Иргэд зөвшөөрөлгүйгээр самар түүж, улмаар амиа алдах тохиолдол ихэсчээ. Тухайлбал, өчигдөр гэхэд Сэлэнгэ аймгийн Баруун бүрэн сумын I дүгээр багт суух 20 настай эрэгтэй А тус сумын “Хүж” ууланд самар түүж байгаад модноос унаж амиа алдсан хэрэг гарсан байна. Цагдаагийн байгууллагаас энэ төрлийн хэрэг ихэссэн гэдгийг мэдээллээ.

Түүнчлэн иргэд хууль бусаар самар түүхдээ, ах дүү, найз нөхөдтэйгээ хамт явдаг байна. Ингэхдээ ямар ч хамгаалах хэрэгсэлгүйгээр модонд авирдаг гэнэ. Үүний улмаас модноос унаж, бэртэх, улмаар амь насаа алддаг аж. Тиймээс Улаанбаатар хотын Цагдаагийн газраас иргэдэд хууль бусаар самар түүхгүй, өндөр модонд авирахгүй байхыг анхаарууллаа.