Нийслэл Улаанбаатар хотын авто замын түгжрэлийг бууруулах үндэсний хорооны дарга Монгол Улсын сайд асан Ж.Сүхбаатар, Нийслэлийн засаг дарга, Улаанбаатар хотын захирагч асан Д.Сумъяабазар нарын 400 сая төгрөгийн үнэтэй ногоон автобусны дуулиан замхрах тийшээ хандав уу. 

Улс төрийн соёлтой гэдгээ гайхуулан хоёулаа бөхөлзөн ажлаасаа огцроод, Ж.Сүхбаатар нь УИХ-ын Хуульзүйн байнгын хорооны дарга болж дэвшив. 

Энэ маш  том луйврын гол хүмүүс гэх хэдэн хүнийг баривчлан саатуулсан ч одоо ямар шатандаа яваа нь тодорхойгүй таг чиг болов. 

Өмнө нь хэд хэдэн удаа хуулийнханд дуудагдан шалгагдаж байсан “Тэнүүн огоо” компанийн захирал А.Ганхуяг “Үйлдвэрийн алдаагаа Daewoo өөрсдөө тайлбарлах биз ээ. Манайх нэгдүгээр сард Daewoo-той гэрээгээ хийсэн. Автобусыг иргэдэд хурдан хүргэх үүднээс шахамдуулсан нь үнэн. Харамсалтай нь яаравчилснаас процедурын алдаа гарлаа. Daewoo өөрөө хариуцлага хүлээнэ биз. Бид үйлдвэрлэгч компани биш, хяналтаа л тавьсан. Тиймээс автобуснуудаа “тат” гэх шаардлага тавьсан” гэж мэдэгдээд байсан ч одоо саатуулагдаад байгаа. 

Монгол Улсын Ерөнхий сайд Л.Оюун-Эрдэнэ ногоон автобусны хэрэг мандсаны дараа нийслэлийн худалдан авах ажиллагааны талаар нарийн шалгах үүрэг өгсөн ч мөн л нам жим.

Чухамдаа А.Ганхуягаас мэдүүлэг авч чадвал нийслэлийн Засаг даргын тамгын газраас нэлээн олон хүн чирэгдэж болох. Өмнө нь автобусны шугамд ашигладаг GPS хуурамчаар үйлдэн өөр машин явуулж  байсан, улсаас авсан 50 автобусны мөнгийг төлөөгүй хэмээн хуулийн байгууллагад шалгуулж байсан энэ хүнд яагаад автобус оруулж ирэх тендерийг өгөв, хэн өгөв, хуучин муу автобус засварлаад өндөр үнээр шахахад нь хэн хэн оролцов гээд асуух зүйл мундахгүй их баймаар. Нийтийн тээврийн газар, тендерийн хороо гээд дунд шатныхан бол гарцаагүй хамаатай болж таарна. Эцэст нь хөрөнгө мөнгө гаргахад өнөө сайд, Засаг дарга нар оролцоогүй гэж үү. 

Энэ хугацаанд Хуульзүй дотоод хэргийн шинэ сайд яаран сандран мөрдөн байцаалтын нууц задруулах гэсэн заалт санаачлан батлуулах гэж зүтгэсэн нь ямар учиртай байж таарах вэ. 

Монголчууд бид үнэхээрийн мартамтгай улс. Эрх баригчдын булхай луйвар илрэх бүрийд хэвлэл мэдээлэл, олон нийтийн сүлжээгээр нэг их сүр болон бичицгээгээд төдхөн мартдаг. Эрх баригчид ч үүнийг нь ашиглан хэргийг замхруулж байгаад нэг мэдэхэд хэргийн гол эздийг харин ч тушаал ахиулан дэвшүүлэх нь бий.

Капитал банк, Жижиг дунд үйлдвэр хөгжүүлэх сан, Хөгжлийн банк, Боловсролын зээлийн сан, Нүүрсний хулгай анх илрэхэд бөөнөөрөө л шуугьсан. Одоо ганц нэгхэн хүн л олон нийтийн сүлжээнд эдгээр хэргийн нэрийг жагсаагаад сануулахаас хэтрэхгүй болов.

Өнөө шалгаж байгаа хууль сахиулагчид ч хэрэг мөрдөн шалгаж байгаа явцаасаа мэдээлэхээ болив. Мэдээж мартагнуулан замхруулах гэж байгаа юм биш байгаа. Энэ олон хэргийг  нарийн ухаж шалгавал эрх баригч МАН-аас тун олон хүн, тэгэх тэгэхдээ томцуул хамрагдчих гээд, сонгууль дөхөж байхад намын нэр хүндэд харшлах гээд болохгүй болохоор зориуд удаашруулан мартагнуулаад байгаа ч байж болох. 

Юутай ч эрх баригчид мартуулах гэж байж болох ч ард түмэн, олон нийт марталгүй хууль хяналтынхнаас шалгааж л байх хэрэгтэй байнасанж.

Эх сурвалж: Монголын мэдээ сонин

2023 оны аравдугаар сарын 25. Лхагва. №164 (5892)