Монгол Улсын Засгийн газрын өргөтгөсөн хуралдаанаар “Шинэ сэргэлтийн бодлого”-ын хүрээнд авч хэрэгжүүлж  буй  “Улаанбаатар хотоос орон нутагт шилжин суурьших иргэд, ААНБ-ыг дэмжих тухай тогтоол”-ын төслийг хэлэлцлээ. 
Өргөтгөсөн хуралдаанд Ерөнхий сайд Л.Оюун-Эрдэнэ тэргүүтэй Засгийн газрын сайд нар, ажлын хэсгийн гишүүд мөн 21 аймгийн Засаг дарга нар биечлэн оролцсоноос гадна аймгуудын холбогдох албаны хүмүүс цахимаар  оролцов.  Ерөнхий сайд Л.Оюун-Эрдэнэ хуралдааны эхэнд орлогоо бүрдүүлдэг аймгуудыг улсын зэрэглэлтэй хотын статустай болгоход анхаарна гэдгээ онцолсон.  Монгол Улсын 21 аймгаас Орхон, Дархан-Уул, Дорноговь, Өмнөговь, Сэлэнгэ, зэрэг зургаан аймаг улсын төсөвт орлого төвлөрүүлж, орлогоо бүрдүүлж байна. 

     “Улаанбаатар хотоос орон нутагт шилжин суурьших иргэд, ААНБ-ыг дэмжих тухай тогтоол”-ын төсөлд Улаанбаатар хотын төвлөрлийг сааруулах, аймаг бүр шилжин суурьших иргэдыг  татах ажил зохион байгуулахаар төлөвлөгөөнд тусгасан. Мөн Улаанбаатар хотоос хөдөө орон нутагт шилжин суурьших иргэдийг санхүүгийн хувьд дэмжих саналыг ч тусгасан.  Тухайлбал,  2023 оны улсын төсөвт орон нутаг руу шилжин суурьшсан иргэдэд ипотекийн гурван хувийн хүүтэй зээл олгох, орон нутагт шинээр үйл ажиллагаа явуулж буй аж ахуй нэгжид татварын хөнгөлөлт үзүүлэх, Улаанбаатар хотоос хүн олноор татсан аймгуудад урамшуулал олгодог болох, шилжин очих иргэдийг малжуулах, газар олгох зэрэг бодлогын дэмжлэг үзүүлэх зэргийг тусгасан.

    Хэлэлцэж буй асуудалтай холбогдуулан Зам тээвэр хөгжлийн сайд С.Бямбацогт “Улаанбаатар хотын төвлөрөл, түгжрэл нь иргэдийн ажлын  байр, олж орлого амжиргаатай нь холбоотой юм.  Улаанбаатараас алслагдах тусам тээврийн зардал, бараа бүтээгдэхүүний үнэ өсдөг. Тэр хэрээрээ иргэдийн амжиргааны зардал нэмэгдэж орлого буурдаг. Тиймээс алслагдсан аймаг, орон нутагт  байгаа иргэдийнхээ зардлыг хэрхэн бууруулах вэ орлогыг хэрхэн нэмэгдүүлэх вэ гэдэгт анхаарах ёстой. АНН-ийн орлогын албан татвар алслагдсан аймгуудад тодорхой хэмжээнд хөнгөлөлт үзүүлдэг.Үүнтэй адилхан нийслэлээс хэр хол амьдарч байна вэ гэдэг шатлалаар нь хүн амын орлогын албан татварын хөнгөлөлтийг үзүүлэх боломж бий юу” гэж асуув. 
Үүнд Сангийн сайд Б.Жавхлан “Газар нутгийн алслагдсан байдлаас шалтгаалж татварын хөнгөлөлт үзүүлэх тогтолцоо бий. 500 км-ийн цаана бол ААНБОАТ-ыг 50 хувь хөнгөлөх 1000 км бол 90 хүртэл хувийн хөнгөлөлт үзүүлдэг систем хэрэгжээд нэлээн хэдэн жил болж байна. Гэвч бодит байдалд хангалтгүй байна. Улаанбаатар хотоос орон нутагт шилжин суурьших иргэдэд нэг сая төгрөгийн дэмжлэг үзүүлэхээр тусгасан. Гэхдээ үүнийг аймаг орон нутаг өөрсдийн төсөв дээрээс шийдвэрлэнэ” гэлээ.