Жижигхэн хэрнээ тав тухтай, амар амгаланг мэдрүүлсэн өрөөнд хэн нэгэнтэй сэтгэлээ онгойтол ярьж суух ийм нэгэн агшин дэлхийн өндөр хөгжилтэй оронд ихээхэн таарна. Өөрөөр хэлбэл, хүн хоорондын харилцаа болон шийдвэр гаргахад, хүндрэл гарахад, стрeсс, сэтгэл санааны хямрал, гутрал, биeийн болон сэтгэлзүйн хүчирхийлэлд өртсөн, салалт, үхэл хагацал гэх мэт сэтгэл санаанд нь сөргөөр нөлөөлсөн үед тэр тохилог өрөөнд суух сэтгэлзүйчийг хүмүүс зорьж очдог.

Харин тэд асуудалтай хүмүүст тодорхой сэтгэлзүйн тeхник, сэтгэл заслын тодорхой аргуудаас хэрэглэн үйлчлүүлэгчийн асуудлыг шийдвэрлэхэд нь тусладаг. Ийм арга барил өнөөгийн Монголын нийгэмд ихээхэн дутагдаж байгаа хоосон орон зай. Тэр дундаа их, дээд сургуулиудад сэтгэлзүйч гэх том орон зай хоосон ханхайж буй.

Учир нь их, дээд сургуульд элсэн суралцаж буй оюутнууд дөнгөж сурагчийн ширээнээс босч, аливаад өөрийнхөө үзэл бодлоор хандаж, бие даан шийдвэр гаргахад хүрдэг. Шинэ орчин, шинэ найз нөхөд, шинэ хичээл, шинэ багш нар гээд шинэ бүхэнд дасах гэснээс болж нэлээд сэтгэлзүйн дарамтад ордог байна. Үүнээс болж гэрээ санах, хичээлдээ муудах зэрэг сөрөг үр дагаварууд гардаг. Харин энэ хоосон орон зайг дүүргэсэн нэгэн үйл явдал өчигдөр боллоо. тодруулбал, Анагаахын шинжлэх ухааны үндэсний их сургуулийн “Сэтгэлзүйн зөвлөгөө өгөх төв”-ийн нээлт болсон юм. Нээлтэд тус сургуулийн захирал Г.Батбаатар болон сургуулийн удирдлага, оюутнууд оролцов.

Оюутны сэтгэл зүйн төвийг нээж, тус сургуулийн захирал Г.Батбаатар “Залуучуудад зориулсан сэтгэлзүйн зөвлөгөө өгөх төвийг нээж байна. Энэ бол олон улсад тавигддаг шаардлагуудын нэг нь. Манай сургууль олон улсад хүлээн зөвшөөрөгдөхүйц бүсийн шилдэг их сургууль болно гэсэн эрхэм зорилгынхоо хүрээнд сэтгэлзүйн төвийг заавал байгуулах ёстой.

Тийм учраас сургуулийнхаа Оюутны холбооны хүсэлт болон Сэтгэцийн төвийн шууд оролцоотойгоор энэхүү төвийг байгууллаа. Ахлах бүлгийн төгсөх ангийн сурагчид сургуулиа төгсөөд огт өөр орчинд ирдэг. Их сургууль хэмээх биеэ даадаг, өөрийгөө дайчилдаг, маш олон оюутнуудтай орчинд орж ирдэг. Манай сургуулийн оюутнуудын хийсэн судалгаагаар оюутнуудад сэтгэлзүйн асуудал их тулгардаг. Нийт оюутнуудын 20 орчим хувь нь сэтгэл санааны ямар нэгэн асуудалтай тулгарч байдаг.

Тэгэхээр тэд энэ асуудлаа яаж шийдэх юм. Үүнд хэн туслах вэ гэж бодохоор энэ зөвлөгөө өгөх төв зайлшгүй шаардлагатай. Бид зөвхөн эрдэм мэдлэгтэй оюутнуудыг бэлтгэн гаргах ёсгүй. Манай сургууль оюутнуудаа эрдэм мэдлэгийг заахаас гадна хүн болгох, нийгэмшүүлэх, ирээдүйн аав, ээж болоход нь бэлдэх гэсэн их том үүргээ умартаж явсан юм билээ.

Тиймээс бид хожуу ч гэсэн умардсан зүйлээ санаж оюутнуудаа зөв төлөвшүүлэх, боловсруулах, хүмүүжүүлэх, өөрийгөө нийгэмд зөв авч явж, таниулахад нь туслахын тулд энэ төвийг байгуулж байна” гэв. Энэхүү төв нээгдсэнээр оюутнууд өөрт тулгамдсан сэтгэлзүйн асуудлаа шийдвэрлүүлж, үнэ төлбөргүй зөвлөгөө авах боломж бүрдэж байгаа аж. Энэ үеэр тус сургуулийн сэтгэцийн эрүүл мэндийн тэнхимийн багш, анагаах ухааны доктор Д.Оюунсүрэн “Миний хувьд энэ салбарт 20 гаруй жил ажиллан судалгаа хийж байна.

Энэ хугацаанд оюутнуудад сэтгэлзүйн зөвлөгөө нэн шаардлагатай болох нь харагдсан. Ялангуяа шинэ оюутны хувьд их сургуулийн амьдралд дасахын хажуугаар нийгэмд бие хүн болж төлөвших явц зэрэгцдэг. Орон нутгийн оюутан л гэхэд наад зах нь олон чиглэлтэй автобусаар төөрөхгүй явах, хүмүүстэй харилцахаас эхлээд сэтгэлийн хямралд ордог.

Сэтгэлзүйн наад захын асуудлуудаа хүндээр тусгаж, хуримтлуулсаар сүүлдээ сэтгэлзүйн ноцтой асуудалд ордог. Энэ мэтчилэн асуудал тулгамдсан оюутан энэхүү төвөөр үйлчлүүлж зөвлөгөө авах боломжтой. Одоогоор орон тооны сэтгэлзүйч ажиллахгүй. Манай тэнхимийн залуу багш н.Энхтүвшин хариуцаж ажиллана” гэв. Энэхүү төв нь Монголд анх удаа оюутанд зориулсан сэтгэлзүйн төв гэдгээрээ онцлогтой ажээ. Мөн сэтгэлзүйн төвөөр дамжуулан  оюутнууддаа үнэ төлбөргүй зөвлөгөө өгч, үйлчлэх бөгөөд тус сургуулийн анагаахын мэргэжлийн багш, сэтгэл засалч нар ажиллах юм байна.

Эхний ээлжинд Анагаахын сургуулийн оюутнууд үйлчлүүлэх аж. Харин дараагийн ээлжинд бусад их, дээд сургуулийн оюутныг ч хамруулахаар төлөвлөжээ. Нээлтийн үеэр энэхүү төвийг бусад их дээд сургуулиудад түгээн дэлгэрүүлэх, байгуулах зорилготой гэдгийг тус сургуулийн захирал онцолсон юм.