Даршилсан загасанд 20 орчим хүн хордсон хэрэг гарчээ. Одоогийн байдлаар загасанд хордсон иргэд эмнэлэгт хэвтсэн эмчлүүлж байгаа бөгөөд биеийн байдал нь тогтвортой хэвийн байгаа юм байна. Хэргийн талаар тодруулахад, Хөвсгөл аймгийн Хатгал сумын нэг иргэнээс энэ сарын 16-17-нд “Цэнхэр далайн өгөөж”, “Хар ус нуур”, “Дүүрэн нуур”, “Хөвсгөл хатгал”, “Хатан загас”, “Хөвсгөл цагаан” нэрийн шилтэй загас болон утсан загас худалдан авсан иргэд хордож, эмнэлэгт хүргэгдсэн гэнэ.

Мөн загасанд хордсон иргэдийн найм нь Халдварт өвчин судлалын үндэсний төвд, долоо нь Баянхонгор аймгийн Нэгдсэн эмнэлэгт хэвтэн эмчлүүлж байгаа юм байна. Харин гурав нь Орхон аймагт гэрээр эмчилгээ хийлгэж байгаа аж.

Мөн дээрх нэр төрлийн шилтэй загаснууд нь хаяг шошгоны зөрчилтэй, хэзээ үйлдвэрлэгдсэн нь тодорхойгүй байсан байна. Уг хэрэгтэй холбогдуулан ЭМЯ, ХӨСҮТ, ЭХЭМҮТ-өөс мэргэжлийн заавар зөвлөгөө өгч, Баянхонгор аймгийн Нэгдсэн эмнэлэгтэй цахим хурал хийж, ажиллажээ.

Түүнчлэн урин дулаан цаг ирж буйтай холбогдуулан НЭМГ-аас иргэдийг хоол, хүнсний хордлого авахаас сэргийлэхийг анхаарууллаа.