УИХ-аар Ерөнхий сайд Г.Занданшатарын өргөн мэдүүлсэн Засгийн газрын бүрэлдэхүүний тухай хуульд өөрчлөлт оруулах тухай хуулийн төслийг хэлэлцэж байх зуурт МАН хавиар огт өөр “улс төр” явж байна.

Уг нь, Ерөнхий сайд Г.Занданшатар Засгийн газартаа урьдах Засгийн газарт байсан ХҮН намыг үлдээсэн. Тэгэхдээ, яг өмнө байснаар нь үлдээсэн.  ИЗНН-ыг нэмж оруулсан. “Үндэсний эвсэл”-ийн тухайд, өөрсдөө “...Засгийн газарт орохоос татгалзсан”, МАН талаас “...Хүслийг нь биелүүлэхэд хэцүү байсан” гэдэг зөрүүтэй мэдээ түгээд үлдсэн.

Ингээд сайд нар томилогдож, одоо бүрэлдэхүүнээ батлуулж буй нь энэ. Тэгвэл, өчигдөр МАН-ынхнаас “...Засгийн газраас ХҮН намыг гаргаж, Боловсролын яамыг өөрсдөө авах нь зүйтэй” гэсэн санал гарчээ. Зөвхөн саналын түвшинд бус, нэлээд улс төр болж буй юм байна. Боловсролын яам саяын ЭЕШ дээр алдаа гаргасан нь үүний сэдэл болсон бололтой. “...Энэ нь Засгийн газрын нэр хүндэд нөлөөлж байна” гэж ХҮН намыг Засгийн газраас гаргахыг санаачлагчид үзэж буй юм байна. Тэр байтугай, “...П.Наранбаярын оронд Боловсролын сайд болно” гэсэн 3-4 гишүүн амбицаа илэрхийлжээ.

Зарим нь үүнийг “...Засгийн газар дөнгөж бүрдээд ажилдаа орж байхад задлах гээд байж болохгүй” гэж буй аж. Гэхдээ “...Энэ нь Ерөнхий сайлдын хэлэлцүүлж байгаа Засгийн газрын бүрэлдэхүүний тухай хуульд өөрчлөлт оруулах тухай хуулийн төсөлд нөлөөлөхгүй” гэдгийг эх сурвалж хэлж байна.

Эх сурвалж: “Зууны мэдээ” сонин

2025 ОНЫ ЗУРГААДУГААР САРЫН 24. МЯГМАР ГАРАГ. № 117 (7614)