Х.ӨЛЗИЙ

Нийслэлийн Баянзүрх дүүрийн 26 дугаар хорооны нутагт  байгалийн хий тээвэрлэж авсан машин осолд орж  дэлбэрэн ойр орчмын барилга байгууламж, энэ орчимд зорчиж явсан олон авто машинд гай удаж, гурван ч хүний амь эрсэдсэн эмгэнэлт явдал тохиолоо. 

Замаар зорчиж явсан машин  шингэрүүлсэн хий тээвэрлэж явсан машиндтай шүргэлцсэн, түүнийг нь төрийн нэг албан хаагч, албан тушаалтан жолоодож явсан л гэнэ. Гал түймэр эсэргүүцэх машин галд автсан орон сууц руу ойртох гэтэл орох замыг нь хаагаад машин орох аргагүй гүүрэн байгууламж барьсан л гээд олон олон мэдээлэл ар араасаа хөвөрлөө.  

Энд ард иргэдийн анхаарал хандуулж, онцгойлон хэлж байгаа нэг зүйл бол бүүр эртнээс хэлээд яриад, эрх баригчид, нийслэлийн удирдлагуудад хандуулаад байсан нийслэлийн иргэд олноороо суурьшиж байгаа бүс, орон сууцны хороолол, албан байгууллага, ялангуяа  сургууль, цэцэрлэгийн ойр байгаа Шатахуун түгээх станцуудыг нүүлгэе, “энэ аюултай шүү” гэсэн шаардлага байсан. 

Ард иргэдийнхээ дэргэд дарьтай торх байрлуулчихсан атлаа энэ бусармаг үйлдлийг улс эх орны, нийслэлийн өмнөх удирдлагууд анхаарах нь байтугай ард иргэдийн шаардлагаар засч залруулах, хүн ам олноороо суурьшсан газраас нүүлгэн шилжүүлж зайлуулах талаар ямар ч арга хэмжээ аваагүй өнөө хүрсэн. 

Харин энэ Засгийн газар, Нийслэлийн удирдлага энэ талаар шийдвэртэй арга хэмжээ авч татан буулгахыг нь буулгана, нүүлгэхийг нь нүүлгэнэ, ард иргэдийнхээ аюулгүй байдлыг хангана гэдгээ энэ аймаар  ослын дараа албан ёсоор мэдэгдчихлээ. 

Монгол Улсын Шадар сайд С.Амарсайхан,  Хуульзүй дотоод хэргийн сайд Б.Энхбаяр нар ар араасаа залгаад хүн ам олноороо суурьшсан бүсээс Шатахуун түгээх станцуудыг зайлуулах, орон сууцны хорооолол, гэр хороолол руу орох замыг хааж барьсан хашаа байгууламжуудыг буулган цэгцэлнэ гэдгээ албан ёсоор ахин дахин мэдэгдчихлээ.

Авлигачидтай шийдвэртэй тэмцэж, таван Ш хөтөлбөр хэрэгжүүлэн, төрөөс ард түмэнд үзүүлэх үйлчилгээ үзүүлснийхээ төлөө мөнгө төгрөг авч, оймсондоо хэд гуравхан төгрөг нуусан, гэрийнхээ сейфэнд долоо наймхан тэрбум төгрөг хадгалсан хүнийг илчлээд бариад хориод шийтгээд байгаа энэ Засгийн газар  хотод хүн ам шигүү суурьшсан газруудад байгаа Шатахуун түгээх станцуудыг нүүлгэх бол энүүхэн энд. 

Яахав одоохондоо монгол­чуудын ирэх жил, оныхоо өнгийг хардаг, ахмад нас­тан хүндэт буу­рай нараа дээдэлдэг билгийн улирлын цагаан сарын шинийн нэгэн хаяанд ирчихээд байгаа боло­хоор л  энд тэндэхийн аж ахуйн нэгжийн барилга байгууламжийг буулгаад яахав гээд хүлээж азнаж байгаа байх. 

Түүнээс биш гудамжинд барьж, нэг гэр бүлийн амьжиргаа залгаж байсан  Түргэн үйлчилгээний цэг ТҮЦ байтугай, гудамжинд самар зарж байгаа иргэний түмпэнтэй самрыг шууд хураагаад, бороохойдон хөөгөөд зайлуулдаг цагдаа нар юм чинь, гэр хороолол,  хүн ам олноор зорчдог гудамж талбайд байрласан Шатахуун түгээх станцуудыг буулгаад зайлуулах бол юм ч байхав дээ, ёстой энүүхэнд. 

Юутай ч  энэ сард нийслэл хотноо болсон аймшигт ослоос үүдээд өнөөгийн Засгийн газар, нийслэлийн удирдлагх, Монгол Улсын Шадар сайд С.Амарсайхан, Хуульзүй дотоод хэргийн сайд Б.Энхбаяр нар шийдвэртэй арга хэмжээ авч эхлэх нь ээ. Магадгүй энэ том ажиллагаа маргааш бүр ядахнаа нөгөөдөр  ч эхэлж магадгүй. 

Гэхдээ бас зөвшөөрөлтэй эсэх, энэ тэрийг нь нягтална гэсэн шүү, энэ нь юу гэсэн үг юм бол.....МАН-ын засаглалын үед зөвшөөрөл авсан байвал  яах юм бол.

Эх сурвалж: Монголын мэдээ сонин

2024 оны нэгдүгээр сарын 29. Даваа. №009 (5927)