ХӨСҮТ-өөс томуу ба томуу төст болон улаанбурхан өвчний нөхцөл байдлын талаар мэдээлэл өглөө.

ХӨСҮТ-ийн нэгжийн дарга Н.Сувдмаа" Өнөөдрийн байдлаар улаанбурхан өвчний батлагдсан тохиолдол 479 болж, хавьтлын тоо 10 мянгыг даваад байна. Насны бүлгээр авч үзвэл гол төлөв 10-14 насны хүүхдүүд уг өвчнөөр халдварлаад байгаа юм. Ерөнхийдөө бол улаанбурхан өвчин ихэвчлэн ерөнхий боловсролын сургуульд голомтлон гарч байна. Иймд дархлаажуулалтад заавал хамрагдахыг зөвлөе. Томуу томуу төст өвчний хувьд тархалтын түвшин улсын хэмжээнд алаг цоог дэгдэлтийн түвшинд шилжсэн хэвээр байна. Гэсэн хэдий ч вирусийн тархалт орчилд идэвхжил өндөр хэвээр байгаа. Иймд амны хаалт зүүж, хувийн ариун цэврийн дэглэмийг сайтар сахих шаардлагатай. Томуу томуу төст өвчнөөр өвчлөгсдийн 77 хувийг 15 насныхан эзэлж буй. Үүнээс 45 хувийг 5 хүртэлх насныхан эзэлж байна. Мөн ХӨСҮТ-өөс лабораторид суурилсан тандалт хийж хүн амын дунд давамгайлан илэрч байгаа вирусийг мэдээлэлдэг. Тэгвэл өнгөрсөн долоо хоногт хүн амын дунд риновирус орчилд давамгай ажиглагдсан байна.

Риновирүсийн халдвар (Rhinovirus) нь,

• Хоолой өвдөх, сэрвэгэнэх, хамар хуурайших, найтаалгах зэрэг шинж тэмдгээр эхлэх ба
• Найтаах, нусгайрах, хамар шархирах, толгой өвдөх, амтлах, үнэрлэх мэдрэмж түр хугацаанд алдагдах, хоолой сөөх, ханиалгах, халуурах зэрэг шинж тэмдгүүд үүсдэг.
• Нярай болон сургуулийн өмнөх насны хүүхдүүд 38-39°С хэм хүртэл халуурах ба насанд хүрэгчдэд халуурах шинж тэмдэг илрэхгүй байж болох нусгайрах шинж тэмдэг давамгайлан илэрдэг байна.
• Чихний үрэвсэл, архаr бронхит болж хүндэрдэг.

Түүнчлэн хачгийн улирал эхэлж байгаа тул хачгийн халдвараас урьдчилан сэргийлэхийг анхааруулж байна. Дэлхий дахинд хачгаар дамждаг нийт 28 төрлийн халдвар байдгаас манай хүн амын дунд хачигт риккетсиоз, хачигт боррелиоз, хачигт энцефалит гэсэн гурван төрлийн халдвар бүртгэгддэг. ХӨСҮТ-д 2025 оны гуравдугаар сарын 16-наас буюу хачгийн улирал эхэлснээс хойш хачигт хазуулсан гэх өгүүлэмжтэй 44 хүн хандсан. Улмаар ХӨСҮТ-ийн нэгдүгээр тасагт хачигт риккетсиоз оношоор таван хүн хэвтэн эмчлүүлж байна. Эдгээр хүмүүс Төв, Завхан аймаг, Багануур дүүрэгт хачигт хазуулсан гэх өгүүлэмжтэй байгаа юм. Хачигт хазуулсан тохиолдолд халуурах, толбон гөвдрүүт тууралт гарах, хазуулсан хэсэг хавдаж улайх, нүдний салст улайх зэрэг зовуурь илэрдэг. Иймээс уул хаданд явахдаа битүү, тод өнгийн хувцас өмсөх нь чухал. Мөн хачигт хазуулсан тохиолдолд хэрхэн зөв арга хэмжээ авах талаар ХӨСҮТ-ийн цахим хуудаснаас харах боломжтой" гэв.