Сонгинохайрхан дүүргийн 34 дүгээр хорооны нутаг дэвсгэрт энэ сарын 11-ний орой 20:00 цагийн үед 13 настай хүүхдийн гар утсыг дээрэмдсэн хэрэг гарчээ.

Уг хэргийг 19-20 насны хоёр эрэгтэй үйлдсэн болохыг өчигдөр олж, тогтоон, мөрдөн шалгах ажиллагаа явуулж байгааг цагдаагийн байгууллагаас мэдээллээ.

Иймд бага насны хүүхдийг орой үдшийн цагаар харгалзах хүнгүй явуулахгүй байх, хүүхдэд бусдын анхаарал татах үнэтэй утас, эд зүйл хэрэглүүлэхгүй байх, багш, нийгмийн ажилтнууд сурагчдад аюулгүйн зөвлөмж өгөхөөс гадна дээрэмдэх гэмт хэрэг нь ямар эрсдэл, хуулийн хариуцлагатай болох талаар сургалт хийх зэргээр болзошгүй эрсдэлээс сэргийлэхийг зөвлөв.

Бусдын эд хөрөнгийг хүч хэрэглэж, хүч хэрэглэхээр заналхийлж авахаар довтолсон бол хоёр жилээс найман жил хүртэл хугацаагаар хорих ялаар шийтгэх хуультай байна.