Аялал жуулчлалыг хөгжүүлэх Үндэсний хорооны 2023 оны хоёрдугаар хуралдаанаар тус хорооны дарга, Ерөнхий сайд Л.Оюун-Эрдэнэ хэлэхдээ “Аялал жуулчлалын тухай хууль”-ийн шинэчилсэн найруулга батлагдсан. Цаашид хуулийн хэрэгжилтийг шуурхайлж, аялал жуулчлалын үйл ажиллагааны менежментийг мэргэжлийн холбоонд шилжүүлж, төр гагцхүү бодлого, хууль, журмаа улам боловсронгуй болгож, төр, хувийн хэвшлийн түншлэлээр аялал жуулчлалыг эрчимтэй хөгжүүлэх нь зүйтэй. Жуулчдын тоо нэмэгдэж байгаатай зэрэгцэн ариун цэврийн байгууламжийн асуудал хөндөгдөж буй. Аялагч, жуулчдын санал, шүүмжийг ажил хэрэгтээ тусгаж, “Монголд зочлох жил”-ийн хүрээнд орчин үеийн ариун цэврийн байгууламжийг аялал жуулчлалын гол маршрутын дагуу барьж байгуулсан, аялал жуулчлалын иж бүрэн стратегитай байх ёстой” гэдгийг онцлон хэлж байсан билээ. 

Мөн хуралдаанаар жуулчдад зориулсан ариун цэврийн байгууламж бүхий түр буудаллах цэг, үйлчилгээний цогцолбор, отоглох цэг байгуулах ажлын явц, тулгамдаж буй асуудал, өвлийн аялал жуулчлалын стратеги төлөвлөлт, гадаад зах зээлд чиглэсэн маркетинг, жуулчдын эрх ашгийг хангах утасны үйлчилгээ зэрэг асуудлыг хэлэлцэж, санал солилцож.Ариун цэврийн байгууламжийн асуудлыг эцэслэн шийдвэрлэх, тооцоо судалгаа хийж танилцуулах чиглэлээр холбогдох албан тушаалтнуудад хугацаат үүрэг даалгавар өгч байв.

Тэгвэл  дээрх өвлийн аялал жуулчлалтай холбоотой мэдээллийг БОАЖ-ын сайд Б.Бат-Эрдэнэ өглөө.

Тэрбээр “2023 оны аравдугаар сарын 18-нд БНХАУ-тай хил орчмын аялал жуулчлалын хэлэлцээрийг албан ёсоор байгууллаа. Ингэснээр аялал жуулчлалын томоохон урсгал орж ирнэ гэдэг тооцоо төлөвлөгөөтэй байна.

Аравдугаар сард Их цайны зам буюу Монгол, БНХАУ, ОХУ-ын хамтарсан торгоны замыг буцаан сэргээх ажлууд хэлэлцээрийн түвшинд амжилттай хийгдлээ.

Энэ сард өвлийн аялал жуулчлалыг, 2024 оны хоёрдугаар сард цагаан сарыг сурталчлах инфлүэнсерүүдийн баг ирэхээр бэлтгэгдэж байна. 2023-2024 онд нийт зургаан удаагийн багийг авчрахаар төлөвлөж байгаа.

Өнгөрсөн хугацаанд Монгол Улсын талаарх мэдээлэл дэлхийн 500 орчим сая хүнд хүрч, 2019 онд ирсэн жуулчдын тоог давсан үзүүлэлтэд хүрлээ.

Засгийн газрын хурлаас олон улсын болон дотоодын нислэгийн тоог хэвээр хадгалах, өвлийн аялал жуулчлалд бэлэн байгаа 7639 орны хүчин чадал бүхий 111 баазыг шинэчлэхэд 2024 оны нэгдүгээр сарын 1-нээс 55 тэрбум төгрөгийн хөнгөлөлттэй зээл олгох шийдвэр гарч байна. Улсын төсөвт 3.1 тэрбум төгрөгийг суулгаж өгсөн.

Боршоо, Ханх, Цагааннуур боомтуудын ажиллах цагийг уртасгаж, ОХУ болон бусад улсын жуулчдыг хүлээж авах шийдвэрийг гаргалаа. Ирэх долоо хоногийн хурлаар өвлийн аялал жуулчлалтай холбоотой төлөвлөгөөг батална” хэмээв.

Тэрбээр сэтгүүлчдийн асуултад “Манай улс 6, 7, 8 дугаар сард нийт жуулчдын 40 хувийг хүлээж авдаг. Өвлийн аялал жуулчлал буюу 11, 12, 1, 2, 3 дугаар сард жуулчдын тоо маш бага байдаг. Өнгөрсөн 2019 оны арваннэгдүгээр сард 34 мянган жуулчин хүлээж авч байсан юм билээ.

Энэ оны арваннэгдүгээр сараас өвлийн аялал жуулчлалыг хөгжүүлэх бодлогууд гаргаж, аялал жуулчлалын үйлчилгээ эрхэлдэг ААН, мэргэжлийн холбоодтой хамтарч ажиллана.

БОАЖЯ-ны 2023 оны төсөвт аялал жуулчлалын хөтөлбөр 4.9 тэрбум төгрөг. Инфлүэнсерүүдтэй шат дараалсан байдлаар ажиллана. Жишээлбэл 2024 оны тавдугаар сард Nas Summit хийхээр төлөвлөж байгаа. Энэ жил наймдугаар сард хийсэн. Хийгдэж байгаа контент, үзэлтийн тоогоор гэрээлж ажиллаж байгаа. Одоогоор нэг тэрбум орчим төгрөгийн төсөв зарцуулсан. Одоо­гоор 600 мянга орчим жуулчин ирсэн.

Монголбанкнаас тогтоосноор нэг жуулчин 2000-2048 ам.долларын орлого оруулж, тэрбум доллар буюу 3.4 их наяд төгрөг давсан хэмжээний орлогыг улсын төсөвт оруулсан тооцоолол байна.

Нислэгийн тийзийн үнэ агаарын тээврийн либералчлалтай холбоотой. Энэ жил өдөртөө 12-14 нислэгийг БНСУ-аас долоон авиа компани үйлдэж байлаа.

Бидний авсан мэдээллээр одоогийн байдлаар 140,000 солонгос жуулчин ирсэн байгаа. Ирэх жил энэ тоо хоёр дахин нэмэгдэнэ, тиймээс тийзийн үнэ тарифын багц хямдрал гаргахаар тооцоо судалгааг томоохон авиа компаниуд эхлүүлсэн байгаа юм билээ.

Монголд зочлох жилийг 2023-2025 он болгосон. Энэ онд суурь ажлуудыг хийж байгаа. Нисдэг тэрэгний 33 отоглох цэгийг байгуулах сонгон шалгаруулалт зарлагдах гэж байна. Ирэх онд нэг сая жуулчинг хүлээж авах тоондоо хүргэх төлөвлөгөөтэй.

Улаанбаатар хот олон улсын жуулчдыг хүлээж авахад орны тоо хүрэхгүй байна, нийт зочид буудал 4300 орчим ортой. Томоохон зочид буудлыг барих сууриудыг бэлдэж өгөх шаардлагатай байна” гэж хариуллаа.

Эх сурвалж: Монголын Мэдээ Сонин

2023 оны арваннэгдүгээр сарын 02. Пүрэв. №167 (5895)