Ахиад л ногоон автобус. Нийслэлийн нийтийн тээврийг сайжруулах хүрээнд оруулж ирсэн ногоон автобуснуудыг техникийн үзлэгт оруулж байна гэсэн мэдээлэл олон нийтийн сүлжээгээр тархаад эхэллээ. 

Уг нь “шинэ” автобуснуудаа гайхуулахаар Сүхбаатарын талбайд эгнүүлэхэд нь хуучин автобус угсраад шинээр будаж янзлаад оруулж ирснийг нь захын хүн, мэргэжлийн жолооч, техникчид нотлоод үүнээс болоод Түгжрэл бууруулах сайд Ж.Сүхбаатар, Нийслэлийн засаг дарга, Улаанбаатар хотын захирагч Д.Сумъяабазар нар буруугаа хүлээн олны өмнө бөхийн уучлал гуйгаад огцорч байсан биш үү. Уг нь АТГ “АТГ-аас өнгөрсөн сард дээрх автобусны хэрэгтэй холбогдуулж мэдээлэл хийх үеэрээ “Нэр бүхий компани хуулийн этгээдэд эдийн засгийн давуу байдал олгосон гэдэг нөхцөл байдал тогтоогдсон. Одоогоор 11 иргэн, албан тушаалтны 16 обьектод нэгжлэг хийн, 25 хүнийг эрүүгийн хэрэг яллагдагчаар татсан” гэж мэдээлж байлаа. Хуучин автобус оруулж ирж улс, ард түмнийг мэхлэхээр оролдсон гэх Тэнүүн-Огоо компанийн захирал А.Ганхуяг нарын дөрвөн хүнийг түр саатуулан шалгаж байна ч гэж л байсан. 

Тэгэхээр хуулийн байгууллага ийн ажиллаж байгааг бодоход гэмт хэргийн шинжтэй болж таарч байна. 

Тэгээд ч Гаалийн газрын Улаанбаатар хот дахь Гаалийн газрын даргын албан үүргийг түр орлон гүйцэтгэгч Б.Сүхбаатар “...Бүгд найрамдах Солонгос улсаас DAEWOO маркийн ногоон өнгийн автобусыг Улаанбаатар хотын гаалийн газрын хэмжээнд 2023 онд хийсэн гаалийн газрын бүрдүүлэлт  байхгүй болно” хэмээн Нийслэлийн Засаг дарга, Улаанбаатар хотын захирагч Х.Нямбаатарт энэ арваннэгдүгээр сарын 8-нд  01/808 тоот албан бичгээр ирүүлсэн байдаг. Хил гаалиар орж ирээгүй бол ямар замаар ирээд Сүхбаатарын талбайд жагсчихсан болж таарах вэ. 
За тэгээд л автобуснуудыг авах эзэн компани энэ дэлхийд байхгүй л бололтой байсан. 

Гэтэл яагаад одоо энэ автобуснуудыг техникийн үзлэгт оруулаад эхлэв ээ. Арай ингэж байгаад “үйлчилгээнд гаргах техникийн шаардлага хангаж байна” гээд хотын шугам үйлчилгээнд гаргачих гэж байгаа юм биш бизээ. Тэнүүн-Огоо компанид энэ автобуснуудыг нийлүүлсэн компани олдохгүй болохоор яаж ийж аргалаад эндээ шингээчих, хэд гурав хоног ч болтугай үйлчилгээнд гаргаж түмний нүд хуураад өнгөрөх гэж байгаа юм биш биз. Ингэх гээд л техникийн үзлэгт оруулж байна уу. 

Үнэхээр ногоон автобусаа боломжийн юм гээд үйлчилгээнд гаргачихвал буруутай гээд огцорсон  сайд дарга хоёроо яах юм, хэрэг үүсгээд барьж саатуулсан, шалгаж байгаа энэ олон хүнээ яах вэ. “За та нар минь буруугүй юм байнаа, Улс орон ард түмнийхээ төлөө чөмгөө дундартал зүтгэж ёстой сайхан автобус оруулж ирсэн юм байна. Уучлаарай” гэх үү. 

Зүгээр үнэхээр чанаргүй, хуучин сэлбэг хэрэгсэл угсарч, шинээр будаад оруулж ирснийг нь баталж нотлох гээд байна уу. Тийм бол үзэг оношилгоог нь хаана хэн хийж байгаа юм бол. АТГ,  хууль цагдаагийнхны оролцоотойгоор тусгай томилсон инженер техникийн ажилтан, шинжээч нар тусгай газарт хийж байна уу, үгүй юу. Эс тэгвээс манайхан чинь ямар ч дүгнэлт гаргаж мэднэ шүү дээ. Эрх мэдэл бүхий, тэдний харьяа хамааралтай, ивээгч  хэн нэгэн дарга утасдаад л, амаар нь гартал мөнгө амлачихад “ёстой энэ хорвоод байхгүй, хэдэн зуун жил ашиглаж болох автобус байна” гэсэн дүгнэлт гаргачихна шүүү дээ.

Харин Нийслэлийн засаг дарга, Улаанбаатар хотын захирагч Х.Нямбаатар дараа оны гуравдугаар сар хүртэл 1000 автобус оруулж ирж нийслэлийн нийтийн тээврийн паркийг шинэчилнэ гээд байгаа. Үүнийгээ л ёстой хулхи худалгүй ажил болгох нь дээр биш үү. 

Ногоон автобусны хэрэг намжаагүй л байна, тэгээд ч Монгол Улсын Ерөнхий сайд Л.Оюун-Эрдэнэ нийслэлийн худалдан авах ажиллагааг бүхэлд нь шалга гэсэн үүрэг өгсөн шүү. 

Монголын мэдээ сонин

2023 оны арваннэгдүгээр сарын 17. Баасан. №174 (5902)