Монгол Улсын Ерөнхий сайд Л.Оюун-Эрдэнэ, холбогдох сайд, удирдлагуудын хамт “Зорчигч тээврийн нэгтгэл” ОНӨААТҮГ-ын 2-р баазад ажиллалаа.

Өнөөдрийн байдлаар Улаанбаатар хотод 105 чиглэлд 961 автобус 500 мянга гаруй иргэнд үйлчилж байна. Гэвч иргэдийн 90 хувь нь нийтийн тээвэрт сэтгэл ханамжгүй гэсэн судалгаа бий. Нийслэлийн түгжрэлийг бууруулахад нийтийн тээврийг шинэчлэх, хүртээмжйг нэмэгдүүлэх нь зайлшгүй учраас 2023 онд төр, хувийн хэвшил нягт хамтран ажиллах нь Засгийн газрын бодлого юм.

Тус салбарынханы зүгээс үнэ тарифаас шалтгаалж хүндрэл үүсэж байгааг илэрхийллээ. Одоогийн байдлаар нийтийн тээврээр үйлчлүүлэгчдийн 47 гаруй хувь нь 500 төгрөгийн төлбөрөө төлж, үлдсэн хувь нь хөнгөлөлттэй буюу үнэ төлбөргүй үйлчлүүлдэг байна. Мөн хүний нөөцийн дутагдалтай болсон талаар дурдлаа.

Тиймээс Монгол Улсын Ерөнхий сайдын зүгээс нийтийн тээврийн салбарыг цогцоор нь шийдэхээ илэрхийлж, хамтарсан ажлын хэсэг байгуулж ажиллахаар боллоо. Ингэснээр нийтийн тээврийн төрийн өмчит 2, хувийн хэвшлийн 17 аж ахуй нэгж тулгамдаж байгаа асуудлаа төртэй хамтран шийдэх боломж бүрдэх юм.

Тав тухтай, хүртээмжтэй нийтийн тээвэр бол нийслэлийн авто замын түгжрэлийг бууруулах нэг боломж. Тиймээс нийтийн тээврийн салбарыг зөвхөн парк шинэчлэлээр дуусгах биш иргэдийн сэтгэл ханамжийг бүрэн хангасан байдлаар шийдэхээр ажиллаж байна.