Монгол Улсад анхны олон улсын нисэх онгоцны буудал байгуулагдаад 60 жил болжээ. Тэгвэл үүнтэй холбогдуулан “Хөх тэнгэрийн хаалга” нэртэй үзэсгэлэн “Чингис хаан” олон улсын нисэх онгоцны буудалд өнгөрсөн баасан гарагт нээлтээ хийлээ.

Тус үзэсгэлэнд Зам тээврийн хөгжлийн дэд сайд Б.Цогтгэрэл, “Чингис хаан” олон улсын нисэх онгоцны буудлын захирал Д.Мөнхбаатар, Иргэний нисэхийн ерөнхий газрын дарга Л.Бямбасүрэн болон үе үеийн ахмад, залуу үеийн төлөөлөл, зорчигч, үйлчлүүлэгчид, агаарын тээврийн үйл ажиллагаа эрхлэгч авиа компаниудын төлөөлөгчид оролцов. Тус үзэсгэлэн Чингис хаан олон улсын нисэх онгоцны буудлын хоёрдугаар давхарт долоо хоногийн турш гарах бөгөөд тус буудлын түүхэн цаг хугацааны томоохон үйл явдлын гэрэл зураг, эд хэрэгслийг иргэдэд дэлгэн үзүүлэх ажээ.

Анх “Буянт-Ухаа” нэртэй нисэх онгоцны төв буудал 1957 оны хоёрдугаар сарын 22-ний өдөр БНМАУ-ын Сайд нарын Зөвлөлийн тогтоолоор байгуулагдаж байжээ. “Хөх тэнгэрийн хаалга” үзэсгэлэн 60 жилийн ойг тэмдэглэн өнгөрүүлэх үйл ажиллагааны хүрээнд зохион байгуулагдаж буй эхний ажил болж байгаа гэдгийг салбарын мэргэжилтнүүд нээлтийн үеэр онцолж байлаа. Мөн түүхт 60 жилийн ойтойгоо золгож буй “Чингис хаан” олон улсын нисэх буудал энэ оныг “Хэрэглэгчийн сэтгэл ханамжийг дээшлүүлэх жил”-ээр зарлажээ.

Өнөөдрийн байдлаар “Чингис хаан” Олон улсын нисэх буудал нь цагт 1000 хүнд үйлчлэх хүчин чадалтай олон улсын стандарт, шаардлагад нийцсэн, 24 цагийн үйл ажиллагаатай ажиллаж байгаа аж. Түүнчлэн Хөшигийн хөндийд баригдсан шинэ нисэх буудал руу үйл ажиллагаагаа хүндрэлгүйгээр шилжүүлэх ажлыг хэрэгжүүлэхээр бэлтгэж байгаа юм. “Хөх тэнгэрийн хаалга” үзэсгэлэн энэ сарын 24-нийг хүртэл үргэлжилнэ.

“Хөх тэнгэрийн хаалга” нээгдлээ /ФОТО/