Гар утасаараа энд тэндээс шууд дамжуулан харилцагчидтайгаа сэтгүүлзүйн бусаар бүдүүлэг харьцдаг Д.Мөнх-Эрдэнэ, Н.Өнөрцэцэг нарыг эрх баригчид баривчлан хорьж дарамталж байгаад ухааруулав. Д.Мөнх-Эрдэнэд нь Монгол Улсын ерөнхийлөгч У.Хүрэлсүх өршөөл үзүүлэн сулласан гэнэ. 

“Zarig.mn” сайтын Н.Өнөрцэцэгийн хувьд хууль хяналтын байгууллага саатуулан шалгаж байгаа. 

Лайвчин Д.Мөнх-Эрдэнийг Төрийн тэргүүн,  зүгээр л толгойг нь илээд өршөөгөөгүй нь мэдээж, тун ядахнаа “ахиж битгий ингээрэй, илүү үг хүзүү ороодог шүү, дараагийн удаа бол...” гэж байгаад чухам л ам өчгийг нь аваад өршөөсөн  байж таарна. Тэгээд л Д.Мөнх-Эрдэнэ “2023 он миний хувьд их ухаарлын жил байлаа! Алдааг ганцхан өөрөөсөө хайсан надад алдаа байсан! Долоо хэмжиж нэг огтол гэдэг үгийг бүтэн жил бясалгаж байж ойлголоо” гэж олон нийтийн сүлжээнд бичсэн байж таарна. 

Тэгэхээр ухаалаг гар утас барьчихаад лайв хийн хаанаас ч юу хамаагүй ярьж байж болдог юм байна гэдэг үзэл бодол биднээс алсарч байж мэдэх нь. 

Хүн бүр ухаалаг гар утастай болж, олон нийтийн сүлжээгээр хаанаас ч мэдээлэл шууд дамжуулдаг болсноор өөрсдийгөө “сэтгүүлч”, “тэмцэгч” хэмээн ойлгодог, олон нийт ч сонин уншиж, радио сонсон, телевиз үзэхээсээ илүүтэй ийм “иргэний мэдээлэл”-рүү хошууран итгэдэг нэгэн тийм “гэнэн” уншигч, үзэгчийн цаг үе ард хоцорч байх шиг. 

Ингэснээр сэтгүүл зүй цэвэршиж, төрд бүртгэлтэй, өөрийн гэсэн редакци, нийтлэлийн бодлоготой сонин, радио, телевиз гэсэн мэдээллийн хэрэгсэл улам илүү хариуцлагатай байж, энэ хэрээрээ уншигч, үзэгч, сонсогчиддоо шударга үнэнээр үйлчилж үнэн зөв мэдээлэл хүргэдэг болно. Ийм мэдээллийн хэрэгсэл нь мэдээллээ баталгаатай эх сурвалжаас авдаг, түүнийгээ нягталж байж хэвлэн нийтэлдэг, эфирт цацдаг. Нэг үгээр бол буух эзэнтэй буцах мөртэй. Худал ташаа байлаа гэхэд хариуцах эзэнтэй. 

Нөгөө талаар мэдээлэл түгээнэ гэдэг өөрөө том хариуцлага, бас соёл. Сэтгүүлч, сурвалжлагч хүн ярилцагчтайгаа яаж харилцах, асуултаа яаж тавих,  хэрхэн бичиж тэмдэглэж авах, микрофоноо яаж барих вэ гэдэг чинь мэдээлэл авахын зэрэгцээ ярилцагчаа, уншигч, сонсогч, үзэгчээ хүндэлж байгаа хэрэг. 

Яахав олон нийт өнөөдөр хэвлэл мэдээллийн хэрэгслийг “хаалтын гэрээ хийдэг”, “эрх баригчдад үйлчилдэг” хэмээн зэмлэн буруушаадаг. Гэхдээ нэг хэсэг нь ийм байдаг юм гэхэд хаанахын хэнтэй ч хаалтын гэрээ хийдэггүй, бодит үнэнийг тэр хэвээр нь шударгаар мэдээлдэг сэтгүүлзүй, хэвлэл мэдээллийн хэрэгсэл бас бий. Өөрөөр хэлбэл нэг хэсэг нь эрх баригчдыг магтан дуулдаг юм гэхэд нөгөө нэг хэсэг нь шударга үнэний талд байгаа. Чөлөөт хэвлэл оршин тогтоно гэдэг нь чухамдаа ийм өөр өөр байр суурьтай хэрэгслүүд зэрэгцэн оршихыг л хэлдэг гэсэн томъёолол бий. Өнөөдөр гарч байгаа өдөр тутмын сонин, радио, телевизийн нэг нь юу гэж мэдээлж байна, нөгөө бусад нь яаж дамжуулж байна гээд уншигч, үзэгч өөр зуур нь харьцуулан бодож тунгаах эрхийг нь олгож байгаагаараа тухайн улс оронд чөлөөт хэвлэл  оршин тогтнож байна гэсэн үг. 

Юутай ч сонин, радио, телевизийн редакцийнхаа нийтлэлийн бодлогоор мэдээлэл олж авах гэж яваа мэргэжлийн сэтгүүлч, сурвалжлагчдын өмнүүр дайрч ороод ярилцагчийн нь ам руу микрофон, гар утасаа чихчих гээд, өөдөөс нь загнаад байдаг лайвчид  мэргэжлийн сэтгүүлзүйд  орон зайгаа тавьж өгөх нь. 

Лайвчид баяртай. Одоо мэргэжлийн сэтгүүлзүй хариуцлагатай байж, бодит үнэнийг үзэгч, уншигч, сонсогчиддоо шуурхай хүргэж байх л үлдэх шив дээ. 

Лайвчид маань ингээд сэт­гүүл­зүй­гээс холдоод эхэл­бэл уншигч, үзэгчид маань зуу зуун жилээр мэдээ­лэл түгээж ирсэн мэдээл­лийн уламжлалт хэрэг­сэл, сонин, радио, теле­визидээ итгэх итгэл нь өсч хэрэглээ нь нэмэгдэнэ дээ. 

Эх сурвалж: Монголын Мэдээ сонин

2024 оны нэгдүгээр сарын 04. Пүрэв. №001 (5919)