УБЦТС ТӨХК-ийн гүйцэтгэх захирлаар Д.Баярсайхан гэдэг бараа судлаач мэргэжилтэй хүн томилогдсон талаар бид өмнө нь нийтлэлээр дурьдаж байсан. Тэгэхдээ Улаанбаатарт байгаа 300 мянган айл өрх, цаашлаад олон байгууллага, аж ахуйн нэгж гэрэл цахилгаангүй болоход хүрвэл яана.

Мөн Аюулгүй ажиллагааны дүрэм, Техник ашиглалтын дүрмийн талаар А ч байхгүй, цахилгааны талаар юу ч мэдэхгүй хүн дарга болсноор ажилчдын амь нас, эрүүл мэндэд аюул учирвал яах вэ гэж асууж, асуудал хөндөж байлаа. Зарим нь ч яах вэ, муу ёрлолоо л гэж бодоод өнгөрсөн байх. Харин дарга нар, эрх мэдэлтнүүд, энэ хүнийг зүтгүүлсэн сандал суудал хуваарилагчид одоо болтол нүд нь балай, чих нь дүлий байсаар байна.

Гэтэл яг л өнөөх ярьж байснаар болж, УБЦТС компанийн ажилтан өндөр хүчдэлийн трансформаторт даруулж, гэмтсэн хэрэг гарлаа. Ердөө л долоо хоногийн өмнө энэ хэрэг болсон.   “Өндөр хүчдэлийн трансформаторт даруулсан хүн ГССҮТ-д ирж хэвтлээ” гэсэн мэдээлэл цагдаагийн байгууллагад ирсэн байгаа юм.

Улмаар мэдээллийн дагуу шалгахад,  УБЦТС ТӨХК-ийн цахилгаанчин  22 настай Д гэгчийг  цахилгааны шугам шалгаж байх үед дээр нь трансформатор унаж,  гэмтсэн байсан. Энэ бол цагдаагийн байгууллагаас өгсөн албан ёсны мэдээ. Энэ жишээ чинь л мэргэжлийн бус хүн байгууллага удирдахаар ямар гай тарьдаг вэ гэдгийн нэг илэрхийлэл. Зарим нь тохиолдлын шинж чанартай хэргийг даргын томилгоотой хүчээр аваачиж холболоо гэж дайрах байх. Яах вэ, энэ удаагийнх тохиолдлынх байж магадгүй.

Тэгвэл дараа ахиад, дахиад ийм хэрэг явдал гарч, хүний амь эрсэдвэл яах вэ. Улаанбаатар хотын 1.3 сая хүний эрчим хүчний найдвартай ажиллагааг хангах үүрэгтэй хүмүүс цаг наргүй, хагас цэрэгжилтийн байдалтай ажилладаг. Харин ажлаа хийхдээ аюулгүй ажиллагааг ягштал мөрдөж, амь, нас эрүүл мэндээ хамгаалах ёстой. Түүнийг нь гүйцэтгэх захирлаасаа авахуулаад шат шатны дарга, цэрэггүй мэдэж байх хэрэгтэй юм.

Гэтэл гүйцэтгэх захирлаар нь дунд сургууль төгссөнөөсөө хойш 15 жил хаагуур, юу хийж явсан нь мэдэгдэхгүй байж байгаад гэнэт СЭЗДС-ийг бараа судлаач мэргэжлээр төгссөн. Зарим нэг хүнд нохой­ны хөшөө барьж өгч яв­сан гэгдэх  нэг “гар”-ыг аваа­чаад тавьчихаар чинь яах болж байна аа. Ядаж байхад өнөөх нь цүнх дүүрэн анкеттай ирээд, өөрийнхөө хүмүүсийг томилж эхэлж. УБЦТС ТӨХК-ийн бүх хүнийг сольж, халж хаях зорилготой ч гэсэн явган яриа энэ байгууллагаар тэнэж бай­гаа гэсэн. Бүр ирснээсээ хойш 20 орчим хүнийг хал­чих­сан байгаа.

Тэгээд оронд нь зүгээр л нэг “цүнх баригч” хийж байсан, судлаач мэргэжилтэй нусгайнуудыг томилсон байгаа юм. Ингэхээр чинь өнөө даргаасаа авахуулаад цэрэг, бүр цэвэрлэгч хүртлээ Аюулгүй ажиллагааны дүрмийг мэдэж, ягштал баримтлах чинь ёстой нохойн баас болж хувирна биз дээ.

Дарга нь дүрэм журмаа сайтар мэдэж, доор байгаа ажилтнууддаа байнга анхааруулж, аюулгүй ажиллуулахын төлөө явахгүй бол дээр дурьдсан мэт хэрэг дахиад хэд ч гарч магадгүй. Сандал, суудал, албан тушаалыг зүгээр л шагнал мэт өгчихөж арай болохгүйн жишээ энэ. Тэр дундаа онцгой салбарт бол мэргэжлийн, ажилчдаа яс махандаа тултал ойлгодог дарга л хэрэгтэй.

Түүнээс биш зүгээр нэг бараа судлаач мэргэжилтэй, нохойны хөшөө барьсан сурагтай хүнийг ч тавьчихаж болдогүй байх аа. Гэтэл эрх баригчид хүчээр болгочихож. Мэргэжлийн бус хүнийх нь гай эхнээсээ гараад эхэллээ. Цаашид юунд  хүргэхийг хэн мэдлээ. Нэг өдөр нийслэл цахилгаангүй болбол гайхаад байх юм алга.