Францын Ерөнхий сайд 54 настай Мануэль Валлс өнөөгийн Ерөнхийлөгч Франсуа Олландыг залгамжилж,  ирэх оны Ерөнхийлөгчийн сонгуульд нэр дэвшихээ мэдэгдсэн билээ. Тэрбээр эрх баригч Социалист намын ирэх сард болох урьдчилсан шатны сунгаанд нэр дэвших бөгөөд ингэхийн тулд өчигдөр албан ёсоор суудлаасаа буусан юм. 

Намаас сонгуульд нэр дэвшигчийг сонгох урьдчилсан шатны сунгаа ирэх нэгдүгээр сарын 22 болон 29-ний өдрүүдэд явагдах билээ. Францын Ерөнхийлөгчийн сонгуульд олон нийт өнөөгийн Ерөнхийлөгч Франсуа Олландыг улиран сонгогдохоор өрсөлдөнө хэмээн таамаглаж байсан. Гэсэн ч тэрбээр сонгуульд оролцохгүй гэдгээ орон нутгийн телевизээр мэдэгдэл хийхдээ онцолжээ.

Тэгвэл Мануэль Валлсын халааг Дотоод хэргийн сайд асан Бернар Казнёв авчээ. Ерөнхий сайдын хамт сайд нарын танхим ч огцорлоо. Елисейн ордноос мэдээлснээр Казнёв цаашдаа шинэ Засгийн газрыг толгойлох юм байна. Тэрбээр өнөөгийн Ерөнхийлөгч Франсуа Олландыг идэвхитэй дэмжигчийн нэг ажээ.