Сүүлийн үед өсвөр насны хүүхдүүд гэмт хэрэг хийх нь ихэссэн. Тэр дундаа бүлэглэн дээрэм хийсэн тохиолдол гарах болсон билээ. Тэгвэл өчигдөр өсвөр насны хоёр хүүхэд бүлэглэн дээрэм хийсэн гэмт хэрэг гарчээ.

Тодруулбал,  “Ар согоотын Петровис шатахуун түгээх станцын гадна үл таних хоёр залуу зодож мөнгө, малгай дээрэмдлээ“ гэсэн мэдээлэл цагдаагийн байгууллагад ирсэн байна. Энэ дагуу шалгахад 47 настай Ц-г 14 настай Г, 15 настай Т нар бүлэглэн зодож, улмаар 2000 төгрөг, үстэй малгайг дээрэмдсэн хэрэг гарчээ. Уг хэргийг Чингэлтэй дүүргийн цагдаагийн II дугаар хэлтэс шуурхай эрэн сурвалжилж, илрүүлсэн байна.

Одоогоор уг хэргийг үргэлжлүүлэн шалгаж байгаа ажээ. Мөн  “энэ сарын 06-ны 14:30-15:00 цагийн хооронд хийдэд хулгай орсон байна” гэсэн мэдээлэл Баянзүрх дүүргийн цагдаагийн III дугаар хэлтэст ирсэн байна. Дуудлагын дагуу шалгахад 23 настай Ч нь  бусадтай бүлэглэн тус хийдийн хаалгыг эвдэн орж эд зүйл хулгайлж байсныг үйлдэл дээр нь илрүүлжээ.