Бүгд найрамдах Чех улсын J4 компанийн гадаад худалдааны төлөөлөгч Павел Полачекийг Монголын Худалдаа аж үйлдвэрийн танхимын нэрэмжит “Silk road” шагналаар шагналаа. Шагнал гардуулах ёслолын үйл ажиллагаа өчигдөр “Талх чихэр” компанийн байранд болсон юм. 

 

Энэхүү шагналаар хоёр улсын хамтын ажиллагааны хөгжилд хувь нэмэр оруулж буй хувь хүмүүсийг шагнадаг бөгөөд тэднийг урамшуулан дэмжих, нийтэд таниулах зорилготой юм байна. Шагнал гардуулах ёслолыг нээж, “Талх чихэр” компанийн гүйцэтгэх захирал М.Базар-Ууган үг хэлсэн. Тэрбээр “Юуны өмнө энд хүрэлцэн та бүхэндээ энэ оройн амар амгаланг айлтгая. Манай компани 2015 оны сүүлчээс шинэ төсөл хэрэгжүүлж эхэлсэн нь амжилттай болж, одоо гэрээнийхээ шатанд орчихоод явж байгаа билээ. Тоног төхөөрөмжийн угсралтаа энэ оны сүүлчээр хийх гэж байна. Чех, Итали, Герман гэсэн Европын орнуудын техник, тоног төхөөрөмжийг үйлдвэрлэлдээ нэвтрүүлж, Монголд байхгүй шинэ талх, нарийн боовыг үйлдвэрлэхээр зорьж байна.

Өнөөдөр Чех улсын иргэн, бидний хэрэгжүүлэх шинэ төслийн гол төлөөлөл болсон Павел Полачек бидний урилгыг хүлээн авч, энд хүрэлцэн ирээд байгаад баяртай байна. Энэ дашрамд Монгол Улсын “Талх чихэр”, БНЧУ-ын J4 компанийн хамтран туулсан 12 жилийн түүх цаашид ч үргэлжлэх болтугай. Манай “Талх чихэр” компанийн дэд уриа байдаг. “Европ технологийг Монголд нутагшуулна” гэж. Энэ урианыхаа дагуу хүнсний бүтээгдэхүүнээ чанартай хийхийг зорих болно. Мөн энд нэг мэдээллийг дуулгахад, Олон улсын хүнсний аюулгүй байдлын стандарт буюу ISO22000-ийг манай үйлдвэр авч байгаа. Тэр ч утгаараа хүнсний аюулгүй байдлыг бүрдүүлэхэд  чанартай, шаардлага хангасан Европ технологийг Монголд нэвтрүүлэх шаардлагатай байгаа юм” хэмээсэн.

 

Түүний дараа Монголын Худалдаа аж үйлдвэрийн танхимын Ерөнхий нарийн бичгийн дарга н.Оюундаш үг хэлэв. Тэрбээр “Талх чихэр” компани МХАҮТ-ын идэвхтэй гишүүн. Мөн манай танхимын үйл ажиллагаанд маш идэвхтэй оролцдог. Тиймээс би энэ компаниар бахархдаг. Өнөөдөр БНЧУ-ын J4 компанитай хамтраад зургаа дахь төслөө хэрэгжүүлж эхэлж байгаа юм байна. МХАҮТ-ын нэг хийх ёстой ажил бол дэмжин урамшуулах. Тэгвэл өнөөдөр бид шинэ төслийг хэрэгжүүлэхэд болон Чех Монголын харилцааг бэхжүүлэхэд үнэтэй хувь нэмэр оруулсан J4 компанийн Гадаад худалдааны төлөөлөгч Павел Полачекийг танхимын нэрэмжит шагналаар шагнахаар болоод байна.

Түүнийг эх орондоо буцаж байгаа энэ үеийг тохиолдуулан нэрэмжит шагналаа гардуулъя” хэмээгээд МХАҮТ-ын Ерөнхий нарийн бичгийн дарга н.Оюундаш Чех улсын J4 компанийн төлөөлөгч Павел Полачект   “Silk road” одонг зүүж өгч, баяр хүргэсэн юм. Дашрамд дурьдахад,  “Талх Чихэр” ХК нь  Бүгд Найрамдах Чех улсын J4 фирмтэй 2004 оноос хойш техник технологийн шинэчлэлийн томоохон төслүүдэд хамтран ажиллаж байгаа аж. Хамтын ажиллагааны хүрээнд Монгол Улсад анх удаа “Атар”, “Мишээл”, “Ургац” зэрэг брэнд болсон талхнуудын үйлдвэрлэлийн болоод нарийн боовны үйлдвэрлэлийн иж бүрэн шугамуудыг ашиглалтад оруулж байж. Мөн  Монголд  анхны зүссэн талхыг нэвтрүүлж,  хэрэглэгчдэд өргөн барьж байсан түүхтэй юм байна.  

 

“Талх Чихэр” компани талх, нарийн боов үйлдвэрлэлийн хамгийн чухал, сүүлийн дамжлага болох жигнэлтийн тоног төхөөрөмжийн үйлдвэрлэлээр олон улсад танигдсан, 22 жилийн түүхтэй J4 компанитай хамтын ажиллагаагаа улам бэхжүүлж, компанийн хэмжээнд техник технологийн шинэчлэлийг амжилттай хэрэгжүүлсэн.

Түүнээс  гадна талх, гурилан бүтээгдэхүүн үйлдвэрлэлийн салбарт  үнэтэй хувь нэмэр оруулсан хэмээн үнэлж “J4” компанийн гадаад худалдааны төлөөлөгч Павел Полачекийг шагнасан гэдгийг онцлон дурьдаж байлаа. Шагналаа гардаж авсны дараа Чех улсын J4 компанийн Гадаад худалдааны төлөөлөгч  Павел Полачек “Би хоёр жилийн өмнө “Талх чихэр” компанийн үйл ажиллагаатай танилцаж байлаа.

 

Тэгвэл өнгөрсөн хугацаанд энэ компани маш олон бүтээн байгуулалтыг өрнүүлж, өсч дэвжиж чадсан байна. Энэ удаад бид талх үйлдвэрлэлийн шинэ төслийг эхлүүлэхээр гарын үсэг зурж, хамтарч ажиллахаар болсон. Хагас жилийн дараа гэхэд шинэ бүтээгдэхүүн гарч, хэрэглэгчдийн гарт хүрнэ. Яг ямар бүтээгдэхүүн гарах талаар ярих хэрэггүй болов уу. Мөн өнөөдөр намайг энэ нэр хүндтэй шагналаар шагнасанд үнэхээр баяртай байна. Бидний хамтын ажиллагаа цаашид ч амжилттай үргэлжилнэ гэдэг итгэлтэй байна” хэмээн сэтгэгдлээ хуваалцлаа.