Хүүхэд бүрийн хүсэн хүлээдэг зургадугаар сарын 1 асуй. Энэ өдөр л хүүхдүүд эцэг, эхийнхээ гараас хөтлөн төв талбайг зорьж, тэнд зохион байгуулагдаж буй хэдхэн үйл ажиллагаанд оролцон түрүүвчнийхээ хэмжээгээр хүүхдүүдээ баярлуулдаг. Гэвч, автозамд түгжрэл үүсч, нялх хүүхдүүд машинд дайруулах, шүргүүлэх тохиолдол олон гардаг нь нууц биш. Өнгөрөгч 2016 оны “Хүүхдийн эрхийн хамгаалах өдөр”-өөр гэхэд нэг хүүхэд зам тээврийн осолд өртөн амьсгал хураасан харамсалтай хэрэг гарч байсан юм. Гэмтэж бэртсэн хүүхдийн тоог оруулахгүйгээр ийм байна. 

 

Зөвхөн зам тээврийн осол гэлтгүй, хүүхдүүд хүссэнээрээ тоглож наадах, боломж нөхцөл хомсхон байдаг гэвэл хэтийдэхгүй. Харин энэ өдрийг “Автомашингүй өдөр” болговол ямар вэ. Нийслэлд Автомашингүй өдрийг “Улаанбаатар марафон” олон улсын гүйлтийн тэмцээнтэй хамтатган энэ сарын 20-нд тэмдэглэн өнгөрүүлсэн. Тэр өдөр бороо зөөлөн шивэрч байсан ч, түүнийг үл ажран  хүн бүр их хотынхоо төв замаар машинд дайруулчих вий гэх айх айдасгүй алхаж, хүүхэд багачууд энд тэндгүй хөөцөлдөн гүйлдэж, хүссэн тоглоомоороо наадан аз жаргалаар бялхаж байлаа.

Ёстой л их хот амилсан мэт санагдаж байв. Тиймдээ ч, “Ийм сайхан өдөр олон байгаасай” гэх магтаал, сайшаалын үг хүн бүрийн зүрхэнд хөвөрч байсан биз ээ. Автозамын түгжрэлд хэдэн цаг гацах бол, машин хаанаас ирээд мөргөчих бол хэмээн айж бэргэн, гэртээ нуугдан суух хүн ч байсангүй. 

 

Бүгд л гэр бүл, найз нөхдөөрөө сэтгэл амар, их хотын төв гудамжаар зугаалж, нэг өдрийг үр бүтээлтэй өнгөрүүллээ. “Автомашингүй өдөр”-т оролцсон иргэд гэр бүл найз нөхдөөрөө автомашин, гар утас, телевизээс нэг өдөр ч болтугай холдож, сэтгэл амар их хотын гудамжаар зугаалах өдөр олон байгаасай гэх саналыг дэвшүүлж байсан юм. 

 

Тэгвэл жилдээ нэг удаа тохиох “Хүүхдийн эрхийг хамгаалах өдөр”-ийг ч бидний ирээдүй болсон бяцхан үрсийнхээ аюулгүй байдал, тав тух, эрүүл мэндийн төлөө  “Автомашингүй” өдөр болгож болохгүй гэж үү. Нэг өдөр ч атугай тэд машинд мөргүүлчих вий гэх айх айдасгүй хүссэнээрээ наадаж, баярлаж өнгөрөөг. Өмнө нь төв талбайн хоёр талын замыг хаадаг байв. Харин энэ удаад зүүн дөрвөн замаас, баруун дөрвөн зам хүртэлх замыг автомашингүй бүс болгож болох биш үү. Томчуудын гэх тодотголтой манай нийгэм ирээдүйнхээ төлөө ийм жижигхэн зохицуулалт хийхэд юу нь болохгүй байх билээ. Түм түжигнэж, бум бужигнасан их хотын завгүй амьдралд түгжрэлээс эхлээд бухимдах зүйл бишгүй. Тэр бүгдээс үүдэн гэр бүлээрээ цагийг хөгжилдөн өнгөрүүлөх төлөвлөгөө хүмүүний уур бухимдалд уусан шингэх тохиолдол ч олон байж мэднэ. 

 

Тиймээс хүүхдийн гэнэн цагаахан инээд цангинаж, баяр баясал халгисан “Олон улсын хүүхдийн баяр”-ыг баяр хэвээр нь хүүхдийн сэтгэлд том болсон хойно нь ч мартагдахааргүй дурсамжтайгаар үдэхийн тулд “Автомашингүй” өдрийн тоог хоёр болгочихьё. Энэ саналыг өнгөрөгч бямба гарагт төв талбайгаар алхсан, гэр бүлээрээ салхисан нийслэлчүүд лавтай дэмжих нь гарцаагүй.  Дэлхийн “Автомашингүй өдөр” есдүгээр сарын 22-нд тохиодог юм билээ.

 

Энэ өдрийг 1974 оны байгалийн хийн хямралын үед анх тэмдэглэж эхэлсэн байдаг ч, түүнээс хойш дэлхийн хот бүрт өөр өөр өдөрт тэмдэглэж, эдүгээ календарт тэмдэглэгдтэлээ өргөжжээ.  Монголчууд бид ч гэсэн зургадугаар сарын 1-нийг автомашингүй өдөр хэмээн календартаа тодоос тод тэмдэглэчихье. Ингэвэл ядаж л хүүхдүүд  ролик, скейт, дугуйгаа унаад, чөлөөтэй амарч зугаалан баярлана. Мөн хүүхэд автозамын осолд өртөх хэрэг ч гарахгүй биз.