Говьсүмбэр аймгийн Хөдөлмөр, халамж үйлчилгээний газар, Уул уурхайн жишиг Политехник коллеж, Эрүүл мэнд, нийгмийн даатгалын хэлтэс, Гэр бүл хүүхэд, залуучуудын хөгжлийн газар хамтран энэ сарын 19-нд “Нээлттэй хаалга”-ны өдөрлөг зохион байгуулжээ. Өдөрлөгийн нээлтийн үйл ажиллагаанд тус аймгийн Засаг даргын Тамгын газрын дарга Д.Содном, аймгийн Засаг даргын Тамгын газрын Нийгмийн бодлогын хэлтсийн дарга С.Уранцэцэг, Хөдөлмөр, халамж үйлчилгээний газрын дарга Д.Гансүх, Эрүүл мэнд, нийгмийн даатгалын хэлтсийн дарга Б.Аюушжав, Гэр бүл хүүхэд, залуучуудын хөгжлийн газрын дарга Ц.Оюунбилэг болон бусад албаны хүмүүс оролцсон байна.

Өдөрлөгийн үеэр Хөдөлмөр, халамж үйлчилгээний газар нь хөдөлмөр эрхлэлтийг дэмжих сангаас төсөл хөтөлбөрийг дэмжлэг авсан иргэдийн үзэсгэлэн худалдаа, Нийгмийн халамжийн бүх төрлийн үйлчилгээ, Хөдөлмөрийн харилцаатай холбоотой хууль тогтоомжийн танилцуулга, хууль тогтоомжийн хүрэнд хийж буй ажлын талаар иргэдэд танилцууллаа. Мөн Эрүүл мэнд, нийгмийн даатгалын хэлтсээс эрүүл мэндийн даатгалын, нийгмийн даатгалын дэвтэр олгох, Эмнэлэг, эмийн сангийн үйлчилгээ, тэтгэвэр, тэтгэмж тогтоолгох иргэдийн материалыг шалгаж зөвлөгөө өгч ажиллажээ.

Түүнчлэн  Гэр бүл хүүхэд, залуучуудын хөгжлийн газар нь Хүүхэд хамгааллын тухай хууль, 2017 онд шинэчлэгдэн батлагдсан Гэр бүлийн хүчирхийлэлтэй тэмцэх тухай хуулиудыг сурталчлах, Мэргэжлийн сэтгэл зүйч иргэдэд сэтгэлзүйн зөвлөгөө өгөх, хамтарсан багийн үйл ажиллагааг олон нийтэд таниулах ажлыг зохион байгуулсан байна.