Нийслэлийн замын хөдөлгөөний түгжрэл, ачааллыг бууруулах зорилгоор зарим авто замд өглөө, оройн оргил цагаар зорчих хөдөлгөөнд өөрчлөлт оруулсан талаар Тээврийн цагдаагийн албанаас мэдээлж байна.

Нийслэлийн Цагдаагийн удирдах газрын дэд дарга Б.Оюутболд "ТЦА-наас Чингисийн өргөн чөлөө, олимпын гудамжны замын хөдөлгөөний зорчих хэсэгтэй холбоотой мэдээлэл өгнө. Бидний зүгээс Замын хөдөлгөөний аюулгүй байдлын тухай хуулийн наймдугаар зүйлд заасны дагуу цагдаагийн байгууллага замын хөдөлгөөний хэвийн үйл ажиллагааг хангаж, иргэдийн тайван байдлаар хөдөлгөөнд оролцоход дэмжлэг үзүүлэх эрх, үүрэгтэй.

Иргэд нийслэлийн замын хөдөлгөөнд оролцож буй иргэд түгжрэлтэй холбоотой санал, шүүмжлэл гаргадаг. Тиймээс цагдаагийн байгууллага замын хөдөлгөөний ачааллыг тэнцвэржүүлэх зорилгоор ажилладаг. Тиймээс бид тодорхой хугацаанд тодорхой хэсгийн хөдөлгөөнд замын хөдөлгөөний хоёр эгнээг гурван эгнээ болгож өгрөгжүүлсэн. 

Өөрчлөлт хийхэд ачаалал багассан ч Зайсанд ачаалал нэмэгдсэн тул хөдөлгөөнийг хэвийн горимд шилжүүлж, өчигдөр  21:40 цаг гэхэд хөдөлгөөний ачаалал хэвийн болсон. 13-н буюу өнөөдөр 07:00-07:30 цагт эсрэг хөдөлгөөнийг нэмэгдүүлэхэд ямар нэгэн ачаалал байхгүй байсан ба энэ хугацаанд цагдаагийн байгууллагын ажилтнууд давхар чиглүүлэн нэмэлтээр ажиллаж байсан. Ялангуяа өнөө өглөө өмнө нь байгаагүйгээр буюу энгийн үеэс илүү ачаалал буурсан.

Мөн яаралтай явж байгаа гэх шалтгаанаар жолооч нар эсрэг урсгал сөрж зам тээврийн осол гарах эрсдэлийг нэмж байна. Чингисийн өргөн чөлөө болон Олимпын гудамжид зураг авалтыг тогтмол хийж, харьцуулалт хийж байгаа ба үр дүн нь маргааш гарна. Маш богино хугацаанд ачааллыг давчихад замын хөдөлгөөний эрчим нэмэгдэж, ачаалал сийрэгжинэ гэж харж байна. Хэрэв үр дүнтэй байвал цаашид тогтмолжуулна.

Бид ачааллын өөрчлөлтийн дүр зургийг шинжилж, зураг авалт хийн харьцуулах тул заавал урьдчилж мэдэгдэх шаардлагагүй гэж үзэн, харин жолооч, иргэдийн төөрөгдүүлэхээс сэргийлж цаг тухайд нь өөрчлөлтийн мэдээллийг хүргэсэн" гэв.