Хүүхэд, залуучуудад авлигын хор уршгийн талаарх мэдээллийг зөв өгч чадвал үр дүн нь маргааш биш, нөгөөдөр ч биш бүр жилийн дараа ч биш 10 жилийн дараа гарна гэж АТГ-ын Урьдчилан сэргийлэх, соён гэгээрүүлэх хэлтсийн ахлах ажилтан, ахлах комиссар Б.Тэрбиш буй “Таны эрх, Таны оролцо-Авлигад үгүй гэж хэлье” өдөрлөгийн үеэр онцоллоо. Авлигатай тэмцэх газар, Авлигатай тэмцэх газрын дэргэдэх Олон нийтийн зөвлөл, Орхон аймгийн ЗДТГ хамтран хүүхэд залуучууд, иргэдэд зориулан авлигаас ангид байх, авлигын хор уршгийг танин мэдүүлэх, соён гэгээрүүлэх уг өдөрлөгийг өнөөдөр Хүүхэд залуучуудын театрт зохион байгуулав. Өдөрлөгт аймгийн Засаг дарга С.Батжаргал, ИТХ-ын дарга Д.Мөнхбат болон АТГ-ын холбогдох албаны хүмүүс оролцсон.

Засаг дарга С.Батжаргал “Нийгмийн болох, болохгүй зүйлсээс тэр дундаа авлигыг үгүй хийх нэг зүйл нь авлигыг үл тэвчих соёл гэж би ойлгодог. Ард түмэнд суусан соёл зөв, шударга нийгмийг бүтээхэд ихээхэн чухал юм. Аливаа юмыг эхлээд цочирдож хүлээж авдаг байсан бол сүүлдээ түүндээ уусаж танил болох нь илүү аюултай юм шиг санагддаг. Тэр утгаараа авлига гэдэг үгийг байнга ярьсаар байгаад энэ үг нь өөрөө хүчгүй болчихсон юм болов уу гэж би хувь хүнийхээ хувьд боддог. Шударга гэдэг үгийг анхлан хүлээж авдаг байсан Монголчуудын сэтгэхүй өнөөдөр энэ үгийг хүлээж авч байгаа сэтгэхүйг харьцуулахад л ялгаа зааг нь харагдана. Нийгэм шударга байж бид хөгжлийн тухай ярина. Ганц дан барилга барьчхаад түүнийгээ хөгжил гэж ярьж болохгүй.

Иргэд, олон нийтийг соён гэгээрүүлэх нь авлигаас ангид нийгмийг бүтээх хамгийн гол ажил юм. Зөв бүхэн сайн үйлсийг дэлгэрүүлэх болтугай” гэв. Монгол Улс авлигын индексээрээ өнгөрсөн жилүүдийнхээс урагшлаагүй өссөн үзүүлэлттэй байгаа тухай АТГ-ын мэдээлэлд дурдсан. Авлигын төвшнөөрөө дэлхийн улс орнуудыг тэргүүлдэг байсан Сингапур, Хонконг өнөөдөр авлигын индексээ бууруулж чадсан. Эдгээр улсын туршлагаас судлахад авлигын эсрэг гэмт хэргийн илрүүлэлтийг сайжруулах, энэ төрлийн гэмт хэргийг таслан зогсооход хүүхэд, залуус, иргэдийг соён гэгээрүүлэх чиглэлээр тууштай арга хэмжээг авч хэрэгжүүлсэнтэй холбоотой ажээ. АТГ-ын Урьдчилан сэргийлэх, соён гэгээрүүлэх хэлтсийн ахлах ажилтан, ахлах комиссар Б.Тэрбиш “Ардчиллын хамгийн том үндсэн зарчим нь ард түмний Засгийн газар

Ард түмэн өөрсдийн дундаас сонгосон төлөөллөөр дамжуулан төрийн эрх барих тухай зарчим шүү дээ. Хүүхэд, багачуудад зөв, шударга байх тухай мэдээллийг өгөхөөс гадна иргэний оролцоотой улс орон хөгжинө гэдэг ойлголтыг өгөх нь чухал юм. Сонгуульд идэвхтэй оролцдог, хяналт тавьдаг иргэнийг оролцоотой иргэн гэж хэлнэ. Монгол Улс авлигын индексээрээ өмнөх оноос ахиагүй. Ахиагүй байгаа шалтгаан нь авлигын гэмт хэрэгт холбогдсон албан тушаалтнуудад хариуцлага хүлээлгэх хууль эрх зүйн орчин, төрийн өндөр дээд албан тушаалтны халдашгүй дархан эрх гэх мэт зүйлсээр хаалт хийж хариуцлагаас мултарч байна гэх судалгааг олон улсын байгууллагуудаас гаргасан байдаг” гэлээ. Аймгуудийн авлигын төвшинг тодорхойлохын тулд Хүүхдийн шударга байдлын төвшний судалгаа болон Төрийн албан хаагчдын шударга байдлын үнэлгээ гэсэн хоёр судалгааг авдаг байна.

Хүүхдийн шударга байдлын төвшний судалгаагаар Орхон аймаг 21 аймгаас 12-т жагсжээ. Алслагдсан аймгийн хүүхдүүдээс авсан Хүүхдийн төвшний судалгаа өндөр, хот суурин газрын хүүхдүүдийн судалгаа доогуур гарсан нь хот суурин газарт амьдарч байгаа хүүхдүүдийн аав, ээж хүүхэдтэйгээ ажиллах нь бага байгаа учир шударга байдлын үнэлгээ доогуур үнэлэгдсэн байна. Иргэдийн оролцоотойгоор авлигагүй нийгмийг бүтээхэд иргэн Та авлигын эсрэг юу хийж чадах вэ? •Иргэн Та төрийн үйл хэрэгт оролцож дуу хоолойгоо хүргэх, төрийн үйлчилгээний талаар гомдол, санал, хүсэлт гаргах, төр засгаас гаргаж байгаа шийдвэрийн төсөлтэй танилцаж өөрийн саналаа илэрхийлэх, •Иргэн Та авлигын эсрэг хууль эрх зүйн мэдлэг, ойлголтоо сайжруулах, •Иргэн Та төрийн байгууллага, албан тушаалтанд хяналт тавих, •Иргэн Та төрийн албан тушаалтны хууль бус шаардлагад үгүй гэж хэлж чаддаг байх, •Иргэн Та хүүхэд, залуучуудад үлгэр дуурайлал болж чадна, •Иргэн Та авлига ашиг, сонирхлын зөрчил хүнд суртал чирэгдлийг мэдээлж чаддаг байх, •Иргэн Та хууль бус аливаа үйл ажиллагаатай эвлэрэхгүй байж, авлигын гинжийг тасалж чадна.