Энэ 2023 он шувтарлаа даа. Шинэ 2024 он гараад л сонгуулийн дуулиан эхэлж  төр ард түмний мөнгөнөөс хулгай хийж, УИХ-ын гишүүний халдашгүй дархан эрх гэгчийн халхавчин дор амар жимэр сууж амташсан нөхөд улс орон, ард түмэндээ     хайртай дуртайгаа илэрхийлээд л эхэлнэ дээ. Түрүүчээс нь УИХ-ын дарга Г.Занданшатар ард түмэн шигээ  хүйтэнд даарч, түгжрэлд гацаж явдгаа “гайхуулан” гудамжинд зогсон зургаа татуулж түгээв. 

Энэ мэт нь ч яахав гэхэд яаж сонгуулйг өөртөө ашигтайгаар, булхай луйвраа олонд мэдэгдэхгүй явуулж өөрсдөө зөөлөн  суудалд залрах вэ гэдэг ордны хуйвалдаан эхэлчхэж.

УИХ дахь МАН-ын бүлгийн дарга Д.Тогтохсүрэн “сонгуульд нөлөөлдөг нөлөөллүүдийг байхгүй болгох хэрэгтэй. Тухайлбал, нутаг ус, мөнгөний хүчин зүйл гэх мэт. Ийм том тойрог хэрэгтэй байна гэдэг үүднээс сонгуулийн бүсчилсэн тойрог болгох асуудлыг судалж, бусад намуудтай зөвшилцөж, саналыг нь авсны үндсэн дээр шийдэх нь зүйтэй.

Энэ чиглэлийг намын болон УИХ-ын удирдлагуудад өглөө” хэмээн мэдээлж байна. Тэгэхээр монголын төрийн эрх барих дээд байгууллага парламент бол цаг үеийн нөхцөл байдал, цас зудны тухайд сэтгэл зовж байгаа хүн байхгүй гэж болох нь. 

Сонгуульд нөлөөлдөг нөлөөллүүдийг байхгүй болгох хэрэгтэй гэчихжээ. Чухамдаа сонгуульд нөлөөлж хамаг л булхай луйвар бүхнийг хийдэг улс чинь нам, өчнөөн жил энэ аргадаа  дадлагажиж, насан эцэс хүртлээ энэ шар ордонд сууна гэж мөрөөдөж яваа өнөөгийн УИХ-ын хэдэн гишүүн бус уу. Сонгуульд нөлөөлдөг нөлөөллийг байхгүй болгоно гэвэл энэ УИХ-ын гишүүдийг л улс төрөөс бүрмөсөн зайлуулна гэсэн үг биш үү. Мөнгний хүчин зүйл нь нөлөөлөл юм бол Д.Тогтохсүрэн өөрөө дугтуйтай мөнгө тараагаад байсан биш үү. 

Сонгуулийн тойргийг томсгох талаар улс төрийн намуудтай зөвшилцөж, саналыг нь авсны үндсэн дээр шийдэх нь зүйтэй гэж. “Та нарыг өөрсдийг чинь УИХ-ын гишүүн болгоно” хэмээн цонхны цаанаас чихэр үмхүүлж байгаад УИХ-ын гишүүдийн тоог 126 болгоё гэсэн визийг хөөрхий ганц нэг хүнтэй намуудын дарга нараас авсан шигээ одоо дахиад тэднийг өмнөө барьж байгаад өөрсдийнхөө хүсэл зоргоор хийх нь л дээ. “Улс төрийн намуудтай зөвшилцөж саналыг нь авсан чинь..ийм санал гаргаж байна” гээд баахан гарын үсэг харуулж байгаад хоёр сумын дундаас нэг гишүүн сонгох болгочихож байхаасаа сийхгүй л улс шүү, энэ эрх баригч нам чинь.

Энэ худалч хулгайч УИХ-ын бүрэн эрхийн хугацаа дуусах өдөр нь зургадугаар сарын 24, тэгэхээр ирэх оны сонгууль энэ л хавьцаа болно гэсэн үг. Гэтэл өнөөгийн парламент УИХ-ын сонгуулийн тухай хуулиа өнөө болтол ярихгүй л, бүр дурсах ч үгүй байна. Сонгууль болохоос зургаан сарын өмнө батлах ёстой гэдэг биш бил үү.

Тэгэхээр энэ эрх баригчид шатахуун хомсодлоо, цахилгаан тасалдаж болзошгүй... гэх мэтээр олны анхаарлыг сарниулж, бухимдуулж байгаад бүр яг өөрсдөдөө тохирсон хувилбарыг сэмхээн шиг баталчих гэж байгаа  байх нь л дээ. Юу хамаагүй, дун дэн  юм ярьж байдгаар нь МАН-ын бүлгийн дарга Д.Тогтохсүрэндээ  хааяа нэг хэдэн үг зааж өгч телевизийн  камер луу түлхэж  яриулчихаад л өөрсдөө цаагуураа юу л хийх гээд байгаа бол. 

Одоохондоо ирэх хавар зургадугаар сард УИХ-ын сонгууль болж “зуун ямаанд жаран ухна” гэдэгчлэн 126 гишүүнтэй парламент байгуулах нь тодорхой, өнөөгийн эрх баригч МАН хамаг л муу муухай, булай булхай луйвраа хийх нь бас тодорхой л байх шив дээ. 

Эх сурвалж: Монголын Мэдээ сонин

2023 оны арванхоёрдугаар сарын 18. Даваа. №185 (5913)