Dens.mn сайтын сурвалжлагч бүсгүй А.Шинэбаяр төрийн ордонд дуулиан тарив. Нийслэл хотыг минь төвхнүүлэхээр зориг шулуудан Засгийн газрын гишүүн, Хуульзүй длтллд хэргийн сайдын зөөлөн суудлаа орхин Нийслэлийн  засаг дарга, Улаанбаатар хотын захирагчаар дөнгөж томилогдоод байгаа Х.Нямбаатараас нэг асуулт асуужээ.

Харамсалтай нь он удаан жилээр том албанаа сууж зөөлөн сандалд шигдэж их зантай болсон Засаг дарга маань  үл тоомсорлон, хариулсангүй чигээрээ зүтгэж.

Харин сэтгүүлч, асуултынхаа хариуг авч чадаагүйдээ шаралхсан уу, түгжрэлийг бууруулаад, зарим барилга байшин, байгууламжийг нураан, хотыг эмх цэгцэнд оруулах гэж байгаа Засаг даргыг минь элдэв үгээр доромжлон, бүр барьж авахаар дайрав.

Эндээс хоёр л зүйл ажиглагдаж байна.

Юун түрүү сэтгүүлч, сурвалжлагч  бол уншигч, үзэгчдээ төлөөлж, тэдний мэдэх ёстой зүйлийг баталгаатай эх сурвалжаас авч олон нийтэд түгээх үүрэгтэй хүн.  Энэ хэрээрээ хувь хүний хувьд ч ёс зүй, биеэ авч явах соёлтой байх ёстой.

Тэгээд ч ажил мэргэжлийн нь хувьд Монголын сэтгүүлчдийн нэгдсэн эвлэл “Сэтгүүлчийн ёсзүйн зарчим” гаргаж 2005 оны гуравдугаар сарын 11-ний өдөр хуралдсан II их хурлаар хэлэлцэж баталсан байдаг. Энд “Мэдээлэл авах, үг хэлэх эрх чөлөө бол хүний үндсэн эрх гэдгийг дээдэлж, сэтгүүлчийн эрх үүргээс нийгмийн өмнө хүлээх хариуцлага ямагт дээгүүр байх ёстойг эрхэмлэж...” гээд “Олон түмний үнэнийг мэдэх эрх ашигт ямагт захирагдана” гэсэн байгаа.

Сэтгүүлчийн ёс зүй хэдий чинээ өндөр байна, сэтгүүлч болон хэвлэл мэдээллийн хэрэгсэл, хэвлэл мэдээллийн байгууллагын нэр хүнд төдий чинээ өндөр байдаг нь ойлгомжтой. Нөгөө талаар ёсзүйтэй сэтгүүлчтэй эх сурвалжууд, өөрөөр хэлбэл албан тушаалтнууд илүү найртай хандаж мэдээлэл өгөхөөс нэг их татгалзаад байдаггүй.

Саяын тохиолдолд сэтгүүлч А.Шинэбаяр үнэнийг мэдэх гэсэн олон түмний эрх ашигт захирагдаад явж байгаа нь үнэн боловч  ёсзүйн энэ зарчмын “Бусдыг гүтгэх, доромжлох, нэр төр гутаахыг цээрлэнэ” гэдгийг ноцтой зөрччихлөө. Ийм ч болохоор өнөөх Б.Нямбаатар нь бүү хэл ойр дэргэд байсан сэтгүүлч, сурвалжлагч нар, энэ мэдээллийг үзэж харсан олон нийт ч шүүмжлэлтэй хандаж байна.

А.Шинэбаяр сэтгүүлч бүсгүй Х.Нямбаатарын гоомой явдал, магадгүй булхай луйврыг мэддэг, баталгаатай мэдээлэлтэй  байж болно. Үнэхээр Засаг дарга руу хашгираад байгаа шигээ Нямбаатарын талаар баримт нотолгоотой мэдээлэл байгаа бол хэвлэлээр, сайтаараа дэлгээд сэтгүүлчийн энэ зарчимд байгаачлан “Бичсэн зүйлийнхээ хариуцлагыг хүлээж”, “Хүний итгэлийг хүлээж, олсон мэдээллийнхээ эх сурвалжийг ямар ч тохиолдолд чанд нууцлаад...” л  сууж байх ёстой.

Хоёрт. Нийслэлийн засаг дарга, Улаанбаатар хотын захирагч Х.Нямбаатар ч гэсэн олон түмнийг төлөөлөн мэдээлэл авах гэж байгаа сэтгүүлчийг хүндэтгэх ёсзүйгүй хүн гэдгээ бас харуулаад авав. УИХ-ын гишүүн, сайд дарга, Хотын захирагч байлаа гээд тэнгэрийн амьтан болчихоогүй. Өнгөрсөн 30 жилд өөрийн нь нам-МАН-ын үе үеийн дарга нар нийслэл хотыг минь ийм хэцүү болгочихсонд бухимдсан ард иргэд Нийслэлийн Засаг дарга, Улаанбаатар хотын захирагчаас, ялангуяа “Би чадна” гээд ирсэн шинэ хүнээс асуух зүйл маш их байгааг хүндэтгэх ёстой байсан. Ер өнөөгийн эрх баригчид, бүх шатны албан тушаалтнууд нэг их том зантай болчихсон, барагтай хүнийг хүн гэж тоож үздэггүйн нэг жишээ нь Нямбаатар л даа.

Эх сурвалж: Монголын Мэдээ Сонин

2023 оны аравдугаар сарын 20. Баасан. №162 (5890)