-ын гишүүн М.Билэгт их, дээд сургуулийн төлбөр өндөр байгааг шүүмжиллээ. Тэрбээр “Мөнгөтэй нь их, дээд сургуульд ордог боллоо” гэсэн шүүмжлэлд Ж.Батсуурь сайд “Их, дээд сургуулийг төлбөргүй болгох боломж нөхцөл бий. Гэхдээ төлбөргүй болговол төсвөөс санхүүжүүлэх шаардлага гарах байх. Гэтэл санхүү эдийн засгийн хувьд боломж тааруухан байна” гэсэн хариулт өглөө. Мөн УИХ-ын гишүүн Л.Энх-Амгалан “Өнөөдөр иргэд бага, дунд боловсролын шинэчлэлийг хүлээж байгаа. Түүнээс ганц нэг сургуулийн барилга, үдийн цай хөтөлбөр гэдэг бол хоёрдогч асуудал гэж бодож байна. Бага, дунд боловсролыг шинэчлэхийн тулд багш нартайгаа ажиллах ёстой. Боловсролын салбарт 45 мянган багш, сурган хүмүүжүүлэгч байдаг. Тэдний хөдөлмөрийн үнэлэмж бусад салбарынхаас үнэхээр доогуур. Тэгэхээр Монгол Улс багш бэлтгэх тогтолцоогоо эргэж харах ёстой” гэсэн юм.  Мөн ажлын хэсгийг ахалсан УИХ-ын гишүүн М.Оюунчимэг “Сайд өөрөө худлаа яриад байх юм. Хотын боловсролын газартай нягт хамтарч ажиллаж байгаа гэдэгтэй санал нийлэхгүй байна. Та хүчээ авч, байдал хурцдаж байхад 29 дүгээр сургуулийн захирлыг сольсон. Монгол хүүхэд өөрсдөө их авъяастай. Дэлхийн олимпиадад оролцоод медаль авсан хүүхдүүдийг дэлхийн томоохон сургуулиудад үнэгүй сургах эрхийг төр өөрөө хангах ёстой. Гэтэл өнөөдөр мөнгөний асуудал тулгамдсан гээд байдаг. Мөн шилдэг эрдэмтэн багш нарынхаа зөвлөгөөг ч сонсох хэрэгтэй” гэх мэтээр хэлэлцүүлэг өрнөлөө. Хуралдааны үеэр УИХ-ын гишүүн Н.Учрал Багшийг хөгжлийг чухалчилж, бие даасан хуультай болох тухай санал гаргалаа. Тэрбээр, ард түмний хүүхдүүдийг сурган хүмүүжүүлэгч багш нар төрийн үйлчилгээний ажилчидтай адилхан цалин авч байгааг шүүмжлээд, бие даасан хууль гарвал багш нарт тулгардаг асуудлыг шийдэж болно гэж үзэж байгаа учраас гишүүдийг дэмжихийг уриаллаа.
“Залуусыг хөгжүүлэх ажлыг хэвлэл мэдээлэл хийнэ”

Энэ өдрийн хуралдаанаар хэлэлцсэн Залуучуудын хөгжлийг дэмжих хуулийн төсөлд энэ санааг тусгаж өгчээ. Тодруулбал, УИХ-ын гишүүн Н.Учрал энэхүү хуулийн төслийн ажлын хэсгийг ахалсан бөгөөд ажлын хэсгээс ийм санал гарсан аж. Уг хуульд залуучуудыг түүх, соёлоо мэддэг, эх оронч үзэлтэй, бие дааж амьдрах чадвартай, хариуцлагатай иргэн болж төлөвшихөд чиглэсэн амьдрах ухааны чадварыг эзэмшүүлэх хөтөлбөрийн дагуу цэргийн мэргэжил олгох сургалтад 18-27 насны залуучуудыг хамруулахаар мөн 18-27 насны эмэгтэйчүүд сайн дурын үндсэн дээр хамрагдаж болохоор тусгасан байна. Мөн залуучуудын хөгжлийг дэмжсэн хөтөлбөрийг хэвлэл, мэдээллийн байгууллагын мэдээллийн агуулга, хөтөлбөрт тусгах, түүнийг зохицуулах журмыг Засгийн газар тогтоохоор оруулсан байх аж.  Өөрөөр хэлбэл, залуусыг хөгжүүлэх асуудлаар хэвлэл мэдээлэлд Засгийн газар чиглэл өгнө гэсэн үг. Нөгөө талаар цэргийн мэргэжил олгох сургалтад хамрагдсан, их, дээд сургуульд элсэн суралцах болзол хангасан залуучуудыг дэмжин оюутны хөгжлийн зээлд хөнгөлөлттэй нөхцөлөөр хамруулах, оюутан, залуучуудыг ажилд зуучилсан хөдөлмөрийн биржийг дэмжиж, хөдөлмөр эрхлэлтийн нийтлэг үйлчилгээ үзүүлэх асуудлыг хөдөлмөрийн болон залуучуудын асуудал эрхэлсэн төрийн захиргааны байгууллага хамтран хэрэгжүүлэх, гадаад улсад өндөр технологи, нарийн мэргэжил, ур чадвар эзэмшсэн залуучуудыг эх орондоо эргэн ирж ажиллахыг дэмжих хөтөлбөр хэрэгжүүлэх, хувийн хэвшлийн байгууллага нь /100 ба түүнээс дээш ажилтантай/ нийт ажилтнуудын таван хувьтай тэнцэхүйц оюутны цагийн ажлын орон тоо гаргахаар тусгажээ.